چەقەخانە چېشەن؟
نویستەی: #ئیبراهیم میکە عەلی#
وېیەردەو بڕېوە جە مەحاڵەکانو هۆرامانی و کورڎەسانینە پاسە باو بېیەن خەڵکەکە تەموو پەرسگا و مزگییەکاوە یاگێوەشا سازنێنە پەی ئانەیە وەختو دەسبەتاڵیشا، چاگە گوزەرنا، باسو هەرمان و کاری ڕوانەی و قسە دنیایی و عاڎەتیەکاشا چاگە کەرانە، پا یاگېچشا واتەن: چەقەخانە.
ئی هەرمانېچشا پەوچی کەردېنە هەتاکوو حورمەتو پەرسگایەکا پېسە یاگێوە ئەلاحەڎۍ پارېزنانە و تەنیا یاگۍ خوڎا پەرسای و نیایشی ئایینیی بانە، قسۍ عاڎەتیېشا چەنە نەکریا.
فرەتەر دلۍ شارو سنەینە ئی نەریتۍ باوە بیېنە، دەگایەکا چواردۆریشەنە تەمو مزگیەکاوە داڵانێوەشا سازنێنە پەی چەقەخانەی.
ئی نەریتە هەتا ئاوەختە بڕش کەردەن هەکە قاوەخانە و دماتەر چایەخانە ئامێنېنە و یاگۍ چەقەخانەیشا گېرتېنۆ، وردە وردە چەقەخانە دلۍ کەلتوورو ئېمەنە یاگېش لەقە بیېنە و خجڵا واچوو نامەکېچش کۊرە بیېنۆ.
سەرنجە: ئی نەریتە ئەر بەڵگەبۊ سەرو چېوێوە، بە دڵنیایۆ بەڵگەن سەرو ژیریی و فامیڎەیی وەڵیناما هەکە ئاوەزشا پانەی مەڕیان یاگێوە تایبەتەنە جەمۍ باوە و باسو هەرمانە ڕوانەکا دەگایا و گەڕەکەکاشا کەران.
دماتەر بەشەریەت یاوا ئا حەنڎا هەکە ئەنجومەنۍ جۊراو جۊرېش مەرزنېرە پەی بەردەی ڕاوەو ژیوای ڕوانەی.
ئەنجومەنو (ژیللاو مەرۍ) یۊن چا ئەنجومەنا هەکە بەرویرو ئاوەزو وەڵیناما بېیەن.[1]