باخچێوە بېگەرد
نویستەی: میرزا ئۆلقاڎرو پاوەی
بەشۍ: چل و نۊهەمە
میزا ئۆلقاڎرو پاوەی باس جە سەرەوەختو وەفاتو حەزرەتو نووحی کەرۊن:
تا، یەک ڕۊ، قابز، چەنی جوبرەئیل
وە حوکمی فەرمان، پادشای جەلیل
هەردوو وە لای نووح، تەشریف بەردشان
جە ئەمری خالق، موخبېر کەردشان
پەرساشان، یا نووح، جە ڕۊزگاران
داخۊ، چڼ ساڵەن، دنیات وېیاران
چە تەور دیت، وەچەم، پی دنیای فانی
پەی کەس نەمانۊ، وە جاویدانی
واتش: قیاس کون، دنیا سەرانسەر
قەسری شیرین، یا کوشکی دوو دەر
ئەوەڵ بە شاڎیی، جەیدەر داخل بیم
ئاخر، وە ناکام، جە دنیا بەرشیم
جەو وەقتە، تا حاڵ، وەعدەی لوامەن
نەزانام، لەززەت، دنیا و دوون، کامەن
بەعد ئازارێ، گران یاوا پېش
سام کەرد وە نایېب، وەلیعەهدی وېش
ئەمری مەنعیات، ئەولادش تەمام
سەهمی ڕېسالەت، گرد بەخشا وە (سام)
جە داخی دنیا، کېشا ئاهی سەرد
ئەرواحش، تەحویل، قەبزی قابز کەرد
هەرسێ فەرزەندان، عالی مېقدارش
شوشتان، قاڵب، بوزورگەوارش
جە سەرای شەریف، بەیتولمەقەدەس
کەردشان، مەدفوون، جەو ئەرزی ئەقدەس
جەو دما، خوڎا، تەوفېق دا، پېشان
مەشغووڵ بین، بە کەسب، ئەدادی وېشان
(یافت)، بە تەریق، سەحرانشینان
چەنی فەرزەندان، مەسڵەحەت بینان
سېیاه چادران، ئېختېراع کەردەن
ڕۊزگار تەمام، خاس، وەسەر بەردەن
بەعزێ، ئەحشامی، بەعزێ دێکانی
بەعزێ، بە زارع، بەعزێ چووپانی
بەعزێ؟شەهرستان، بینا، نېیاشان
دەوڵەت و نیعمەت، ڕوو کەردوە لاشان
بەعزێ مەشغووڵ بین، وە سنعەتسازی
بەعزێ، دەستکەردەن، وە شەیتان بازی
[1]