کوردستانیانی وڵاتداگیرکراو.
دایک و باوکانی جەرگ سووتاو، خوشکانی خەمبار و ڕەشپۆش، ڕۆڵە قارەمانەکانی خاک ونیشتیمانداگیرکراو. کرێکاران، جووتیاران، کاسپکاران، وەرزشکاران، بازرگانان، کارمەندان و پیشەییەکان، گشت چین وتۆێژو پێکهاتەکانی کوردستان.
هەروەک دەبینن و دەبیسن، کە ڕۆژانە کۆڵەکەی دەسەڵاتی 40 ساڵەی ئەم ڕێژیمە دواکەوتووە و داگیرکەرەی کوردستان بەرەو لەقبوون دەروات. ئەگەری ڕووخانی لە جاران زیاتر نزیکبووەتەوە. بارەگای ئەم دەسەڵاتە ئەوەندە درزی ناوەکی ودەرەکی تێکەوتووە کە هەرگیز چارەسەرناکرێن، وبگرە ڕۆژتارۆژ زیاتر درزەکان گەورەتر دەبن.
وەک پارتی سەربەستیی کوردستان، وەک پارتێکی نەتەوەیی و سەربەخۆخواز، وەک خەمخۆری پاراستنی گیانی لاوانی کوردستان، کە هەمیشە داوامان لە خەڵک و لاوانی کوردستان بووە، لە ڕاپەرینی نا شایستە خۆ دووربگرن و گیانیان بپارێزن. هەرگیز هاندەری ئەوە نەبووین کە لاوانی ئێمە لەو جۆرە خۆثێشاندانەی کە ڕێرەوی نەتەوەیی لە پشتەوە نییە، لاوانی کورد گیانی خۆیان بخەنە مەترسییەوەو زیاتر ببنە نێچیری ژێرسێ بە دەستانی کورد کوژی کۆماری فارسی ئیسلامی داگیرکەری ئێرانی.
ئەوەی کە لامان گرنگە ئەوەیە کە داوا لە گشت کوردستانیانی خۆشەویست بکەین، کە لە ئامادەباشی تەواودا بن بۆ هەر گۆڕانکارییەکی چاوەڕوانکراو.
ئەگەر تیشکی خۆپێشاندانەکان گەیشتنە ڕۆژهەڵاتی کوردستان، لە هەوڵی کۆکردنەوەی بەڵگەو دوکۆمینتەکاندا بن کە بوونەتە هۆکاری ژینووساید و قەتڵ و عامی ئازادیخوازانی کورد، لە هەوڵی پاراستنی دام و دەزگاکانی ڕۆژانەی ژیانی خەڵکدا بن.
لە ئاپۆرای خۆپێشاندانەکاندا با دروشمەکانتان لە پێناو مافە ڕەواکانتاندا بێت. وەک بەڵێ بۆ سەربەخۆیی کوردستان، بۆ دەرەوەی ئەی فارسی ناشیونالیست و داگیرکەری کوردستان. ڕۆژهەڵاتی هی کوردانە، تارانیش بۆ فارسانە. نەک باسکردن لە گرانی شت و مەک و دروشمی دیکە کە بیری نەتەوەیی بەرەو لاوازی ببات. بۆ ئەوەی مێژووی ئەم ڕاپەرینانە ببنە وانەیەک بۆ نەوەی سەدانساڵی داهاتوومان، کە چیدیکە نەکەونە داوی دروشمی ناڕاستی داگیرکەران. بۆ ئەوەی ڕاگەیاندنەکانی جیهان دەنگتان بۆ سەربەخۆیی بە گۆی دەسەڵاتداران و زلهێزانی جیهاندا بگەیەنن.
بۆ پێشەوە بەرەو یەکێتی و یەکدەنگی کوردانی وڵاتداگیرکراوی خۆرهەڵاتی کوردستان، بۆ وەدەرنانی داگیرکەرانی خاک و نیشتیمان و سەروەت و سامانی کوردان.
بروخی هەر جۆرە دەسەڵاتێکی فارسی لە ژێر هەر ناو ئایدولۆژیاییەک لە سەر خاکی کوردستان و نەتەوەکانی دیکەی بندەست بێت.
ئەنجوومەنی سەرکردایەتی پارتی سەربەستیی کوردستان
4ی پووشپەڕی 2718 ی کوردی
#25-06-2018#

کۆروکۆمەڵانی سیاسی و دەسەڵات و چاودێری جیهانی
خەڵکی وڵاتداگیرکراو هەمیشە برینداری کوردستان
ئەمرۆ 8ی 9 / 2018 کۆماری ئیسلامی ئێراان، بە پێ گۆێدان لە یاساکانی جیهانی سنووربەزاندن، هاتووەتە ناو قووڵایی خاکی باشوری کوردستان، و بە تووندی لە ڕێگەی فرۆکەی بێ فرۆکەوان و کاتیوشاو ئامێرەکانی دیکە، پەلاماری بارەگاکانی هەردوو بەشی حیزبی دیمۆکراتی کوردستان و حیزبی دیمۆکراتی کوردستانی ئێرانی داوە، بە دەیان شەهید و برینداری لێکەوتووەتەوە.
ئەم جۆرە کردەوە تروریستی و نایاساییانەی کۆماری ئیسلامی ئێران، لە پێشچاوی هەمووتانەوە ئەوە ئەسەلمێنێت کە ئەم ڕێژیمە لە تێکدانی ئاشتی و ئارامی لە جیهاندا نموونەی بێ ڕکابەرەو وەک هەمیشە هیچ حیسابێک بۆ یاساو دەسەڵاتەکانی جیهانی ناکات، و بگرە ڕۆژانە ملهۆری خۆی زیاتر پێشاندەدات.
وەک #پارتی سەربەستیی کوردستان#، داوا لە هەموو ڕێکخراو وڵات و دەسەڵاتدارانی جیهانی دەکەین، کە ژیان و گیانی کوردانی ڕۆژهەڵات نێشتەجێ لە باشوری کوردستان بپارێزین و ڕێکگری لە ملهوری ئەم ڕێژیمە درندەیە بگرن. چی دیکە مەبنە تەماشاکەری ناعەداڵەتی و مرۆڤکوژی ئەم ڕێژیمە دژی ئازادی وئارامییە.
پارتی سەربەستیی کوردستان هاوخەمی خۆی ئاراستەی هەردوو حیزبی ناوبراو نێشاندەدات، سەرەخۆشی لە حیزب وکەس و کاری شەهیدەکان دەکات، و هیوای هەنگاوی بە پەلە بۆ هەرچی خێرا چاکبوونەوەش بۆ بریندارەکان دەخوازێت.
هەر لەو پێوەندییەدا داوا لە دەسەڵاتی باشوری کوردستتان دەکەین، کە لە بواری بەرگری و یاسای نێودەوڵتێشەوە بە خێرایی بەرگری لەو سەدانجار سنووربەزاندنەی ئەم ڕیژیمە کوردکوژ و ئازدی کوژە بکەن، و ڕێگە نەدەن هەر لە سەر خاکی کوردستان ڕۆڵەکانی گەلی کوردمان قەتڵ و عام بکەن، داوا بکەن لە هاوپەیمانانتان بە تایبەت ئەمرئکا کە قەدەغەی دژە فرین بە سەر سنوورەکانی هەردوو بەشی کوردستاندا ڕاگەیەنێت.
کۆماری ئیسلامی ئێران هەر بەرەبەیانی ئەمرۆ کاک ڕامین حسێن پەناهی بەندی سیاسی کورد و چەندین بەندی دیکەی کوردستانی لە سێدارەدا وە، و بە هەزاران لە هێزەکانی خۆی و چەکی قورسی بە پەلە هێناوەتە دەوروبەری شارەکانی ڕۆژهەڵاتی کوردستان، بە گژاچوونەوەی هەرجۆرە خۆپێشاندانێک، بە تایبەت لە شاری #سنە# و لە کاتی وەرگرتنەوەی تەرمی و شەهید ڕامین حسێن پەناهی>
پارتی سەربەستیی کوردستان، وێرای ئیدانەکردنی بەردەوامی کردەوە مرۆڤ و ئازادیکوژییەکانی ڕێژیمی داگیرکەری فارسی ئێرانی، سەرەخۆشی ئاراستەی بنەماڵەی حسێن پەناهی و کۆمەڵەی شۆڕشگێڕی زەحمەتکێشانی کوردستانی ئێران‎, و گشت هاوسەنگەرانی دەکات.
ئەنجوومەنی سەرکردایەتی پارتی سەربەستیی کوردستان
#08-09-2018#

پارتی سەربەستیی کوردستان وەک پارتێکی نەتەوەییی و سەربەخۆخوازی کوردستانی، لە 29ی ڕێبەندانی ساڵی 2705 ی کوردی،بەرامبەر بە #17-02-2006#ی زاینی،لەلایەن چەند کوردێکی نەتەوەیی و نیشتمانپەروەری ڕۆژهەڵاتی کوردستان لە ناوخۆ و دەرەوەی کوردستان بڕیار لەسەر دامەزراندنی درا.
پارتی سەربەستیی کوردستان، پارتێکی ڕامیاری و دێمۆکراتە،لە پێناوی وەدەستهێنانی مافی سەربەخۆییی گەلی کورد لە ڕۆژهەڵاتی کوردستان خەبات دەکات،تێدەکۆشی بۆ دێمۆکراسی و ئاشتی و ئازادی،یەکسانیی نێوان ژن و پیاو، بۆ پاراستنی ماف و ڕێزی بەرامبەر بۆ هەموو ئایدولۆژیا جیاوازەکان، هەروەها هەموو چین وتوێژەکانی دانیشتووی سەر خاکی کوردستان.
پارتی سەربەستیی کوردستان پارتێکە لەسەر بناخە و پرینسیپی دیموکراسی و دیالۆگ و گفتوگۆی ئاشکرا دامەزراوە. بۆ مەسەلە گشتییەکانی پێوەندیدار بە چارەنووسی گەلی کوردەوە ڕاپرسی بە خەڵکی کوردستان دەکات.
پارتی سەربەستیی کوردستان،بە هەوڵی بێوچانی سەرکردایەتیی کاتی لە ماوەیەکی زۆر کەمدا توانیی سەدان هاوبیری نەتەوەیی و سەربەخۆخوازی ڕۆژهەڵاتی کوردستان لە ناوخۆ و دەرەوەی وڵات لە دەوری بەرنامەی خۆی کۆ کاتەوە،بەردەوامیش دەبێت بۆ پێگەیاندنی نەوەی داهاتوو بە بیرۆکەی سەربەخۆیی،
لەو ماوە کورتەدا توانیویەتی خزمەتی زۆر بە پێشخستنی بیروباوەڕ لە پێناو گەیشتن بە سەربەخۆیی و ڕزگاریی یەکجاری بکات.
پارتی سەربەستیی کوردستان لەو ماوە کورتەدا توانیوێتی لە ئاستی نێودەوڵەتی و دیپلۆماسی، وەک پارتێکی سیاسیی نەتەوەییی کوردستانی بناسرێت. گەلێک جار لە کۆبوونەوە و کۆنفرانسی وڵاتانی ئورووپا و ئەمریکاییدا بەڕەسمی بانگهێشت کراوە و دەکرێت. لەو ماوە کورتەدا توانیۆێتی دەیان وڵات و کومپانیای گرنگی جیهانی و کەسایەتیی سیاسی و نووسەری بێگانە بکاتە ئاشنا و دۆستی کورد، بەردەوام سەرقاڵی زیاتر بەجیهانیکردنی کێشەی کوردە بەگشتی و بەتایبەت ڕۆژهەڵاتی کوردستان.
پارتی سەربەستیی کوردستان، بەگوێرەی توانا لە تێکۆشانی هەموو بەشەکانی داگیرکراوی کوردستان پشتیوانی دەکات.
پارتی سەربەستیی کوردستان نیشتمانی کورد بە هەموو پارچەکانیەوە بە یەک وڵات و نەتەوەی کوردیش بە یەک نەتەوە دەناسێ، ئەو سنوورانەش کە خراونەتە نێوان بەشەکانی کوردستان و بە ڕواڵەت لەتیان کردووە، بە دەستکردی داگیرکەر و سنووری زۆرەملییان دەزانێ و دانیان پێدا نانێت، بەڵام لەم هەلومەرجە ناسکەدا، (پسک) بەپێێ چەندین هەڵسەنگاندنێکی سیاسی و ستراتیژیی ڕۆژ لە ناوچەکەدا، خەبات و تێکۆشانی ئێستای تایبەت دەکات بۆ بەشی داگیرکراوی ڕۆژهەڵاتی کوردستان، واتە کوردستانی بندەستی ڕێژیمی ئێران.

کۆمەڵانی خەڵکی تێکۆشەری کوردستان، هاوبیران و ڕێبوارانی ڕێگای سەربەخۆیی کوردستان.
هەروەک ئاگاداران لە ڕۆژانی ڕابردوو دا جوڵەی هێزی #پێشمەرگە#ی هاوخوینانی حیزبی دێموکرات لە ناوخۆی وڵات و بوونیان بەکردەوە گڕوتێنێکی زۆری خستۆتە نێو کۆمەلانی خەڵکی نیشتمان پەروەری کوردستان، و هاوکات ئەم جوڵە و چالاکییانە لە چەند ناوچەی کوردستان تیکهەڵچوونی لەگەڵ هێزە داگیرکەرەکانی ڕژیمی ترۆریستی ئێران هەبووە، و وێرای وەشاندنی زەبری کاریگەر لە پەیکەری لاوازی ڕژیم، بە خۆشییەوە هێزی پێشمەرگە لە هەموو ئەو پێکدادانانەدا بەسڵامەتی و بە بێ خەساری ئینسانی توانیویانە خۆیان دەرباز بکەن.
#پارتی سەربەستیی کوردستان#، هەر وەک چۆن وەک خەتی فکری و ڕیبازی سیاسی بە ئاشکرا لە پەیرەو وپرۆگرامی خۆیدا بە ڕوونی ئاماژەی بە پشتیوانی و هاریکاری هەرچەشنە جوڵانەوەیەک لە ڕۆژهەڵاتی کوردستان و، بە ئامانجی زەربەدان لە داگیرکەرانی کوردستان، کە بتوانێ خزمەت بە بەرژەوەندییەکانی گەلی کوردستان بکات، جەخت دەکەینەوە کە ئێمە وەک پارتی سەربەستیی کوردستان: بەهەر چەشنێک بۆمان بلوێت و بە تەواوی هێزو ورەوە پشتیوانی لەم چەشنە چالاکییانە دەکەین، و ئامادەی هاوکاری و هاوفکرین لە هەر بارودۆخ و قوناغێکی هەستیاردا، هاوکات داوا لە هەموو ڕێکخستنەکانی خۆمان هەر لە #ماکۆ# و #سەڵماس#ەوە تاکوو #ئیلام# و #کرماشان# دەکەین ئاگادار و بەرپرسیاربن لە ڕووی هاوکاری و یارمەتی هێزی پێشمەرگە بە بێ جیاوازی حیزبی و بە ئینتیمایەکی نەتەوەیی هەوڵ بۆئەم ئەرکە پیرۆزە بدەن.
خەباتی چەکداری نوێ لە ژێر ناوی ڕاسان یاهەر ناوێکیتر لای ئێمە پیرۆزە و بەتەواوی واتا و هێز و توانامانەوە پشتگیری دەکەین، و خۆشمان لە ئەگەری پێویستی هەر جۆرە چلاکییەک لە ڕووی سەربازی و نیزامییەوە تەیار کردوە، و دەتوانین شان بە شانی هەموو تیکۆشەرانی حیزبی دیموکرات لە قوڵایی دڵی زێدی داگیرکراومان بوون و چالاکیمان هەبێت.
ئاواتەخوازین کە ڕاسان، ببێتە هۆکاری پێکهێنانی ‌هێزێکی سەرتاسەری پێشمەرگەی کوردستان، بۆ وەدەرنانی ئێرانی داگیرکەر لە سەر خاکی کوردستان.
سلاو لە هێزی پێشمەرگەی کوردستان بژی کوردو کوردستان مەرگ و نەمان بۆ داگیرکەرانی کوردستان
ئەنجومەنی سەرکردایەتی پارتی سەربەستیی کوردستان
18 ی پوشپەری 2718ی کوردی
#09-07-2018#

بە خۆشحاڵییەوە دوای ساڵانێکی زۆر چاوەروانی بۆ بەستنی کۆنگرەی نەتەوەی کورد.
بەڕێز کاک مەسعود بارزانی سەرۆکی هەرێمی کوردستان نامەیەکی بە پەلەی بۆ لایەنە کوردستانییەکان بڵاوکردەوەو، داوای کۆبوونەوەی بە پەلەی لایەنەکانی هەرچوارپارچەی کوردستان کرد، بۆ دروستکردنی لێژنەی ئامادەکاری کۆنگرە. کە بەخۆشیەوە ئەمرۆ 22-07-2013 لێژنەی ئامادەکاری کۆنگرە پێکهات.
وەک پارتی سەربەستیی کوردستان کە بەهۆکارێکی تەکنیکی نەمانتوانی لە کۆبوونەوەی یەکەم بۆ دیاریکردنی لێژنەی کۆنگرە بەشداری بکەین. بەڵام بەوپەری خۆشحاڵیەوەپشتیوانی خۆمان بۆ ئەو هەنگاوە نەتەوەیەی جەنابی سەرۆک بارزانی دەردەبرین، هەروەها پشتیوانی و ئامادەیی تەواوی خۆمان بۆ بەستنی کۆنگرەی نەتەوەیی کورد پێشان دەدەین.
هیواخوازین کە کۆنگرەی نەتەوەیی کورد بە زوترین کات دەستبەکار بێت و گەلی کوردستان خۆشحاڵ بکات. هەوەها ببێتە ڕێکخراوێکی گشتی هەمیشەیی کوردستان، هەروەک کۆمکاری عەرەبی بۆ عەرەبەکان، یەکێتی ئوروپا بۆ ئوروپیەکان و یەکێتی ئەفریقا بۆ ئەفریقیەکان و زۆر ڕێکخراوی دیکەی تایبەتی نەتەوەکانی جیهانی. ئەم کۆنگرەش ببێتە هۆکاری دروستبوونی ڕێکخراوێک کە ماڵی زیاد لە 50 ملۆین کورد و نەتەوەیی کورد لە ژێر چەتری ڕێکخراوێکی سەرتاسەری کۆکاتەوە.
بە هیوای بەرێوەچوونی هەرچی زووتری کۆنگرەی نەتەوەی کوردستان.
هەر شەکاوە بێت خەبات و یەکڕیزی نەتەوە سەربەرزەکەمان.
ئەنجومەنی سەرکردایەتی پارتی سەربەستیی کوردستان.
22-07-2013
www.psk2006.org ------- pskhewall@gmail.com

ناونیشان پەڕتووک: پێڕەو و پڕۆگرامی پارتی سەربەستیی کوردستان پەسندکراوی کۆنگرەی سێهەم
فێبرواری 2023ی میلادی
ڕەشەمێی 2722ی کوردی
[1]

خەڵکی نیشتیمان داگیرکراوی ڕۆژهەڵاتی نیشتیمان.
بنەماڵەی سەربەرزی شەهیدان، پێشمەرگە و ئەندامانی #حیزبی دێموکرات#، و گشت خەمخۆرانی یەکڕیزی و تەبایی گەلی کورد و کوردستان.
بەوپەڕێ خۆشحاڵییەوە ئەو خەم و نارەحاتیانەی کە لە ناخی ڕێکخستنەکانی هەردوو بەشی حیزبی دێموکرات، و لە ناخی گشت تاکێکی دڵسۆزی یەکڕیزی گەلدا بوو، لە پێوەندی بەو دابەشبوونەی کە لە ماوەی نزیک بە 16 ساڵ پێش هاتە ئاراوە، کۆتایی پێهات. ئەمڕۆ ئەو مزگێینیە ئاشتییە بڵاوکرایەوە.
وەک #پارتی سەربەستیی کوردستان#: کە پارتێکی نەتەوەیی و یەکڕیزییخوازی گەلەکەمان، کە ڕوو خەباتی ئەمڕۆیی بەرەو خۆرهەڵاتی نیشتیمانە. بە بیستنی ئەو هەواڵە شادیهێنەرە زۆر پێی خۆشحاڵ بووین. بەو بۆنە خۆشەوە: پیرۆزبایی سەرکردایەتی و گشت ئەندامانی پارتەکەمان! ئاراستەی تەکتەکی پێشمەرگە و کادیر و سەرکردایەتی، و بنەماڵەی سەربەرزی شەهیدان و بەندییە سیاسییەکانی، هەردوو بەشی بە یەکبوونەوەی حیزبی دیمۆکرات دەکەین. ئەو ڕۆژە خۆشە بە بەشێک لە مێژووی بیری نەتەوەیی گەلەکەمان دەزانین.
وەک پارتی سەربەستیی کوردستان، پێمانوایە بەو یەگرتنەوە مێژووییە: هەنگاوێکی دیکە لە بەرەو پێشچوونی خەباتی سەروەری یەکجاری نیشتیمانە داگیرکراوەکەمان نزیک دەبینەوە.
هیواخوازین ئەم بەیەکبوونەوەیە! کە ئاواتی هەموو کوردێکی خەمخۆرە: ئەوەندە ڕێشەکەی بە هێز و زانستیانە ئامادەکراێت، بە هەموو شێوەیەک ڕێگربێت لە دووپاتبوونەوەی مێژووی ناکۆکی و لەتبوون و دابڕان.
هەر لەم ڕۆژە خۆشەشدا: بە هەلی دەزانین کە پیڕۆزبایی77مین ساڵیادی دامەزراندنی حیزبی دیمۆکرات. ئاراستەی سەرکردایەتی و تەواوی پەیکەری ئەو ماڵە یەکگرتووەی حیزبەکەتان بکەین.
وەک پارتی سەربەستیی کوردستان داواکارین لەو پارت و لایەنە سیاسییانەی دیکەی ڕۆژهەڵاتی نیشتیمان، کە دابڕان لە ناو ڕێکخستنەکانیان ڕوویداوە. لەیەکخستنەوەی ماڵەکانیان پەلە بکەن، و ئەوانیش ئەو مزگێنییە خۆشە بە خەڵکی دڵ ڕەنجاو و نیشتیمان داگیرکراوی ڕۆژهەڵاتی کوردستان، و ڕێکخستەکانی خۆیان بگەیەنن.
جارێکی دیکە پیڕۆزبای و خۆشحاڵی خۆمان لەو پێوەندییەدا ڕادەگەیەنین.
ئەنجوومەنی سەرکردایەتی پارتی سەربەستیی کوردستان [1]
30 ی گەلاوێژی 2722 بەرامبەر بە 21-08-2022 ی زاینی

چوار لاوی دیکەی کوردستان لە لایەن ئێرانی داگیرکەرەوە لە سێدارەدران، بەیاننامەی پارتی سەربەستیی کوردستان،
Four Kurdish youths executed by occupying Iran, statement by Party Serbesti Kurdistan P S K

بە داخەوە بەرەبەیانی ئەمڕۆ دووشەممە 9ی ڕێبەندانی2723ی کوردی، 29/ 1 / 2024ی زاینی، دیسانەوە ڕێژیمی ئێرانی داگیرکەری کوردستان، چوار بەندکراوی سیاسی لە ڕۆڵەکانی نەتەوەی نیشتیمانداگیرکراوی کورد، بە ناوەکانی موحسین مەزڵووم 27ساڵ، محەممەد فەرامەرزی 28ساڵ، وەفا ئازەربار 26ساڵ و پژمان فاتیحی 29ساڵ، لە بەندیخانەی قزڵحیساری شاری کەرەج لە سێدارەدا.
ئەنجوومەنی سەرکردایەتی پارتی سەربەستیی کوردستان، بە تووندی ئیدانەی ئەم جینایەتە بەردەوامەی کوردکووژی ڕێژیمی کۆماری ئیسلامی ئێرانی داگیرکەر دەکات. هەر لە پێوەندی لە بەرامبەر لە سێدارەدان و کووشتن و بەندیکردنی ڕؤلەکانی نەتەوەی کورد و کوردستان، داوای هەڵویستی بە کردەوەیی لە گشت ڕێکخراو وڵاتانی خاوەن دەسەڵات و بڕیار لە ئاست سیاسەتی نێودەوڵەتی دەکەین.
لە ئاست ئەم کارەساتە خەماوییەی ئەمڕۆ و سەدان کارەساتی دیکەی چاوەڕوانکراو بۆ ڕۆژ و مانگەکانی داهاتوومان، پێویستە پارت و لایەنە سیاسییەکانی ڕۆژهەڵاتی نیشتمان، بە یەکدەنگی و یەکگرووپی، بکەونە جووڵەی سیاسی و دێپڵۆماسی نێودەوڵەتی، بۆ بەرەنگاربوونەوەی جینایەتە بەردەوامەکانی ئەم ڕێژیمە بەرامبەر بە نەتەوەی کورد.
پارتی سەربەستیی کوردستان، خەم و پەژارەو سەرەخۆشی ئاراستەی ئەندامانی بنەماڵەی ئەو چوار شەهیدە سەربەرزەی نیشتیمان دەکات. هەروەها هاوخەمی ئاراستەی سەرکردایەتی و هاوبیر و هاوسەنگەرانیان لە ڕێزەکانی کۆمەڵە دەکەین.
لە ڕوانگەی ئێمەوە وەک پارتی سەربەستیی کوردستان، هەروەها هەموو ڕووداو بەڵگەکانی نزیک بە سەدساڵی پێشوو! بەردەوام وەبیرمان دێنێتەوە، کە تاکە ڕێگەی ڕزگاریی لە ژێر چنگی داگیرکەران و پاراستنی گیانی ڕۆڵەکانی و نیشتیمانەکەمان، خەباتە لە پێناو سەربەخۆیی یەکجاریی کوردستان.
ئەنجوومەنی سەرکردایەتی پارتی سەربەستیی کوردستان.
9ی ڕێبەندانی2723ی کوردی، بەرامبەر بە 29/1/2024ی زاینی.

=KTML_Bold=تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!=KTML_End= [1]

#ڕێکخراوی کوردیپێدیا#
03-12-2017

کۆرو کۆمەڵانی مرۆڤدۆستی جیهانی
خەڵکی وڵاتداگیرکراوی کوردستان
بە هۆی هێرشی گروپی تروریستی داعشەوە زیاد لە 200 هەزار کوردی دەڤەری شنگاڵ و دەوروبەر ئاوارەی شاخەکانی شنگاڵ و گوند و ناوچەکانی دیکەی باشوری کوردستان بوون. بەشێکی زۆر لە شاخەکانی شینگاڵ گیریان کردوە، بە داخەوە بە هۆی دەست پێڕانەگەیشتنی هاوکاری خۆراک و دارو پێداویستی دیکە، بە دەیان کەس کە زۆربەیان مناڵ و پەککەوتەن بە هۆی برسێتی و نەخۆشییەوە کۆچی دواییان کردوە. لە ڕێگەی ڕاگەیاندنەکانیشەوە باس لە ڕفاندنی سەدانی ژنی یەزیدی دەکرێت.

وەک پارتی سەربەستیی کوردستان وێرای سەرەخۆشی خۆمان لە کەس و کاری قوربانیانی ئەم کارەساتە، داوا لە گشت ڕێکخراوە مرۆڤدۆستەکانی جیهانی دەکەین، کە بە پەلە بە هانای کوردانی یەزیدی دەڤەری شنگاڵەوە بچن. و لەو کارەساتە دڵتەزێنانە نەجاتیان بدەن، بە تایبەت ئەوانەی کە لە شاخەکانەوە گیریان خواردوە، هەوڵیش بدرێت بۆ ڕزگاری ئەو ژنانەی کە دەستبەسەرکراون.
هەر لەو پێوەندییەدا داوای یەکریزی ویەکگرتووی زیاتری گشت کوردستانیان دەکەین، کە پێکەوە لە هەموو بەشەکانی کوردستان هێزی هاوبەش پێکبێنن بۆ پاراستنی شنگاڵ و گشت سنوورەکانی ئیستای باشوری کوردستان. واتە ئەو بەشەی کوردستان کە بووەتە ڕووناکی و دڵخۆشی هەموو کوردێکی ڕۆژهەڵاتی ناڤین و جیهان. جێێ خۆیەتی کە دەستخۆشی ئاراستەی هێزەکانی پێشمەرگەی باشوری کوردستان و یەکینەکانی پاراستنی گەل بکەین، کە لە ناوچەکانی ڕەبیعە یەکگرتووانە تروریستان دەردەپەرێنن.

بە ناوی ئەنجومەنی سەرکردایەتی پارتی سەربەستیی کوردستان داوا لە گشت کوردانی خۆرهەڵاتی کوردستانەکەمان دەکەین، بە تایبەت سەرمایەداران کە لە ناوخۆ و دەرەوەی وڵاتن، هاوکاریی دارایی و مرۆیی خۆیان بگەیەنە خوشک و برایانی کوردی یەزیدیمان لە شنگاڵ و ناوچەکانی دیکە، هەروەها هاوکاریش کۆکەنەوە بۆ پێشمەرگەکانی پاراستنی کوردستان لە گشت ناوچەکانی مەترسی لەسەر.


گەلی هەمیشە خۆراگری کوردستان: داواتان لێدەکەین کە بە هاوکاری و پشتیگری هەموو ئێوەی نەتەوەیی و نیشتیمانپەروەر: بە نەیارانی کوردستان زیاتر بسەڵمێنین، کە دوژمنان و داگیرکەرانی کوردستان ناتوانن جیاوازی لە نێوان پێکهاتەکانی کوردستان دروستبکەن، هەر دەم گەلی کورد پشتیوانی یەکتربوون و بەردەوامیش لە پێناو پاراستنی کوردستان هاوکاری یەکتر دەبن.

کوردستانیانی ڕزگاریخواز: هەروەک ئاگادارن کە لە ماوەی 2مانگی ڕابوردودا باس و خواسی سەربەخۆیی کوردستان لە ساڵان زیاتر سەریهەڵدابوو، ئەمەش بووە هۆکاری نیگرانی بۆ وڵاتانی داگیرکەر و نەیارانی کوردستان. هەر بۆیەش پێمان وایە دەستی تایبەتی وگەلەکۆمەی چەند لایەنە لە پشت هێرشەکەی گروپی تروریستی داعش بووە، بۆ سەر ناوچەکانی شنگاڵ و دەوروبەر، بۆ ئەوەی بیرۆکەی سەربەخۆیی خوازی لە کوردستان لاواز بکەن.
پارتی سەربەستیی کوردستان، جارێکی دیکە پشتیوانی بۆ پاراستنی دەسکەوتەکانی باشوری کوردستان و خەڵکی لێقەوماوی شنگاڵ دەردەبرین. دەستخۆشانە ئاراستەی گشت پێشمەرگەکانی کوردستان دەکەین کە ئەمرۆ شێلگیرانە لە سەنگەری بەرگریدان.
هیوادارین پرۆسەی سەربەخۆیی کوردستان هەر درێژەی هەبێت و ئەمجۆرە پلانانە هیچ کاریگەری لەسەر ئەو پرۆسە پیرۆزە نەبێت.

ئەنجومەنی سەرکردایەتی پارتی سەربەستیی کوردستان
14ی گەلاوێژی 2714ی کوردی بەرامبەر بە 05-08-2014 زاینی