باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و پەنجا و حەوت
پەیمانو مېیانو حەزرەتی و ئەنسارەکا یاوا بە قوڕەیشیەکاو دلۍ مەککەی، شەیتانی لەعین کینەی زیاتەرش نە دڵ وستۍ، واتش محەمەد و ئەنسارەکۍ پێمانشا بەستەن پەی دژمنایەتی ئەهلوو قوڕەیشی.
شەیتانی لەعین جە نوکتەدامی
شیی وە بان بورج تەبەقەی سانی
نیدا کەرد ئەی قەوم قوڕەیشی و عەرەب
ئەی ئەهلی مەککە غالبی نەسەب
بزانان حەرفم خیلافش نېیەن
ئەهلی مەدینە جە دەس بەرشییەن
بە دینی ئیسلام یەکسەر بیی پەیوەس
چەنی محەمەد عەد و میساق بەس
پەی جەنگی قوڕەیش بەستەن ئیتیفاق
گېڵان گرد جە کەیف زەمزەمەی مەزاق
حەزرەت فەرماوا: گەدای بۍ وجوود
یانی ئەی شەیتان لەعینی مەردوود
ئینشاڵڵا دوژمن خوڎا و پېغەممەر
دەماری دینت ماوەرۊ وە بەر
جەو دما عەبباس ئیبنی عەبادە
واتش: یا ڕەسوول خودا پېدادە
ئەر مڎەی ڕوخسەت پەی ئەهلی کوففار
ئەلئان وە شمشېر وە تېغی ئابدار
هەرچی حازرین (عەلەم) وە پا کەین
قەبیلەی قوڕەیش یەکسەر فەنا کەین
حەزرەت فەرما: حەقق، بۍ هامتای فەردەن
هېمای وە غەزا ئەمرش نەکەردەن
بشۊ وە مەنزڵ ساکین بەر پەی وېت
بادا دوژمنان کەس نەزانۊ پېت
عەبباس تا یاوا بە خابگای وېش
بەیان کەرد پەرێ گرووی قەوم و خوېش.[1]