باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و سیهەمە (دمابەشە)
سەلمان جە شارو مەدینەی، دلۍ باخە خورماوەکانە تۊشەبەرێ خورماویش کەندێ، دیسان لواوە خزمەتو حەزرەتی، عەرزشکەرد کە سەوقاتی خورماوام پەی ئاردەنی، حەزرەت دەسبەردش چن دڼێش واردۍ، ئەسحابەکېچ واردېشا، پەی جاری یەرەمی سەلمان لواوە خزمەتش، سەرو بنەماو زانیارییەکانو پیرو کەنیسەی، کە وەڵتەر پەیش باسکەردەبۍ، داواش کەردە حەزرەتی کە مۊرەو پېخامئاوەریش تەماشە بدۊ، حەزرەتیچ زاناش نیازش چېشەن، دۊشی موبارەکش بوڵند کەرد وە دەو، مۊرەکېش نیشانە دا، ئیتر سەلمان کەوت نە خاکی پاش.
عەرز کەرد من ئەوڕۊ سەدەقم ئاوەرد
وە سەلامەتی هیچ مەیلت نەکەرد
ئارۊ سەوقاتم ئاوەردەن پەرېت
تەناۋل بکەر، سەرم بۊ فدېت
حەزرەت دەست بەردش وە ئارەزووی دڵ
چەنی سەحابان، کەردش تەناول
فەوری کە زاناش زاتی سەروەرەن
پاسە مەعلوومەن، ئېد پېغەممەرەن
تا دەفعەی سیێەم، شیی وە حزوورش
شاڎ بیی بە دیڎار ڕوحی پەڕ نوورش
یەک سەحابەیێ فەوتش کەردەبۍ
جەو بۊنە حەزرەت تەشریف بەردەبۍ
سەلمان بە ئیخلاس دەم بە دوعاوە
ڕوو بە ڕووی حەزرەت، مدرا وە پاوە
ئاوەردش نە دڵ بۍ خەتەر و غەم
موهری نبووەت، بوینۊ وە چەم
حەزرەت چوون زاناش مورادش چېشەن
پەی موهری خاتەم دڵ وە ئەندېشەن
دۊشی موبارەک بوڵند کەرد وە دەو
موهری نبووەت، نیشان دا بە ئەو
سەلمان بۊسەدا بە موهری خاتەم
شوکری خوداەوەند کەردش دەمادەم
بە واحیدی حەقق یەکتا باوەڕ کەرد
شەهادەت وە شان محەمەد ئاوەرد
حەزرەت فەرماوا: بەڎ وېیەردەن لېت
بەیان کەر تەمام سەرگوزەشتەی وېت
جەو دما سەلمان ڕازیی بۊ حەقق لېش
کەردش حیکایەت سەرگوزەشتەی وېش
بە ئەمری خوڎای بینای بانی سەر
شاڎ بیی بە دیڎار پاکی پېغەممەر
هەزاران دروود هەزاران سەلام
زەما بەر محەمەد عەلەهی سەللام.[1]