بە گورگیان وت: ئەوڕۆ نۆبە گاڕانی تۆیە. وتی: گوێدرێژیان لەگەڵ بێت، ناچم.
نۆبە: نۆرە یان سەرە. لە گوندەکانی وڵاتی کوردەواردا زووربەی ماڵان خاوەنی مانگان، هەمووی پێکەوە گاڕانێک دەردەچێت، یان گاوانێکی بۆ بەکرێ دەگرن، یان هەر ماڵێک بەسەر ڕۆژێک گاڕان بۆ دەشتودەر دەبات، بەوە دەوترێت: نۆبەتە گاڕان. بێگومان گورگ ناکرێت بە گاوان. پەندەکە واتە: کەسی ئازا و چەلەنگ، لەگەڵ کەسی نەزان و ناشیدا ناچێت بۆ گەشت و گەڕان، چونکە ئەوەندە دەبێتە دەردەسەری بۆی، چێژ لە گەشتەکە نابینێت. [1]