باخچێوە بېگەرد
نویستەی: میرزا ئۆلقاڎرو پاوەی
بەشۍ: هەشتا و هەشتەمە
هەواڵو (محەمەد)ی زارۊڵەی یاوا بە (بەنی سەعد)ی، کە خېڵ و حەلیمۍ بېنۍ، بەرەکەت وارا ملشارە. میرزا ئۆلقاڎر ئەچېگەنە باس جە بارو پاکۆکەردەی محەمەدی کەرۊن کە چن پەرجوو ئامېز بېیەن.
ئی قسە، وە موڵکی بەنی سەعد یاوا
جە فەیزی حەزرەت، دنیا بیی ئاوا
ماڵات و ئەغنام، ڕەنجیدەی ڕەنجور
دەر لا، جەی دەمدا، یەکسەر بی مەغروور
وە ئەهل و ئەحشام، بەرەکەت وارا
نەدار و فەقیر، گرد بی بە دارا
قەحتی گرانی، ڕەم کەرد، جەلاشان
نیعمەت، زیاڎبی، جە بارەگاشان
جە یومنی حەزرەت، سەییدی ئەبرار
ئاوان جاری بین، جە سەنگ و جە خار
توخمی مەزرووعات، بە وېنەی ئەشجار
هەر یەک دانش بیی، بە یەک سەڎ هەزار
حەلیمە عالەم، پەرێش بی مایېل
بیی بە مەلەکە، قەوم و قەبایېل
جە فەڕی قدووم، ئەو سەوڵی ساوا
جە دین و دنیا، وە دەوڵەت یاوا
بەڵام چوون حەزرەت، جیسمش جە نوور بۍ
عارەقش گوڵاب، بیمش کافوور بۍ
بە شیرە خواریی، ئەو گوڵ ئەندامە
بەولش، نمەکەرد، هەرگیز نە جامە
خالق چوون وە پاک خەلقش کەردەبۍ
پاکان وە پاکی، پاک، ئاوەردەبۍ
ئەگەر کەردەبۊش جە شام، یا نەهار
فەوری فریشتان، بەردەن، ئەو کەنار
حەلیم، ماوەردش، بشۊ، ڕووش وە ئاو
مدیا، چېش، شۊریان، بە عەتر و گوڵاو
فریشتان، تەشت ئیبریق، ماوەردەن
دایېم ئەندامش، تاهیر مەکەردەن
هەر وەخت ئەندامش، بکەفتا، وە بەر
ڕۊی ڕۊشن مەکەرد، وە یەومەلمەحشەر
گاهێ ئەندامش، ئەر بییا مەکشووف
چوون بەدری کامل، مەستیی نەخسووف
هەتا مەتاوا، فەریادش مەکەرد
تا مەپۊشاشان، ئۊسا، شیر مەوەرد
جیسمی لەتیفش، بۍ شک، جە نوور بۍ
بۍ سورمە دایېم، دیڎەش، مەخموور بۍ
یەک جە ئۊساف شای بوڵند پایە
چوون، مینای بېگەرد، هیچ نەبیش سایە
شەوێ، جە شەوان، ئەو سەرو ئازاد
زوانش، بە نامۍ خالق، بیی گوشاد
ئەوەڵ کەلیمە، خواجەی کائینات
هەر لائیلاهە ئیلەڵڵا مەوات.[1]