کورد دلۍ چەرخەکا تاریخینە
بەشۍ: دوەسەڎ و یەکەمە
نویستەی: #هاوڕێ باخەوان#
ساڵەو (1881ز):چن تۊمارێ پېوەس پی ساڵېوە ئینێ وەردەسەنە:
* ئەچی ساڵېنە، حەپسە خانەو نەقیبی دلۍ شارو سلێمانی ئامێنە دنیا، نامبریێ کناچۍ شېخ مەعرووفی و کناچەزێ کاک ئەحمەڎی شېخینە.
* شېخ موحەمەڎ فەخرولعولەمای سنەیی شاعېر، ئەچی ساڵېنە کۊچی دمایینش کەردەن.
* ئەچی ساڵېنە، ئەحمەڎ ئاغای کەرکوکی زادە، ئامان دنیا.
* وەلی دېوانەی شاعېر، ئەچی ساڵېنە کۊچی دمایینش کەردەن.
* خاتو خورشیڎە کناچۍ شېخ مارفو کەوڵۆسی ئەچی ساڵېنە ئامێنە دنیا، نامبریێ شاعېرە بیېنە.
* سەی یاقۆی شاعېر، ئەچی ساڵېنە کۊچی دمایینش کەردەن.
* موفتی پێنجوێنی شاعېر ئەچی ساڵېنە، دلۍ شارو پێنجوێنۍ ئامان دنیا.
* هەمزە ئاغاو مەنگوڕی، پەی واتە و واچی ئاشتی لوان پەی مەهابادی، چاگە فارسەکا بە فېڵ و تەڵەکۍ کوشتەن.
* مانگەو (7) ئی ساڵېنە، شېخ عوبەیدوڵڵا بانگەوازش کەردەن کە بە درېژایی مانگەو ڕەمەزانی خەریکو نما و ڕۊچە و خوڎا پەرەسی مەبۊن و هیچ کەسێ سەرش نەڎۊ وەنە.
* کۊتاو مانگەو (11) ئی ساڵېنە، باڵیۆزو تورکیای جە تاران (فەخری بەگ)، داواش جە ئێرانی کەردېنە کە هەر زەرەرێ ساڵەکانو (1870، 1876، 1881) ئێرانی یاونان بە شېخ عوبەیدوڵڵای نەهری مەشۊم ۋجارۊنەش، گەر داواکا شېخی جابەجێ نەکریان، ئانە ڕاپەڕینێ تەر سەرهۊرمڎۊوە، بەڵام ئێران داواکۍ تورکیایش داوە دما، یانی گۊشش نەدا پەنە.
* مانگەو (11) ئی ساڵېنە، نزیکەو پەنج هەزار عەرەبۍ ناوچەکانو موسڵی و بەغڎای یاوێ بارەگاو شېخ عوبەیدوڵڵای و ئاماڎەگی وېشان پەی خزمەتکەردەی شېخی نیشانە دان، شان بە شانو ئاڎییشاچ پەنج هەزار کوردۍ تەرۍ ئامێنۍ چېرو سایەو شېخی.[1]