فەلەک خامۊش کەرد
بەشۍ پەنجەمە

میرزا ئۆلقاڎر، هەڵای شین و زاریشەن، شینو ئی جارەیشە پەی (سەی نیزامەدین و سەی ئیبراهیم) ی توولانیەن، ئاڎ شینەکەو مەولەوی پەی دۊسێ نزیکیش وە یاڎ مارۊوە:
کۊچی بېواڎەت عەجەب ڕەنگێ ڕەشت
شین ۋست ئەو دنیا شاڎیی ئەو بەهەشت.
چەنی ئانەیچە، هەڵای میرزا ئۆلقاڎر زیاڎەڕەوی کەرۊن، مەرگو دوۍ کەسا جە شارو پاوەی شینێ چامنەش گەرەک نېیەن، میرزا ئۆلقاڎر دیارەن مەرامێ تەرش هەن، ئەشیێ پاسە نەبیێ.

وەفدای دەرد دڵ نادیاریت بام
وەفدای ئېش سەخت دەرد کاریت بام
وەفدای هەوارگەی تازەی چۊڵت بام
وەفدای تۊی کەفەن لونگ کۊڵت بام
وەفدای جای تاریک خۊفناکت بام
وەفدای مەنزڵگەی سەرای خاکت بام
جای ڕجا و کەرەم گشت بېگانە و خوېش
ئومېد ئاڵەم شا و گەڎا و دەروېش
بنچینەی قەدیم خاس خاسانی
ئەرشەد ئەولاد خوڎا شناسانی
ئەنیس ئاداب جەرگەی بېعەیبان
ڕەفیق ڕاگەی (رجال الغیبان)
شېخ شەرەفناک خانەگا یانە
سەیید پاک دین قوتب زەمانە
ئازاد جە مەینەت زەلزەلەی مەحشەر
سەربەرز دیوان خوڎا و پېغەمبەر
هامسەران بەیان چەنیم کەران شین
پەی فەوت ناکام شای نیزامەدین
خاڵ‌خاسان وە تاو بڕېزنان ئەسرین
پەی فەوت ناکام شای نیزامەدین
بۊی کەواو جەرگ کەمینەی حەزین
پەی فەوت نامەی شای نیزامەدین
مەر مەلائیکەی چەرخ چوارەمین
پەی فەوت ناکای شای نیزامەدین
سا ڕەنگ ئه و کۊن ئەهل سەرزەمین
ئاخ پەی ناکامی شای نیزامەدین
فدات بام پەی چېش دیارت نیەن
تەشریف خەیرت یە ئەو کۊ شییەن
کاکە جه و ساوە تەشریفت بەرد
عالەم خانەگاش تەمام وخاپور کەرد
ناپەیدایی تۊ نامەڎیش ئاوەرد
پەی سادات هەزار بەڵا پەیدا کەرد
بېدار بەر جە خاو شای تەکیەداران
سامان دەر یەک یەک ئموور کاران
شای حسامەدین تەڵەب کارتەن
هەم شېخ نەجمەدین ئینتزارتەن
هەم (شرف‌الملک) جویای نامەتەن
دایېم مونتەزر ڕەشحەی خامەتەن
(حبیب‌ الله) خان چەمەڕای ڕاتەن
دایېم ئارەزووش ئاما و لواتەن
خۊ جەعفەر سوڵتان ئاگان جە حاڵت
زوو زوو مە پەرسۊ پەرێ ئەحواڵت
(جەناب عالی شیخ جەلالەدین
شېخ‌المشایخ تورک و هند و چین
ئەولاد حەزرەت ئاغەی شېخ عومەر
ڕوح الفدا هو تاج فەرق سەر
چەنی فەتاح بەیگ دلېر سەریر
میر بۍ ئەندېش شیر شیران گیر
تەشریف ئاوردەن وە دیار تۊ
پەی سەرپەرستی قەوم و کار تۊ
قەدەم باوەرە ساتێ و ەلاشان
پای کەرەم بنیە وە بارەگاشان
خسووس عالیجا علیەی ئەنوەر
(قوتب‌العارفین) شېخ‌زادەی سەروەر
چن وەختەن ئامان وەی هاوارەوە
وەی شین و زاری وە ناچارە
وەی شین و زاری وە ناچارەوە
خانەقای وېران کەی ئاباد بۊوە
وە بۍ باواشېخ چەنی مەویاری
(قادر و ئەحمەد) وە کۍ مەسپاری
سادات مەزڵوم گشت سەرگەردانەن
وە بۍ سەر یەکسەر وېڵ هەردانەن
خۊ نامەی فەوتت هەڵای نەیاوان
لەیلۍ بېوەفات شیەن وە باوان
سەفای تۊ پەی ئەو هەر نەبی وەختش
جەفات پەی من و سەلمای بەڎبەختش
فدات بوو تووخوڎا پەی چېش بېدەنگی
مەر مەحبوس دام سەراچەی سەنگی
لاڵ بام چوون ساڵان کۊن سفرە و خوانت
کۊن گەرمی مەجلیس شه و دیواخانت
کۊن عەزم تەمکین دیوان خانان
کۊن خەیر خودای خاس پەی موسڵمانان
کۊن (صوم) و (صڵە) دەلایل وانات
کۊن مەسئەلەی سەخت هیچ‌کەس نەزانات
کۊن ئیمامەتت چەنی یارانت
جومعە و جەماعەت هەردە جارانت
کۊنت شوغڵ ڕۊ، کۊن شه و بېداریت
کۊن ئه و تەوانای تاعەت کووزاریت
گەلە بۍ شوان هەی داڎ هەی بېداد
نۊکەر بۍ ئاغە، فەقی بۍ ئوستاد
لەشکەر بۍ سەردار تابع بۍ سەروەر
خانم خەفەت‌بار، کەنیز خاک وە سەر
باغات بۍ پەرچین گوڵزار بۍ ساحیب
زەراع بېزارع چوون ماڵ غایب
مەسجد بۍ تەفسیر میحراب بیۍ ئیمام
جەماعەت قەلیل جمعە ناتەمام
مەیلش کەم کەردەن شای شیرین‌قامەت
دیڎارش کەفتەن ئه و ڕۊی قیامەت
سا من دمای تۊ مەبۊ چېش کەروون
داخ دەروونم وەلای کۍ بەروون
ڕاستەن نەجای دەنگ نە پای ئامۊشۊن
فەرمودەی مەعدووم شامڵ هەر وەتۊن
مەرگ بېواڎەت عەجەب ڕەنگێ ڕەشت
شین ۋست وە دنیا شاڎیی ئەو بەهەشت
بە خوڎا مەرگ تۊ کارێ پېم کەردەن
مەرگ براکەم جە یاڎم بەردەن
دیڎەم نابینا و زوانم لاڵەن
پەی سەی ئیبراهیم جەرگم زوخاڵەن
برای نەوجوان نەونەمام ڕۊ
برای وەش تەحریر وەش کەلامم ڕۊ
سەوڵ پەل‌کنیای سەحن باخم ڕۊ
شای میناگەردەن وەش دەماخم ڕۊ
سەیاڎ جاسووس ئیڵاخانم ڕۊ
عوقاب کەڵ ڕەم پای زاخانم ڕۊ
سەردار لەشکەر نەوجوانم ڕۊ
مەعقوڵ دیوان گشت خانانم ڕۊ
نازار نەوخەت شەربەت نۊشم ڕۊ
فاخیرەی لیباس ئەتڵەس پۊشم ڕۊ
شاسوار شۊخ مەیدان بازم ڕۊ
شاباز شش‌دانگ خۊش پەروازم ڕۊ
جای ڕجا و کەرەم قەوم و خوېشم ڕۊ
میرکەرەم‌دار بېئەندېشم ڕۊ.[1]