هەپەگە ڕایگەیاند، گەریلاکان لە نزیک گردی شەهید ساریا لە دژی سەربازانی تورکیا چالاکییان ئەنجام داوە و 3 سەرباز کوژراون.
ناوەندی ڕاگەیاندنی هێزەکانی پاراستنی گەل (هەپەگە) دەربارەی چالاکییەکانی گەریلا دژبە سەربازانی تورکیای داگیرکەر و هێرشە ئاسمانییەکانی دژبە هەرێمەکانی پاراستنی مەدیا ڕاگەیەنراوێکی بڵاوکردەوە.
دەقی ڕاگەیەنراوەکە:
ڕۆژی 13ی تەمووز\22ی پووشپەڕ فڕۆکە جەنگییەکانی سوپای تورکی داگیرکەر بۆردومانی گردی شەهید عەزیز-ی هەرێمی خواکورک-یان کرد لە سنووری هەرێمەکانی پاراستنی مەدیا. فڕۆکە جەنگییەکان شەوی 14ی تەمووز\23ی پووشپەڕ گردی هەلیکۆپتەر و ڕۆژی 15ی تەمووز\24ی پووشپەڕ (ئەمڕۆ) کاتژمێر 8 گردی شکەرێ سپی-یان بۆردومان کرد. دواتر بە کۆپتەری سکۆرسکی لەسەر گردی شەهید عەزیز و گردی هەلیکۆپتەر سەربازیان دابەزاند.
لە گردی شەهید ساریا 3 سەرباز کوژران
هێزەکانمان لە دژی سەربازانی سوپای تورکی داگیرکەر کە دەیانویست بێنە ناوچەکە و لە دارستان دار ببڕن، چالاکییەکیان ئەنجام دا. هێزەکانمان لە نزیک گردی شەهید ساریا ئه و هێزانەیان خستە ژێر چاودێرییەوە و ڕۆژی 14ی تەمووز\23ی پووشپەڕ کاتژمێر 11 سەرکەوتوانە لە یەکینەکەی دوژمنیان دا. لە ئەنجامدا 3 سەرباز کوژران و چەندین سەربازیش بریندار بوون. سوپای تورکی داگیرکەر کاتژمێر 20 کوژراو و بریندارەکانی بە کۆپتەری سکۆرسکی لە ناوچەکە هەڵگرتەوە. یەکینەکەمان کە چالاکییەکەی ئەنجام دا بەسەلامەتی گەیشتەوە بنکەی خۆی.
هێزەکانمان لە چێوەی هەڵمەتی شۆڕشگێڕیی شەهید باگەر و شەهید ڕۆنیادا، ڕۆژی 14ی تەمووز\23ی پووشپەڕ کاتژمێر 16 لە دژی ماکینەکانی کارکردنی سوپای دەوڵەتی تورکی داگیرکەر کە لە ڕێگەی ئەمنیی نێوان گوندەکانی وارگەنما و کەندالۆک-ی سەربە ناوچەی گەڤەری جۆلەمێرگ کاریان دەکرد، چالاکییەکی سابوتاژیان ئەنجام دا. لە چالاکییەکەدا شۆفڵێکی کارکردن تێکشکێنرا بەڵام ڕوون نەبوویەوە چەند کوژراو و برینداری سەربازانی تورکیای لێکەوتەوە.