باخچێوە بېگەرد
ئەوەنویستەی و دەسکاریکەرڎەی: ئەسعەد ڕەشید
بەشۍ سەڎ و چل و حەوتەمە
میرزا ئۆلقاڎرو پاوەی ئەچی بەشەنە تاریفۍ حەزرەت و محەمەدی کەرۊن.
چوون ڕەحم جە بەین عەداوەت نېیەن
غیرەت پەی مەردان هەر قەدیم بېیەن
محەمەد جە لای حەق بەرگوزیدەن
محەمەد حەبیب خودای نادیدەن
محەمەد شېوەش شەمسی خاوەرەن
جە مەلایکان شەرەفناک تەرەن
هەر کەس محەمەد بنوازۊ بە دڵ
وەڵڵا مورادش زوو مەبۊ حاسڵ
یام هەرکەس چەنیش عەداوەت دارۊ
یەقین وە بەختش غەزەب مەوارۊ
مەبۊ هەم عەشرەت جە سەباقەتش
سابیت قەدەم بان جەحیمایەتش
قەومی بەنی هاشم غەیر ئەبولەهەب
یەکسەر، وەرد سەوگەند قەبیلەی عەرەب
تاکە یەک نەفەر جە ئېمە مەندەن
سەر جە بەندەگی محەمەد سەندەن
بەڵام بوولەهەب گومڕای کینە کېش
هەر موخالیف بی چەنی ڕیشەی وېش
حەی مەعلووم کەردەن حەماڵی خارەن
ئەبەدی دوزەخ جەزاش هەر نارەن.[1]