باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و حەفتا و یەکەمە
حەزرەت دمای ڕوخسەت گېرتەی جە ئەبوبەکری، تەشریفش بەرد چوەر، لوا ئەندەروون، چاگە بېژگە جە عائیشە و ئاسمێ کەسی تەرش نەبۍ چەنە، تەدارەکو سەفەرەکەیشان ئاماڎەکەرد، پېچاشان بە سەرپۊشەکەو ئاسمێوە، ڕاو بېیابانیشان گېرتەنەوەر، دنیا دەیجوورەن، زەمین ئەمان نېیەن، بەڵام ئاڎۍ چوون فەرمانشان پەنەدریابۍ، بۍ تەرس ڕا کەرېنۍ.
حەزرەت تەشریفش وە ئەندەروون بەرد
ئیزهار تەهیەئەی زادی سەفەر کەرد
ئەبوبەکر وات: دوو ئوشتر داروون
یەکێشان پېشکەش وە تۊ مسپاروون
مەبۊ یەکێشان جە من قبوڵ کەی
بەڵ زووتەر مەساف وە خەیر بکەین تەی
حەزرەت فەرماوا بەڵ وە بۍ منەت
قبووڵەن ئوشتر بەڵام بە قیمەت
ماچان ئەو ئوشتر بە نوسەڎ درهەم
خەرید کەردەبۍ بۍ زیاڎ و کەم
چەودەم عائیشە سیدیقی سەروەر
چەنی هامشیرش ئاسیای مونەوەر
دەردەم وە ساعەت سەعدی موبارەک
مەشغووڵ بین وە کار تەهیە و تەدارەک
زادی ڕای سەفەر سفرە تەعامات
حازر کەردشان جە ئانی یەک سات
بەڵام هیچ نەبۍ بە پېچاش پېوە
تا ماشتەی ئاسما ئەو شیرین شېوە
سفرەشان پېچا بەو کەتانەوە
سیدیقی ئەکبەر گرت بە شانەوە
کەردشان دوونیم ئەو ماشتەی کەتان
نیم پەی کوڵی وېش، نیم پەی سوفرەنان
تا چەنی حەزرەت شای خەیرولبەشەر
هەردوو جە یانەی سیدیق شین وە بەر
پېغەممەر چەنی سیدیقی ئەکبەر
ڕاگەی بېیابان گرتشان نە وەر
هەردوو نابەڵەد جە ڕاە ئەفتادە
هەردوو هەر جەمام هەردوو پیادە
شەفەق ناپەیدا ستاران بیی نوور
شەو تاریک جە زاخ زوڵماتی دەیجوور.[1]