دواڕۆژ، #ئاوارە حەمید#
تەواوبوونی هەزار خانووی گوندی کۆری ڕاگەیەنرا و لەماوەی 45 ڕۆژدا کلیلی خانووەکان ڕادەستدەکرێت و لەو ماوەیەدا دوانزە هەزار دۆلار وەردەگیرێت.
تاهیر عەبدوڵا، جێگری پارێزگاری #هەولێر# ئەمڕۆ دووشەممە 9ی نیسانی 2018، لە کۆنگرەیەکی ڕۆژنامەوانیدا تەواو بوونی هەزار خانووی گوندی کۆری ڕاگەیاند.
جێگری پارێزگاری هەولێر ڕونیکردەوە، ئەو هەزار خانووە دابەشدەکرێن لەماوەی 45 ڕۆژدا و بۆ ئەو کەسانەی مەرجی تەواویان تێدایە.
باسی لەوەشکرد، لەماوەی 15 ڕۆژدا پێویستە ئەو کەسانە شەش هەزار و حەوت سەد دۆلار بدەن و لەکاتی ڕادەستکردنی کلیلی خانووەکان شەش هەزار دۆلاری تر بدەن.
سەبارەت بە خزمەتگوزاری بۆ خانووەکانی گوندی کۆری جێگری پارێزگار ڕونیکردەوە کە تەنها شەقامێک ماوە و تاوەکو ڕادەستکردنی خانووەکان ئەو شەقامەش تەواو دەکرێت.
لە وەڵامی پرسیاری ڕۆژنامەنووسان سەبارەت بە تەواوبوونی بەشی دووەمی خانووەکان تاهیر عەبدوڵا ڕونیکردەوە کە لەماوەی شەش مانگی داهاتوودا خانووەکانی تریش تەواو دەبن.
خانووەکانی گوندی کۆری پێنج هەزار و 519 خانووە و لە ساڵی 2014 دەست بە دروستکردنیان کراوە و بڕیارە لەماوەی 45 ڕۆژی داهاتوودا بەشی یەکەمی ئەو خانووانە ڕادەستی خاوەنەکانیان بکرێت.
هەر خانوویەکی گوندی کۆری بە پێشەکی دوو قیست و مانگانەیەک کە لە ماوەی 10 ساڵدا بدرێت، کۆی گشتی بڕی پارەکەش سێ سەد و نەوەد هەزار دۆلاری ئەمریکییە.[1]
#09-04-2018#