باخچێوە بېگەرد
نویستەی: میرزا ئۆلقاڎرو پاوەی
بەشۊ سەڎ و نەوەڎ و دوەمۍ
قوڕەیشیە کافرەکۍ دیشان کە نوسیاکە بېجگە نامۍ خوڎای، هیچی تەرش چەنە نەنویسیان، شەرمەزارۍ بیۍ. موسوڵمانەکۍ پا پەڕجوویە کە پېخامئاوەری ئەرمانا فرە وەشحاڵۍ بیۍ، ئا شەوۍ جە مەککە بی بە شاڎیی موسوڵمانەکا.
قەبیلەی قوڕەیش مەجمووعی کوففار
جە شەرمەندەگیی سەر ۋستەن بە وار
با وجوود هەزار موعجیزە وەی ڕەنگ
مەدیشان وە چەم، قەومی دڵ جە سەنگ
ڕۊ جە ڕۊ فېشتەر هەر گومڕابین
بەڎ زات و بۍ شەرم بۍ حەیابین
ئاخر ئەو خەسە مەزکوور نامانە
شکستەن ئەو شەرت عەهد و پەیمانە
چەو دەم وە (مەتعەم) کەردەن ئیشارە
مەتعەم سەحیفەش کەرد پارە پارە
بەڵ ئەو کاتب کۊنەی مەکتووبە
ئەو گومڕای بەڎ ئەسڵ غەرەز ئوسلووبە
مەنسووری ئیبن ئەکرەمش نام بۍ
دایېم جە تەحریر مەشهووری عام بۍ
جە موعجیزەی پاک موستەفای مورسەل
شەل بیی نا ئومېد جە هەر چوار پەل
جەو دما گرد شیقاق و نیفاق
یەکسەر، موشریکان گرد بە ئیتیفاق
وە ئەبوتالیب پەنا ئاوەردەن
فراوان ئیزهار مەعزەرەت کەردەن
جە ئیعجازی خاس شای خەیرولبەشەر
مەحسووران تەمام ئاوەردەن وە بەر
ئیسلام و کوففار چوون قەوم و خوېشان
یەک یەک گرد لوان وە یانەی وېشان
ئەو شەو جە مەککە زەمزەمەی شاڎیی
خېزا جە یاران چوون ڕووی ئازاڎیی.[1]