شەهیدی فەرماندە (حەسەن شرین)
ناوی تەواوی (حەسەن محەمەد محێدین)ە و ناسراوە بە (حەسەن شرین). وە لە هۆزی جەبارییە.لە #01-07-1928# لە گوندی بانزەمینی (سەید محەمەد)ی سەر بە شارەدێی #قۆرەتوو#ی – شارۆچکەی #خانەقین# لە خێزانێکی جووتیار لە دایک بووە، هەر لە تەمەنی منداڵیدا باوکی کۆچی دوایی دەکات و بەخێوکردنی خێزانەکەی دەکەوێتە ئەستۆی و ڕەنج و ماندووییەتیەکی زۆر دەچێژێت بۆ بەخێوکردنی خوشک و براکانی. بەهۆی هەستکردنی بە ستەملێکراوی میلەتەکەی و خەونی دروستکردنی دەوڵەتی سەربەخۆی کوردستان، لە ساڵی 1961 چەکی شەرەفی کردۆتە شانی و بەشداری شۆڕشی ئەیلوولی مەزنی کردووە. وە لە شۆڕشی ئەیلوولی مەزندا چەندین پۆستی وەرگرتووە و کۆتا پۆستیشی (ئامرهیز) بووە لە هێزی بەرگیری میللی، شەهید (حەسەن شرین) لەساڵی 1961 بەشداریکردووە لە داستانی #دەربەندیخان# کە چەخماخەی هەڵگیرسانی شۆڕش بووە دژ بە حوکومەتی ئەو کاتەی عێراق، وە هەروەها لە شۆڕشی ئەیلوولدا بەشداری چەندین داستانی تری نەبەردی کردووە دژ بە داگیرکاری حکومەتی ئەوکاتەی عێراق وەکو داستانەکانی (زەلکە، سێ باڵێکە، قەڵاتەپە، مەخفەری چوارکڵاو، داستانی #حەوش کڕوو#، مەجید سالار، داستانی لای تکریت، خانەقین، #زۆزک# و #حاجی ئۆمەران#، ئاوباریک، هیتر...)، وە چوار جار بەسەختی بریندار بووە.وە هەروەها دووجار سەردانی (#مەلا مستەفای بارزانی# نەمر)ی کردووە لە ساڵەکانی (1970 و 1975). لە ئانووساتی نسکۆی شۆڕشی ئەیلوولی مەزندا لە ساڵی 1975 خۆی و خێزانەکەی ئاوارەی ئێران دەبن، وە پاشان لە ئێرانەوە ڕاگوێزراونەتەوە بۆ ناوچەی (حلە) لە باشوری عێراق، وە هەروەها لەو ماوەی ئاوەرەیدا چەندین جار لەلایەن ئەمن و ئیستخباراتی ڕژێمی ئەوکاتەی عێراقەوە دەستگیرکراوە و ئەشکنجەدراوە، بەڵام هەرگیز کۆڵی نەداوە. دوای گەڕانەوەی لە باشوری عێراق بۆ دەڤەری #گەرمیان# و لە ساڵی 1979 جارێکی دی پەیوەندی کردۆتەوە بەڕیزەکانی شۆڕشی گوڵانی پێشکەوتووخواز، وەهەتاوەکو ساڵی 1986 کاری تەنزیمات و چالاکی ئەنجامداوە بۆ شۆڕشی گوڵانی پێشکەوتووخواز لە دەڤەری گەرمیان. لە دوای ڕێکەوتنی نێوان پارتی و یەکێتی و گەڕانەوەی بارەگاکانی پارتی بۆ دەڤەری گەرمیان، لەساڵی 1986 لەسەر بڕیاری ڕیزدار سەرۆک (#مەسعود بارزانی#) جارێکی دی بوو بە پێشمەرگە لە ناوچەی خانەقینی سەربە لقی (3)ی پارتیمان لە دەڤەری جافەران. وە لەشۆڕشی گۆڵانی پێشکەوتووخوازدا بە شداری چەندین داستانی کردووە دژ بە ڕژێمی بەعسی دیکتاتۆر، وەک داستانەکانی (ڕزگارکردنی ناحیەی قەرەداغ، ناوچەی سەنگاو، لێدان لە فەوجی خەفیفە لە سنوری کرکوک لەساڵی 1987). وە ساڵی1987 لەکاتی بۆردوومانکردنی بارەگایی لقی (3)ی پارتیمان لە دەڤەری جافەران بە چەکی کیمیاوی لەلایەن حکومەتی ئەوکاتەی عێراقەوە شەهیدی فەرماندە (حسن شرین) بەرچەکی کیمیاوی دەکەوێت، بەڵام دوای وەرگرتنی چارەسەری پزیشکی خۆش بەختانە چارەسەر دەکرێت. لەکاتی جێ بەجێ کردنی پڕۆسەی بەدناوی ئەنفالدا لەساڵی 1988 لەلایەن ڕژێمی بەعسەوە، شەهید (حەسەن شرین) و کۆمەڵێک پێشمەرگەی گیان فیدا کە پیکهاتبوون لە (فەریدوون #جوانڕۆ#ی، قادر قادر، ئەکبەر حیدەر سورەمەیری، عومەر تەپەسەوزی، حەمید عەلی هوسەین، حسین عەلی مراد، بەندەر عەلی مراد، عەدنان ئیبراهیم، ماجید محەمەد، عەمین مەنێور، خالید فەیلی، شەهید مدحت مەجید دارا، شەهید حەسەن حسێن شورتە، شەهید وەلید خانەقینی، سلیمان بەغدادی، محەمەد عەلی شکور، ڕنوەر حیدەر خان، جەلیل جوامێر، مامۆستا جەبار ئیبراهیم، ئیسماعیل ئەحمەد مەناف، جەعفەر ڕەباتی، عادل عەبدولرەحمان، سامان عەبدولرەحمان، جەبار عەبدولرەحمان، خالید بەغدادی، هیتر...) بۆ ماوەیەک بەرگرییەکی قارەمانانەیان کرد دژبە ڕژێمی بەعسی دیکتاتۆر، بەڵام لەسەر بڕیاری مەکتەبی سیاسی پارتی هێزەکەیان کشاندەوە و ئاوەرای ئێران بوون، بەڵام شەهید (حەسەن شرین) و خیزانەکەی بەرشاڵاوی ئەنفال دەکەون و، وە بەهۆی زۆری تەمەنیەوە ئازاد دەکرێت، بەڵام دووان لە کوڕەکانی بەناوەکانی (ئەحمەد حەسەن شرین) و (عەلی حەسەن شرین) بەرشاڵاوی ئەنفال دەکەون و لە شاری موسڵ لە سێدارە دەدرێن، وە هەروەها تەرمەکانیشیان بە شەهید (حەسەن شرین) نادرێتەوە، وەهەتاکو ئێستایش تەرمەکانیان نادیارە. هەروەها لە ڕاپەڕینە مەزنەکەی گەلەکەمان لەساڵی 1991 بەشداری کردووە لە ئازادکردنی شاری #کەلار# و دەوروبەری.لە کاتی کۆڕەوە مەزنەکەی گەلەکەمان لە ساڵی 1991 شەهید (حەسەن شرین) و حێزانەکەی ئاوارەی ئێران دەبن، وە هەروەها شەهید (حەسەن شرین) بەهۆی مانەوەی کاریگەری چەکی کیمیاوی لەسەری لە ساڵی 1991 و لە کاتی ئاوارەیدا لە نەخۆشخانەی (ئیمام خومەینی) لە شاری #کرماشان#ی ئێران بەیەکجاری چاوی لەیەک ناو و گەیشتەوە بەکاروانی نەمران.[1]