#ڕێواز فایەق#، سەرۆکی پەڕڵەمانی کوردستان لەمیانی وتارێکیدا لە کۆنفرانسی بەرەو ئاییندەیەکی باشتر بۆ ئازادی بیروڕا لە هەرێمی کوردستان وتی: بۆئەوەی مومارەسەی ئازادی ڕادەربڕین بکەین، پێویستمان بە کەرەستەکانێتی و کێ مومارەسەیان دەکات، لەو ڕووەوە کێشەی بۆشایی یاسامان نییە و باشترین یاسامان لە ناوچەکەدا هەیە بۆ خۆپیشاندان و کاری ڕۆژنامەوانی و بۆ بەدەستهێنانی زانیاریی، بەڵام کێشەمان لەگەڵ جێبەجێکردنیدایە.
دەشڵێت: لەسەر ئاستی کۆمەڵگە لە قەیرانداین، هیچ یەکێکمان پارێزراونین، تەخوین دەکرێین و دەبوخزێنرێین و دەکەوینە بەردەم مەترسی، ئەوەی لەسەر ئاستی کۆمەڵگە هەیە بەناوی ئازادی ڕادەربڕینەوە، سەربڕینی ئازادی ڕادەربڕینە، فەرهەنگی جوێندان هاتۆتە ناو کۆمەڵگەوە و خەریکە دەبێت بە کلتوروو چارەسەرکردنی قورسە، دەبێت یاسایەکمان هەبێت بۆ ڕێگرتن لە ڕق لێبوونەوە.
لەبارەی دۆخی مافی مرۆڤ و ئازادی ڕادەربڕینەوە سەرۆکى پەڕڵەمانى کوردستان وتی: ئەو هەموو ڕاپۆرتەی لەسەر دۆخی ڕۆژنامەوانی و ئازادی ڕادەربڕین هەیە بە نکۆڵی لێکردن چارەسەرنابن و ڕاپۆرتەکان بەشێکی زۆری ڕاستیان تێدایە، ڕەتکردنەوەی بەردەوامی دۆخەکە چارەسەرناکات. [1]