سەروای چیبکەم لای کۆسار هێرۆیی-محەمەدئەمین محەمەد
زیکری وەفا
تەرکی دنیام کرد لەبەر ئەو، ناکات بڕوا دە من چیبکەم
دڵی ڕەقی نەرم ناکات ئەگەر شەکوا نەکەم چیبکەم؟
هەموو تەمەنم دەبەخشم بە نیگای دوو چاوی مەستی
دەڵێ هەردێ و پیرتردەبێ ناکات سەودا دە من چیبکەم
گەرچی لە دەریای خەیاڵم ئەو دوڕ و لەعل و مەرجانە
هەرچیمکرد دەستم پێی ناگا ئەگەر نزا نەکەم چیبکەم
شیفا و دەوای گشت دەردێکە ماچی شیرینی لێوی ئەو
بۆ عیلاجی تاڵی ژینم، دەستم بە ئەو ناگا چیبکەم
بە فوارەی ئەسرینی چاوم دیدە و گلێنەم لە دەستدا
مەکۆی ئیلهامی شیعرم بوو وشە و سەروام نەما چیبکەم
(کۆسار) تەنیا لە ئاست ڕاستی سەری بەرزی دەکات نەوی
لە خانەقای عیشقی ئەودا نەکەم زیکری وەفا چیبکەم؟
#کۆسار هێرۆیی#
دیوانی #پەریی خەیاڵ#
#14-07-2022# #قەڵادزێ# [1]