داستانۊ حەیدەری و سنۊبەرۍ
بەشۍ پەنجاو هەشتەمە
دمای دژمانەکا قەزەنفەری پەی سنۊبەرۍ، ئاڎېچە خرۊشېیا و دەسشکەرد دژماندای بە زەمای (قەزەنفەر)ی:
سنۊبەر ئەژنی، خرۊشا، بە قار
وات: ئەی نادرۊست، هەرزەی هەرزەکار
چەنی ڕېسوایی کاری وېتانەن
ئی حەرفی بېجا، چەنی کېتانەن
بېهوودە و بېسوود، بە کۍ مەدانای
یا من بە دایەی خیرەت، نەزانای
پاشخوانی هەر کار، ئەو هام شیرەتەن
ئەو هامشیرەی حیز، هەرزە گیرتەن
ئەرۍ بەڎکردار، وەیشوومەی وەیشەڕ
ئەی زشتی ناپاک، هەر وېت بەڎگەوهەر
عالەم وە نامووس، من پایەدارەن
کۍ قودرەت دارۊ، کەسێ چە کارەن
بتاوۊ، بە زشت بەرۊ، نامی من
مەشهوورەن، جە موڵک عالەم سامی من
سا من چېش کەروون، جە کاری گەردوون
بەڎزاتێ، چوون تۊ، من کەرۊ نگوون
دایېم، ڕېسوا بۊ، منش کەرد، دەستاخت
بە حەرفی دایەی کۊنە قەڵتاخت
زەما، ئېڎ ئەژنی، هۊرېزا، دەردەم
لوا و قاپی، یانەیش، کەرد مەحکەم
لوا دەستکېشا وە یاگەی شمشېر
بشانۊ، نە فەرق، نازاری کشمیر
دېیا، کە شمشېر نېیەن، نە جای وېش
وات: ئەڵبەت دایەم بەردەن چەنی وېش
واتش: ئەی قەحبە حیزەی هەرجایێ
سا من چېش کەروو، چەنی ڕیسوایێ
هەر مەتاسنووت لەوەندی قەڵاش
ئەرۍ ئەوامەنەی خەڵکی قزڵباش
بابۊم، ڕېسوایی، بە شانم ئاوەرد
ئەوەڵ، تۊ مەکوشوو، ئاخر وېم جە دەرد
چەن تا، جە زوڵفان، کەڵانانی دېز
پېچا بە گەردەن، بانووی شەکەرڕېز
[1]