دواڕۆژ، محەمەد مستەفا
ئەمڕۆ 21ی ئازاری 2017 لە یەکەم ڕۆژی نەورۆزدا کەمترین گەشتیار و سەیرانکەری ناوخۆیی ڕوویان کردۆتە سەیرانگاکانی دەڤەری ڕاپەڕین و بەڕێوەبەری گەشتوگوزاری ڕاپەڕینیش دەڵێت بەهۆی خراپی کەشوهەواوە سەیرانگاکانی دەڤەری ڕاپەڕین ئەمڕۆ بۆ گەشت و سەیران نەگونجاون.
ئارام پیرۆت، بەڕێوەبەری گەشتوگوزاری ڕاپەڕین بەدواڕۆژی ڕاگەیاند ئەمڕۆ کە یەکەم ڕۆژی جەژنی نەورۆزە جگە لەوەی کە گەشتیارێکی زۆر کەم لە دەرەوەی دەڤەری ڕاپەڕین ڕوویان کردۆتە سەیرانگەکانی دەڤەرەکە هاوکات سەیرانکەرانی ناوخۆی دەڤەرەکەش زۆر کەم لە ماڵەکانیان هاتونەتە دەرەوە بۆ گەشت و سەیران.
وتیشی هۆکارەکەشی دەگەڕێتەوە بۆ نالەباری کەشوهەوا و ئەگەری بارانبارین، هەروەها لە بەشی هەرە زۆری سەیرانگەکانی دەڤەری ڕاپەڕین بەهۆی بارانەوە خاکەکەی بوە بە قوڕ کە ئەمەش بۆ گەشت و سەیران نەگونجاوە.
باسی لەوەشکرد، پێشبینی دەکرێت لە دوو ڕۆژی داهاتوودا ژمارەی گەشتیاران بۆ دەڤەرەکە ڕوو لە زیاد بوون بکات و ئەوان وەک بەڕێوەبەرایەتی گەشتوگوزار هەموو ئامادەکارییەکان بۆ پێشوازی گەشتیاران ئامادەکردوە.
21-03-2017