بە جانیب و سەر وێش کەردش نەزەر
شەخسێ دی بە چەم موجەللای ئەنوەر
نە جای تەعەججوب جە «أخي» پەرسا
یە ڕۆح کامین نەبییەن نەی جا؟!
وات: «يا سيدی!» هەم جە نەسڵ تۆن
نەتیجەی حەسەن سیفاتش بێشۆن
بە «عبدالقادر» مەنشوورەن نامش
«غوث الاعظم» ەن پایە و مەقامش
جە تەئریخ «عشق» مەیۆ بە دنیا
دین موبینت مەکەرۆ ئیحیا
فرسەتش زانان تەنهاییت نەی جا
بە ئەدای خزمەت تەحسیل کۆ ڕەزا
بۆسا جەبینش وات: «يا ولدي»
دۆش دەر بە قەدەم نوور سەرمەدی
خەم کەرد قامەتش پەی شاﮪ سەتوەت
وێش کەرد بە مەحمەل کۆگای نبووەت
دەرلاد جە پایەی ڕەفڕەف بی ڕەوان
هەم موقەڕڕەبان چەنیش بە دەوان
خیتاب کەرد بە غەوس سالار کەونەین
فەرماش: ئەی فرزەند «غوث الثقلين» !
دۆشت بی مەحمەل قەدەم نەبی
قەدەمت شامیل دۆش هەر وەلی
هەر وەلی قەدەم یەک نەبی دارۆ
تۆ هەم جە قەدەم من سەبتی ئارۆ
وەقتێ تەوەللود «عبدالقادر» بی
جای قەدەم نە دۆش ڕاستش زاهیر بی
جە لای بەعزێ حین ڕکووب بوراق
مەسئەلەی نەبی و غەوس بی ئیتتیفاق
#فەقێ قادری هەمەوەند# [1]