#میرزای لوڕستانی#
چەکۆ بە غوڕان ئاما جە دیوان
گېرتەبۍ وە دەست تېغی بېئەمان
ھەر کەسێ عەزمش کوشتەی ئەمیرەن
بەی تېغی ئەڵماس لاشەش ئەسیرەن
بەنگینە دەردەم ئاهېر گڕا لېش
دەستش دا وە تېغ بۍ خەوف و ئەندېش
ڕۇکەرد وە ئەمیر یاری وەفادار
قەسەم وە بېچۇن پادشاهی موختار
ھەر کەس نە جاگەش بەرخېزۊ وە قار
مەپېکۇن وە تېغ شاﮪ و شەھریار
دەردەم ھۊرگېرتن ئەمیر بېقەرار
تا شین وە یانە نەگېرتن قەرار
ئەو شه و میر زەیندین ھیچ نەکەرد خواب
جە خەوفی یاران شیرانی پەڕتاب
سەحەر زۇ بەکر تەڵەبکەرد ئەمیر
بڎیە چېشت کەرد مەردۇدی بۍ پیر
تەدبیر بکەرە تا چۇن مەبۊ چۇن
وەرنە وە تېغێ مەڕېزنۇنت ھۇن
جە نۊ سازنا فنۇن بېمەدار
ڕۇکەرد وە ئەمیر وات ئەی شەھریار
تەدبیرش ئېدەن ئاوازکەر یاران
بدەرە وە مەم خاتۇن سەر زوبان
جەڵەبا‌نە و پۇش با دەرماڵانە
بدەرۊ تاجدین پەرێ بەھانە
ھەر وەقت ڕەوان بی تاجەدین ڕاھی
بکەرە وە مەم ھەرچی وېت خواھی
قەبۇڵکەرد تەدبیر بەکر چۇن ئەمیر
تەڵەبکەرد ئامان یارانی دوڵگیر
وات وە تاج‌ئەلدین خاترت بۊ جەم
خاتۇ زین بەخشام یەکبارە وە مەم
تاج‌ئەلدین ئەژنی جە ئەمیر کەلام
دامانش بۇسا بە سەد ئېحترام
ڕۇکەرد وە تاجدین ئەمیری نامدار
فەردا ڕاھی بەر مەگېرە قەرار
قانۇنی ئیلات با دەرماڵانە
ھا بەخشام وە تۊ پەی وېت بستانە
چۇن مەم مېھمانەن بمانۊ نەی جا
حازر بۊ جە لام جە گاﮪ و بېگاﮪ
تا بە خەیرییەت بازگەشتش مەبۇن
ئەسبابی شادی درۊست مەکەرۇن
جە نۊ تاج‌ئەلدین ھۊرېزا وە پا
جە ڕۇی بەندەگی بۇسا دەستی شاﮪ
موبارەکبادی خېزا جە مەجلېس
خاترجەم کەردن یارانی مونېس
ساکېن بین ئەو شه و بە خاتر گوشاد
غەم و خەیاڵان تەمام دان وە باد
نەو دەم کە تولۇع ڕۊ بی ئاشکار
تاج‌ئەلدین وە ئەسپ تازی بی سوار
عەفۆ با چەکۆ شېرانی شکار
بەردش چەنی وېش بەنگینی نامدار
ھېمەتخواییش کەرد جە شاﮪ ئەمیر
وات خانەی وېتەن بۍ عوزر و تەقسیر
ھەرچی وېت خواھی فاعېل بە موختار
ھەرچی عەزمتەن باوەرە نە کار
مەم وات ئېحتیاج بەی حەرف نەدارۇ
گردتان بە زاتی خودا مەسپارۇ
[1]