خانا:
بەرق سەیف ناز، ئەبرۊ خەمینان
عەکس ماوی خاڵ خورشید جەمینان
ئەر بگنۊ وە کۊی قولەی قەزاڵە
مەکەرۊش وە بووڵ سفتەی سەد ساڵە
مەحروومی:
بەرق بەرقەی ناز عیشوە فرۊشان
چەخماخەی لەنجەی تەڵا نە گۊشان
بزیسکەی نیگای دیدە شابازان
بریقەی غەمزەی شەکەرین ڕازان
ئەر بگنۊ وە سەنگ جای تەجەلای نوور
مەکەرۊش وە گەرد، چوون سورمەی کۊی توور
مەعدووم ڕاس خانا سۊزان عەشق بی
کەی وېنەی مەحرووم، هەر عەشقش مەشق بی؟
هەڵسەنگاندنی مەولەوی:
نەوباوەی خەیاڵ، مەحرووم دانا
ڕەدیف لەتیف، زەریف خانا
یاوا وە دیدەی کەمبینام ساوا
جە نەو بینایی پەی دیدەم یاوا
پەیڕەویی خانات یاد ئاوەردەبۍ
ئەو ئەسڵ و وێت فەرع حەساو کەردەبۍ
لاکین زادەی تەبع بۊ عەنبەرینت
دەسڕېسەکەی فیکر بیکر شیرینت
پەسەندیدەی فام عەقڵ دانا بی
خاستەر جە خەیاڵ خاسەی خانا بی
زیادە پەی فەرع، وە سەر ئەسڵەدا
خاسەین واتەی تۊن جەی سەرفەسڵەدا
#خانای قوبادی# [1]