باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و هەشتا و هەشتەمە
قوڕەیشیەکۍ جاڕشان دا، هەرکەس سەرەو محەمەدی و ئەبووبەکریمان پەی بارۊن، سەڎ حوشترۍ، هەرچیش گەرەکبۊن، خەڵاتش کەرمېن. کابرێوە سەرهۊز بە وېش و حەفتا نەفەرېوە جمێرە شۊنەو حەزرەتی و یاوەرەکاشەرە.
واتشان: هەر کەس مەردی پەڕ هونەر
فەرقی موستەفا سیدیقی ئەکبەر
باوەرۊ پەی قەوم بە شا و تەرەب
ئەشرافی قوڕەیش ڕوئەسای عەرەب
هەریەک سەڎ وشتر جە یانەهی وېش
گەنج و جەواهیر هەم بەخشان پېش
ناگاە بوریدە بن خەزیب نامێ
مەردی ساحیب زۊر شېر پەڕ سامێ
سەر قەبیلەی قەوم چن عەشایېر بۍ
نامش جە مەجلیس مەردان دایر بۍ
زاهیر پەی تەماع چەنی حەفتا کەس
یەکسەر نەوجوان نەمامی نەوڕەس
دەردەم سواربین پادان نە ڕیکاب
ڕاهیی بین چوون بەرق بەرقی شیهاب
ڕای چۊڵی ساحیل گرتشان نە وەر
دیاردا شۊن پای، ناقەی پېغەممەر
سێ شەو و سێ ڕۆژ تەیی کەردەن وە جەخت
نەگرتەن ئارام بە وەخت و بۍ وەخت
ڕوژی چوارەهەم هەر بە قەترەی دەو
یاوان بە حەزرەت بە ئەسحابی ئەو
بریدە حەزرەت ئەو ڕۊ نەشناسا
بە وېنەی سەرسام ساتی تەواسا
تا حەزرەت پەرسا فەرما: تۊ کېنی
شېخی عەشایېر کام سەرزەمینی
عەرز کەرد: بریدە ئیبنی غەزیبم
ئەشرافی قوڕەیش داشان فریبم
قەستم پەی قەتڵ محەمەد کەردەن
یەقین چن شەوم وە ڕۊژ ئاوەردەن.[1]