باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و چل و یەرەمە
دمای ئانەی قوڕەیشیەکۍ گفتوگۊ مېیانو حەزرەتی و درەختەکەیشان ئەژنی، بەڵام هەر دڵی نەوەششا نەرم نەبی، داواشان وەنەکەرد کە ئەمرە کەرۊن دوە لتو درەختەکەی بلاوە پاڵو یۊترینی، یۊگېراوە پېسە جارا، حەزرەت ئەمرەش کەردە بە درەختی، ئەمرەکېش جابەجا بییە، بەڵام قەومی کېنەکېش، هەر ناڕازییەن.
چوون قەومی قوڕەیش، گۊشدار و بېگۊش
دەنگی ئەو درەخت شنەفتەن وە گۊش
جە سیڕی بېچوون گفتوگۊی ئەودار
قوڕەیش جە خجڵەت سەر وستەن بە وار
حەزرەت وات: هەنی هەن بەهانەتان
حەقق خراپکەرو یەکسەر یانەتان
واتشان: بەڵۍ بفەمو وە دار
دوولەت بۊ تەمام جە سەر تا بە وار
نیمەش جە لای تۊ بمانۊ جە پېش
ئەو نیمەش بشۊ وە جای ئەسڵی وېش
حەزرەت هەم جە نۊ نیداکەرد وەدار
واتش: بۊ بە عەشقی دانای کردگار
هەرچی قەوم جە تۊ تەمەڼا دارۊ
باوەر وە ئەنجام ئەمرشان ئارۊ
درەخت وات: بەڵۍ جە ڕیشە تا سەر
دوولەت بۊ تەمام بە ئەمری داوەر
نیمەش فەوری شیی وەجای ئەسڵی وېش
ئەو نیم جە حوزوور مدرا بېئەندېش
قوڕەیش عەرز کەردەن هەم دارین ئومېد
ئېد بشۊ وەجای ئەو، ئەو وە جایی ئېد
هەم ئیشارە کەرد چوون بازی تیژدەو
ئەو لەت ئاماوە ئېد شیی وەجای ئەو
دیسان هەم قوڕەیش قەومی بەڎکردار
عەرزکەرد نە خزمەت، شای بوراق سوار
بفەرموو ببە دارەکەی جاران
بشۊ وە جای وېش پەی ڕوژگاران
حەزرەت وات: ئەی دار زەحمەتم دا پېت
هەم بشۊ وەجای ئەسڵی پۊستی وېت
ئەی لت شی وەلای ئەو لت وە بېخەم
خاستەر نە جاران پېوەس بیی وە هەم
واتشان: سیحرش نەک هەر جارێوەن
عەجەب ساحیری جادوو کارێوەن
بەڵۍ جە ئەعجاز خواجەی کائینات
هەر ئېد کافییەن پەی گرد موعجیزات.[1]