Welatiyên ji herêmên cuda yên Bakur û Rojhilatê Sûriyê êrişên kîmyewî yên artêşa Tirk a dagirker ên li ser gerîla şermezar kirin. Welatiyan diyar kir ku ew li dijî polîtîkayên qirkirinê yên li dijî Kurdan tên meşandin, dê li kêleka gerîla bin.
Artêşa Tirk a dagirker li Zap, Avaşîn û Metînayê 2 hezar û 476 êrişên bi çekên kîmyewî û bombeyên qedexekirî pêk anîn. Li gorî daxuyaniya NPG’ê ku di 18'ê Cotmehê de hatiye weşandin, di êrişa herî dawî de 17 gerîla bi çekên kîmyewî şehîd bûbûn.
Sûcên dewleta Tirk ên li dijî hêzên gerîla yên li Herêmên Parastinê yên Medyayê bûn sedema bertek û nerazîbûna gel. Şêniyên taxên Eşrefiyê û Şêxmeqsûd ên bajarê Helebê sûcên dagirkeriya Tirk şermezar kirin û tekezî li ser berdewama têkoşînê li kêleka gerîla kir.
'PDK DI VÊ KOMKUJIYÊ DE HEVKAR E’
Têkildarî mijarê welatiya bi navê Heyat Horo wiha got: Gel li kêleka berxwedana gerîla ya li çiyayên Kurdistanê ye.
Heyat Horo bal kişand ser rêgirtina çekdarên PDK’ê li ber derbaskirina maskeyên gazê ji bo gerîla û wiha domand: Bi wê yekê ew bû şirîkê komkujiya dawî ku di encamê de 17 gerîla şehîd bûn.
Ciwana bi navê Sozdar Mihemed jî wiha got: Ciwanên Bakur û Rojhilatê Sûriyê amade ne ku bersiva banga azadî û tevlêbûna têkoşîna li dijî faşîzma Tirk bidin. Têkoşîna gerîla ya zêdetirî 40 salan dê nesekine, şert û merc çi qas zehmet bibin jî, dê heta pêkanîna hêviyên şehîdên azadiyê ev têkoşîn bidome.
Remziye Salih êrişên domdar ên artêşa Tirk şermezar kirin û got dê tolhildan bibe vebijêrka gel a ji bo bersivdayîna şehadeta 17 gerîlayan.
Welatiyê bi navê Remzî Bekir jî wiha got: Dewleta Tirk a dagirker hewl dide berxwedana gerîla têk bibe, lê gel li kêleka zarokên xwe ye û ev yek dê pêk neyê.
‛BERXWEDAN BERSIVA HERÎ GUNCAW A LI DIJÎ POLÎTÎKAYÊN QIRKIRINÊ YE’
Der barê heman mijarê de hevserokê meclisa navçeya Til Rifetê Mihemed Henan jî nêrînên xwe wiha anî ziman: Dagirkeriya Tirk bi awayekî dijwar êrişî herêmên me dike û komkujiyan li ser me pêk tîne. Wek mînak jî komkujiya ku di encama wê de 8 zarok bûn qurbanî. Vê yekê jî ji bo têkbirina îradeya me pêk tîne.
Henan wiha lê zêde kir: Kantona Şehba bi giştî û navçeya Til Rifetê bi taybetî rastî topbarana rasterast a dewleta Tirk a dagirker û çeteyên wê tên. Ev êriş bi hawan, top û balafirên bêmirov ên biçek pêk tên û komkujiyan li ser gel pêk tînin.
Henan wiha pê de çû: Berxwedana ku şêniyên herêma Efrînê yên Kurd, Ereb û Turkmen nîşan didin, bersiva polîtîkayên qirêj ên ji çiyayên Kurdistanê heya kantona Şehbayê dibin.
Henan bêdengiya Rûsyayê ya ku çavên xwe ji sûcên dagirkeriya Tirk û çeteyên wê yên li dijî gelê Efrînê digirin, şermezar kir.
Welatiya bi navê Zeyneb Silêman jî got: Dagirkeriya Tirk û çeteyên wê bi top û balafirên bêmirov ên biçek, rojane Bakur û Rojhilatê Sûriyê dikin hedef. Ji bo bidawîkirina hebûna gelê Kurd, qirkirina çanda wî, koçberkirina wî û guhertina demografiya wê herêmê, li pêş çavê cîhanê sivîl, pêşeng û zarokan dike hedef.
Zeyneb Silêman tekez kir ku bi giştî gelê Bakur û Rojhilatê Sûriyê, bi taybet gelê Efrînê li ser rêya berxwedanê ne û dê hemû planên dagirkeriyê yên li dijî wan têk bibin.
Welatiya bi navê Hêvî Silêman jî nêrîna xwe wiha anî ziman: Li dijî artêşa Tirk û sûcên wê yên li dijî qanûnên navneteweyî ku çekên kîmyewî yên di qada navneteweyî de qedexe bi kar tîne, hêzên gerîla li çiyayên Kurdistanê mezintirîn destanên berxwedanê xêz dikin.
Hêvî Silêman wiha domand: Çawa ku planên dagirkeriya Tirk li çiyayên Kurdistanê têk çûn, wê li herêmê jî têk biçin.
Hêvî Silêman tekez kir ku heta rizgarkirina hemû herêman û têkbirina planên dagirkeriyê ew ê dest ji rêya berxwedanê bernedin.
Endama Meclisa Malbatên Şehîdan û hevjîna şehîd Wehîd Hesen, Ezîze Ebdurehman bikaranîna çekên giran û qedexekirî û sûcên ku li Herêmên Parastinê yên Medyayê ku ji aliyê dewleta Tirk a dagirker ve tên kirin, şermezar kir û wiha got: Em komkujiyên ku faşîst Erdogan bi balafiran û hemû çekên giran û di qada navneteweyî de qedexekirî ne ku li ser hêzên me li çiyayên Kurdistanê pêk tîne, şermezar dikin.
Dayika şehîd Alan Mihemed, Sebah Mihemed jî wiha got: Bi windakirina her şehîdekî re, bi hezaran didin ser şopa wî, lewma kes nikare vîna me bişikîne.
Bîlal Îsmaîl ê ji Kobanê jî wiha got: Divê em bibin yek û li hember ên ku me dikin hedef bisekinin, yan jî em ê ji kokê ve qir bibin. Ji bo ku em mafên xwe bi dest bixin û hemû zehmetiyan derbas bikin, divê em tê bikoşin.
Bîlal wiha lê zêde kir: Ev xaka me ye û em dev jê bernadin. Wê çekên wan ên kîmyewî me netirsînin. Ev xak bi keda zarokên me ji terorê hatiye paqijkirin.
Welatiyê bi navê Adil Şukrî jî nêrîna xwe wiha anî ziman: Bi her awayî dixwazin me qir bikin û me ji xaka me derxin. Herêmên Parastinê yên Medyayê jî bi çekên kîmyewî topbaran dikin. Lê em ê li ber xwe bidin, dakevin qadan û em ê her dagirkerekî neçar bikin ku ji axa me derkeve.
Welatiyê bi navê Xelîl Ehmed jî şehadeta her gerîlayekî/ê wek pêngaveke ber bi azadiyê ve nirxand û wiha got: Zarokên Kurd ji bo vê herêmê canê xwe feda dikin.
Xelîl Ehmed herî dawî wiha got: Çekên kîmyewî li hemû welatan qedexe ye, lê li dijî zarokên Kurd destûr tê dayîn. Ya herî zêde ku me diêşîne xiyaneta wan kesên ku îdîa dikin ku Kurd in, bi taybet Partiya Demokrat a Kurdistanê, hevkara dewleta Tirk a dagirker di pêkanîna komkujiyan li ser gelê Kurd e.[1]
(hs)
ANHA