پەردە لادای پەی کتېبو (باسێوە فەرهەنگی دەگاو گوڵپی)
هاگاڎاری و خوڵکێوە گردینییە پەی وەشەسیایا دەگاو گوڵپی و ڕۊشنویراو فەرهەنگدۆسا گردو هۆرامانی.
ئەرەمەرزیاو (یانەو سیاو چەمانەی) سەوای ڕۊ جمعەی ڕېکەوتو (19-04-2024ز) سات (2) دوۍ دمانیمەڕۊی ئاهەنگەو پەردەلادای پەی کتېبو (باسێوی فەرهەنگی دەگاو گوڵپی) مبەرۊ ڕاوە.
یاگۍ: مزگیو دەگاو گوڵپی.
ئێژاو باسین ڕاوڕەسمەکەنە ئەوەوانای و هورسەنگنای پەی دلېگەرو کتېبەکەی جە لاو (مامۊسا ئیبراهیم میکە عەلی) یوە مکریۆ.
دماتەر لاو بنوېسو کتېبەکەیوە (د.ناجح گوڵپی) واتەیوە - قسێوە سەرو ڕازەو نویستەیو کتېبەکەی پېشکەشە مکریۆ.
کۊتاو ئاهەنگەکېنە کتېبەکە مبەخشیۆ بە ئامادەبېیا.
پی بۊنەوە بنەیانەکاو گوڵپی و ڕۊشنویراو گوڵپی و فەرهەنگدۆساو هۆرامانی هاگاڎارێ و خوڵکە مکەرمۍ ئامادۍ بانۍ تاکو وېیەردەو فەرهەنگو دەگاکېشا و بەشێوە جە ناوچەکەیشا بزانانۍ، بەتایبەت وەچە تازەکۍ هەکە غافڵېنۍ ئەچی زانیاریا.
موختارۍ گردو دەگایەکاو هۆرامانی بەتایبە خوڵکە مکەرمۍ پەی ئی ئاهەنگۍ، تاکو ئانېشا هەکە هیچ بارەو دەگایەکاشاوە نەنویسیان هانی بدریانۍ سەرو دەگاکېشا بنویسا، پەی ئانەی وېیەردەما بارمېوە وەرۆ پەی وەچەی تازەی.
میدیاکارۍ ئەرەیاونایچ هاگادار مکەرمۍ ئازاڎېنۍ پەی سازنای هەواڵی ئەچی ئاهەنگۍ.
ئەر وېیەردەو وېت بزانی، ڕات ڕۊشنەنە پەی ئایندەیت.
ئەرەمەرزیاو (یانەو سیاو چەمانەی).[1]