کورد دلۍ چەرخەکا تاریخینە
بەشۍ: سەڎ و نەوەڎ و حۆتەمە
نویستەی: #هاوڕێ باخەوان#
ساڵەو (1880ز):
* مانگەو (5) ئی ساڵېنە، سەردارو ڕۊحی ئاسوورییەکا جە میدیات، پەناش بەردە وەرو یاردیدەرو کونسوڵو ڕووسیای جە دیاربەکر، داواش وەنەکەرد بە دە هەزار کوردۍ موسوڵمانېوە بلۊنە چېرو سایەو ڕووسیای، یام ڕاشان بڎان پەنە مەرز بەزنان و بلانە دلۍ ڕووسیای.
* مانگەو (6) ئی ساڵېنە، شېخ عوبەیدوڵڵای نەهری تاواش بەشێ گۆرەو هۊزو شکاکی بکېشۊ لاو وېشەرە.
* مانگەو (7) ئی ساڵېنە چن تۊمارێ پەی ئېمە مەنېنێ:
* کلایتۆنیش گەشتێ دوورودرېژەش دلۍ ناوچەکانو هەکاریرە کەردە، بە نیازو ئانەی زانیاری سەرو ڕاپەڕینەکەو شېخ عوبەیدوڵلای نەهری کۊبکەرۊوە.
* شېخ عوبەیدوڵڵای نەهری ئانەش سەلەمنا کە مەشۊم کورد و دیانەکۍ بە تەبایی بژیوان.
* شېخ عوبەیدوڵلای نەهری چەمش بە فرەو نامڎارەکا کوردەسانی کۆت.
* شېخ عوبەیدوڵڵای نەهری دلۍ دەگاو (نەهری)نە وتارێش پەی خەڵکەکەی واناوەو جەماوەرش پەی شۆڕشی هانیدا.
* مانگەو (8) ئی ساڵېنە، شېخ عوبەیدوڵڵای نەهری چەمش کۆت بە باعزێ جە سەردارە کوردەکاو نەخشەو جەنگیش دژو تورکەکا متەرە.[1]