داستانۊ حەیدەری و سنۊبەرۍ
بەشۍسیهەمە
بە یاوای حەیدەر بەگی بە شارو کشمیری، پیرێ چڼ ساڵە پېوایشۆ ئاما، خوڵکەش کەرد، حەیدەر واتش: ڕەواسە پیریمۆ ئامێنە، یانی بەختەم ئینا خاسینە، پەوکەی کۆت شۊنەو پیا پیرەکەی پەی یانەو وېشا.
ئاما بە ڕاگەش، پیری کۊنە ساڵ
وامەندەی دەوران، قامەت چوون زوخاڵ
چەمیان، چەم وەردەن، بە ڕووی عاساوە
بە زۊری عاسا، مەشۊ بە ڕاوە
غەرەز کەیومەرس، تا وە کەیقوباد
شاپوور شاپووران، گشت دارۊ بە یاد
بلاش بلاشان، تا وە ئەردەشېر
بەهرام بەهرامان، گشت دارۊ بە ویر
کەپۊی سفیدش، چوون وەفری هامن
مەیۊ بە ڕاوە، چوون گورگی زامن
حەیدەر وات: ڕوبا، ئامان وە فاڵم
شوکور دیارەن، بڵند ئېقباڵم
واتش: ئەلسلام بانووی بانوان
یاگەت هەن، ئېم شەو بەندە بۊ مېهمان
پەی چی، موسافر مەردی غەریبم
چېگە ئاو و نان، بېیەن نسیبم
واتش: سەڎ سڵام، ئەی یار و یاوەر
پیادە بە، جە ئەسپ، چېگە مېمان بەر
تەشریف بار، بە زەید یانەی وېرانم
سەڎ ساڵ مېهمان بەر، منەت بە گیانم
ئەی یانەی وېتەن، ساحېب یانە نیم
خزمەتکاری تۊم ، خۊ بېگانە نیم
حەیدەر پیادە بیی، ئەسپ کېشا بە تاو
هەراسان جە عیشق ماهی جەهانتاو
[1]