باخچێوە بېگەرد
نویستەی: میرزا ئۆلقاڎرو پاوەی
بەشۍ: سی و یەرەمە
ئەچی بەشېنە، میرزا ئۆلقاڎر باس جە حوکمو نەوەکا و زاڕۊڵەکا ئاڎەمی کەرۊن: دمای ئاڎەمی ڕیسالەت یاوا لاو (شیت)ی، کوڕو ئاڎەمی، دڵ و مەژگش پیمیا جە زانست و ماریفەتی، نۊسەڎ ساڵۍ حوکمش کەرد، سەرەمڕە جوبرەئیل نیگابانیش کەرۍ، دمای ئا ماوەیە کۊچی دمایینش کەرد، جە شام ئەسپەردە کریا.
حوکمی ڕیسالەت، چەو دەم، یاوا (شیت)
وە عیلمی دانش، تەمکین و تەدریس
نەزیرش نەبۍ، جە ڕووی مەهری دوون
سەڎای تەوحیدش، مەشیی وە گەردوون
چوون ئەو ڕەسیدی، کائینات، پېش بۍ
جوبرەئیل دایېم، ڕەهنمای وېش بۍ
خولاسە جەو دەم، دنیای دوون کەم کەم
ئاوابیی، جە توخم، ئەولادی ئاڎەم
گرو گرو بین، جە یەک ویەردەن
بین وە دوو فیرقە، جوملەی خاس و عام
جە خاکی دیمەشق، شاری میسر و شام
بەعزێ دینی (شیت) قەبووڵ مەکەردەن
بەعزێ وە (ئەستام)، سوجدە مەبەردەن
ئاخر وە مەیلان، تاکی تەنیای فەرد
فەرزەندی شیرین، وە (شیت)، عەتاکەرد
نامش (ئەنوەش) بۍ، بەرگوزیدەی شیس
دایېم چەنی وېش، مەکەردش تەدریس
ئوموورات گشت، ئەولادی ئاڎەم
سوپەرد، وە، (ئەنوەش)، بۍ زیاڎ و کەم
عومری شەریفش، نۊ سەڎ ساڵ زیاڎ
ویەرد، جە دەوران، دنیای بۍ بنیاڎ
لیباسی ڕەحمەت، پۊشا، وە قامەت
دیدی دیڎارش، کەوت ئەو قیامەت
نەعشی موبارەک (شیت)، وە دەو مەبەردەن
جە شامی شەریف، مەدفوونش کەردەن.[1]