داستانۊ حەیدەری و سنۊبەرۍ
بەشۍ شەس و پەنجەمە

ئەڎاو قەزەنفەری، هەڵای ئینا سەرو لاشەو کوڕەکەیشۆ، مەلاونۊش، ئاڎە نزاو شەڕی کەرۊن جە خەڵکو ئێرانی، واتش: مادام شازادەی کشمیرشا کوشتەن، یاخوڎا ئێران وېران بۊن، کەسشان بەرنەشۊن:
فەلەک شاڎیم بەرد، غەم دا وە دەستم
هېمای جە ئاداب، مننەت، نە ڕەستم
ئێران، وېران بۊ، تا بە قەندەهار
هەنی کەس لېشان، سەر نارۊ دیار
ئێران سەرانسەر بکوشیان، بە تېخ
ئاساری شاڎیش، بکنیۊ جە بېخ
کەس بەرنەشۊ، لېش، بە زەربی شمشېر
بېیەن، بە هوونڕېز، شازادەی کشمیر
سنۊبەر بە تېخ، پارە پارە بۊ
تەنش، ئاوېزان، پای قەنارە بۊ
چەنی ئەو جوان، ئەهلی ئێرانی
هەرگیز نەنیشان بە کامەرانی
دایەش، وېنەی من، شاڎییش، بەتاڵ بۊ
سەرتاپاش، وەبا، هېجران زوخاڵ بۊ
ئەو چوون قەزەنفەر، پەردەش سیا بۊ
بازاڕی شاڎییش، وە ما جەرا، بۊ
پەی تەورە، جە داخ، مەکەردش زاریی
بە ئاوازی بەرز، جە بېقەراریی
عمومی، ئەتباع، قەوم و قەبیلە
گردین، حازر بین، پەی ئی وەسیلە
ئەهلی کشمیری، جەرگەی قەزەنفەر
بە ساتی شاڎیی، کەردەن وە چەمەر
[1]