ناوی تەواوی (ڕەئوف کوڕی کێخوا عەزیزی کێخوا ڕەشیدی کێخوا سەعید) ە، لە خانەوادەیەکی کێخوا زادەی مەلاکی #تەقتەق#-ە، ساڵی (1947) لە شارۆچکەی تەقتەق چاوی بەژیان هەڵێناوە، دوای کێخوا عەزیزی باوکی ئەو وەک کوێخایەکی خاوەن بڕوانامەو مەعریفە وئەکادیمیەکی پسپۆڕ لە بنەماڵەکەیان دەرکەوت، خێزانەکەشی ناوی (گەلاوێژ محەمەد نوری) نەوەی مەلا نوری ئیمام قاسمی شاری #کەرکووک#ە.
دکتۆر ڕەئوف وەک هەموو منداڵانی تەقتەق خوێندنی سەرەتایی لە زێدی خۆی تەقتەق دەستپێکردووە و قۆناغەکانی تری ناوەندی و ئامادەیی لە #کۆیە# و #هەولێر# تەواوکردووە.
ساڵی 1969 لە زانکۆی بەغدا کۆلیژی ڤێتەرنەری بەسەرکەوتوویی تەواوکردووە و لەبەر بەرزی ئاستی زانستی و توانای خوالێخۆشبوو بۆ زیاتر خوێندن و بڕینی قۆناغە زانستییەکانی تر ڕوو دەکاتە وڵاتی بەریتانیاو لە زانکۆی لیڤەرپولی بەریتانی لە خوێندنی باڵا وەردەگیرێت و بەسەرکەوتوویی ساڵی 1976 لە زانکۆی لیڤرپول ماستەری لە بواری زانستی پزیشکی ڤێتەرنەری بەدەستهێناوە، لە هەمان زانکۆ و پسپۆڕیدا لە ساڵی 1979 دکتۆرای تەواوکردووە.
دوای تەواوکردنی قۆناغەکانی خوێندن لەسلک وپۆستی جیاجیادا خزمەتیکردووە وەک:
1- پیشەی پیرۆزی مامۆستایەتی لە پەیمانگەی ڤێرتێرنەری لە شاری بەغدا لەنێوان ساڵانی (1970-1971) .
2- بۆماوەی چوار ساڵان بەڕێوەبەری فەرمانگەی بەیتەرەی هەولێر بووە (1971-1975) .
3- چوارساڵیتر لەنێوان ساڵانی (1980-1984) لە زانکۆی #موسڵ# مامۆستایەتی کردووە.
4- لەنێوان ساڵانی (1984-1988) بەڕێوەبەر بووە لە کۆمپانیای پەلەوەڕی گشتی لە ناوچەی کوردستان (مەبەست هەرێمی باشووری کوردستان) ە.
5- ساڵێک بەڕێوەبەری تاقیگەی ڤێرتێرنەری بووە لە ناوچەی کوردستان (1988-1989) .
6- لەنێوان ساڵانی (1991-1993) بۆ ماوەی 2 ساڵ مامۆستای #زانکۆی سەڵاحەدین# بووە.
7- بۆ ماوەی سێ ساڵان وەک پسپۆڕ لەڕێکخراوی فاو کاریکردووە لەنێوان ساڵانی (1997-2000) .
8- دامەزرێنەری بنکەی خێرخوازی دکتۆر ڕەئوفە لە تەقتەق لەنێوان ساڵانی (2002-2003) .
9- لە ساڵی (2003-2004) لێپرسراوی کۆمیتەی ڕیفڕاندۆم بووە لە وڵاتی بەریتانیا.
بەداخەوە ئەم مرۆڤە بەتواناو بلیمەتەی شارۆچکەکەمان ماوەی تەمەنی کوورت بوو (59) ساڵ ژیا، ئەو مرۆڤە خۆراگرە چوارساڵ (2002-2006) دووچاری نەخۆشی هات و ورە بەرزانە دوای سێ نەشتەرگەری لە وڵاتی بەریتانیاوئەڵمانیا، دواجار لە شاری هەولێری پایتەختی هەرێمی کوردستان لە ڕێکەوتی #15-09-2006# لە دەمژمێر 2:10 دوو و دەقیقەی بەیانی ماڵاوایی لێکردین و دڵەگەورەکەی لەلێدان کەوت و لە گۆڕستانی (بانەڕەقە) ی زێدەکەی خۆی تەقتەق بەخاک سپێردرا.
دوای کۆچی دوایی دکتۆر ڕەئوف لە ساڵی 2011 ڕێزلێنانی فەخری دەی جیهانی پێدراوە و هەروەها لە شاری (#زاخۆ#) ش بنکەیەک بۆ توێژینەوەی ڤێرتێرنەری بەناوی ئەم زاتەوە ناونراوە، و لە ساڵی 2015ەوەش بەڕێوەبەرایەتی پەروەردەی کۆیە بۆ ڕێزلێنان لەکارە خێرخوازییە پەروەردەییەکانی خوێندنگەیەکی بنەڕەتی بەناوی (خوێندنگەی دکتۆر ڕەئوفی بنەڕەتی کوڕان) ناو لێنا.
جگە لەکارە جوان وچاکەکانی دکتۆر لە دوای خۆی دوو کوڕی بەناوەکانی (هەڵات:ئەندازیارە و ڕۆژ: دکتۆری نەخۆشییە دەروونیەکانە، لەگەڵ کچێک بەناوی شیرین مامۆستای زمانی ئینگلیزییە) بەجێهێشتووە.[1]