باخچێوە بېگەرد
نویستەی: میرزا ئۆلقاڎرو پاوەی
بەشۍ ویس و یەرەمە
ئاڎەم و حەوا، سەرو زەمینیۆ عۆداڵۍ یۊترینېنۍ، ئاڎەم سەرەمڕە مەلاڵیۊوە ئەو زاتو هەقی، دمایی خوڎای بەخشا، ئیتر هاوارش پەی (حەوێ)بۍ. داواکاریش بی بە ئاشنابیەیۆیش بە(حەوێ)، حەوا چاڎیی پەشېوتەرەنە، ئاڎە نەک هەر دیڎارو ئاڎەمی، بەڵکم بۍ ئاڎەمی، بەهەشتیچش گەرەک نیەن:
سا ئادەم ئەوەند، کېشا ئاهی سەرد
تۊبەش قبووڵ کەرد، تاکی تەنیای فەرد
تا شیی، وە جای بەیت، کەعبەی موعەززەم
مەگېڵا کەم کەم، مەگرەوا دەم دەم
حەوا، شیی پەی کۊی، قوللەی عەرەفات
وە زاری و زوکار، هەر ئېڎش مەوات
ئاڎەم تۊ جە کام لا وېت شەردەوە
تا وەیتەور، من دای، وە دەم، دەردەوە
تۊ خوڎا، جە کۊنی، ماوەر بەهانە
پەی تەسکینی دڵ، باڵات بنمانە
یەخەتای من بۍ، گەندم پېت وەردم
دیڎەم لېڵاو بۊ، گۊیا، خاس کەردم
مەحروومی بەهەشت، هەر مەحروومی تۊ
شەوان تا وەڕۊ، ڕووی من سیاو بۊ
سا خوڎا بەهەشتش، با هەر بۊ پەی وېش
من ئەرتۊم مەبیی، بەهەشتم پەی چېش
وە بۍ تۊ، بەهەشت دۊزەخەن جە لام
ئادەم جە کۊنی، وە سەرگەردت بام
ئەر تۊ جە لام بی، کۊی قافم وەشتەن
سەقەری دۊزەح، جە لام بەهەشتەن
سەمعی سەربەرزان، وە ناڵین کەڕ کەرد
سەحرای عەرەفات، وە ئەسرین تەڕ کەرد.[1]