باخچێوە بېگەرد
نویستەی: میرزا ئۆلقاڎرو پاوەی
بەشۍ یاڼزەهەمە

میرزا ئۆلقاڎر باس جە خەلق و جڼی و زوڕیەتەکا مەکەرۊن. پېسە مزانمۍ (جن) مەخلووقێن جە مەخلووقەکاو خوڎای گۆرەی، کە ژیوایشان جیاوازەن. ماچۊ خوڎای خاوەن دەسەڵات تایفەو جناش دلۍ کوورۍ ئایېرینە خەلق کەردۍ، دلۍ وېشانە هامسەرگیریشان کەرد، فرۍ بیۍ، ئایینو ئیسلامیش پەنە خەڵات کەردۍ، پەی دوەسەڎ ساڵا پاڕەویشان کەرد، بەڵام دماتەر لاڕێ بیۍ، ئیتر خوڎای گۆرەی بادێ گەرمی پېسە سەبوونیش پەی کیاستۍ، داش وە دنیادا، تایەفەو جناش ۋستۍ دلۍ قەفەسی.
هەر جە ڕۊی ئەزەڵ تا ڕۊی عەرەسات
بەر سەفا، سەفای محەمەد سەڵەوات
جەو دما، جە نۊ جیهانداری فەرد
جانش، جە کوورەی ئاتەش خەلق کەرد
هەم جفتێ جە نار، کەرد وە دەمسازش
مایېل بی، وە عەیش، ناز و نیازش
باری حەملش بۍ، شش ماهش ویەرد
وەزعی حەملش بۍ، فرزەندێ ئاوەرد
باز هەم وەمەیلان، شاهەنشای جیهان
فەوزی فامشان، نییا، ئین جان
گشت جامەی مەعاش، زیندەگی پۊشان
گشت، جورعەی دەوڵەت، دنیا و دین پۊشان
وە ئەمری قادر، حەیی سوبحانی
زیاد بیی، ئەولاد، (جانی بە جانی)
چهار ڕوبعەی مەسکوون، دنیا سەرانسەر
بیی بە موڵکشان، بە ئەمری داوەر
تاکە خوڎاوەند، حەیی لا یەنام
یەک شەریعەتی ئایېنی ئیسلام
ئېرسال کەرد پەیشان پەی ئادابی دین
سیدق و ئیخلاس و ئیتاعەو تەمکین
ئەو شەرییعەت، ڕاهنمان بۊ
جە ڕووی قیامەت، شەفاعەت خواهان بۊ
ئەمانەت واتەن، سیدق کەردشان
تا کە دووسەڎ ساڵ، وەڕاه بەردشان
چەو دما، تایفەی (جانی ئیبن جانی)
دیسان، دەس کەردەن، وە ناحەزانی
بادێ چوون سەبوون، کوورەی ئاتەش بېز
دەلک، دانە ڕۊح، جان ئیبن جان ڕېز
داش وە دنیادا، وە یەک نیم نەفەس
تایفەی جانی، گرد کەرد، وە قەفەس.[1]