ڕۆژی 17ی خەرمانی ئەمساڵ (8ی سیپتامبری 2018) ڕژیمی جینایەتکاری کۆماری ئیسلامی لاپەڕەیەکی ڕەشی دیکەی خستە سەر مێژووی پڕ لە تاوان و دڕندەیی خۆی بەرامبەر گەلی کورد. ڕاست لە بەرەبەیانی ئەو شەوە‌دا کە جەللادەکانی ئەو ڕژیمە،3 بەندکراوی سیاسیی کورد بە ناوەکانی زانیار و لوقمان مورادی و ڕامین حسێن پەناهییان لە دار دا، سوپای پاسداران بنکەکانی حیزبی دیموکراتی کوردستان و حیزبی دیموکراتی کوردستانی ئێرانیان لە نزیک شاری #کۆیە# دایە بەر هێرشی مووشەکی. لە ئاکامی هێرشی مووشەکیی سوپای پاسداران، 13 کەس لە ئەندامانی ڕێبەری و کادر و
#پێشمەرگە#کانی حیزبی دیموکراتی کوردستان و، دوو کەس لە پێشمەرگەکانی حیزبی دیموکراتی کوردستانی ئێران شەهید بوون. نزیکەی 40 کەس لە تێکۆشەران و بنەماڵەکانی کوردی ڕۆژهەڵات بە هۆی ئەو هێرشە مووشەکییە، بریندار بوون کە بە داخەوە بارودۆخی ژمارەیەکیان ناجێگیرە.
ناوەندی هاوکاریی حیزبەکانی کوردستانی ئێران تاوانی دڕندانەی ئێعدامی 3 لاوی ئازادیخوازی کورد، شەهیدان ڕامین حسێن پەناهی، زانیار و لوقمان مورادی، هەروەها هێرشی مووشەکی و کۆمەڵکوژانەی سوپای پاسدارانی کۆماری ئیسلامی بۆ سەر پلینۆمی کومیتەی ناوەندیی حدک بە توندی مەحکووم دەکا. ئێمە وێڕای هاوخەمیی قووڵمان لە گەڵ بنەماڵە و هاوسەنگەرانی شەهیدەکان، چاکبوونەوەی هەرچی زووتری بریندارەکانی ئەو هێرشە دڕندانەیە بە ئاوات دەخوازین.
تیرۆر، دەستدرێژی و تاوانخوڵقێنیی کۆماری ئیسلامیی ئێران بەرامبەر بە گەلی کورد و ڕۆڵە ئازادیخوازەکانی نەتەوەکەمان، بەردەوام و لە زیادبووندا دەبێ و ناوەندی هاوکاریی بە ئەرکی خۆی زانیوە پێش ڕوودانی ئەم کارەساتانە لە ڕێکەوتی 27 جوولای بە نووسینی نامەیەکی سەرئاوەڵا هەموو لایەنە پێوەندیدارەکان و ڕێکخراوە نێودەوڵەتییەکانی مافی مرۆڤ ئاگادار بکات.
ئەگەر خەڵکی ڕۆژهەڵاتی کوردستان و هیزە سیاسییەکانیان بە هەڵوێستێکی شیاو وەڵامێکی ددانشکێن بەرەوڕووی ئەو ڕێژیمە نەبنەوە.
ئێمە لە ناوەندی هاوکاریی حیزبەکانی کوردستانی ئێران بە سەرنجدان بەو ڕاستییە، داوا لە خەڵکی خۆڕاگر و بە هەڵوێستی کوردستان دەکەین ڕۆژی دووشەممەی داهاتوو، 19ی خەرمانان بە مانگرتنی گشتی، بێزاریی خۆیان لە نوێترین تاوانەکانی کۆماری ئیسلامیی ئێران ڕابگەیەنن. جارێکی دیکە بە نەهاتنەدەر لە ماڵەکانتان، چۆڵکردنی شەقامەکان و داخستنی دوکان و بازاڕ، نمایشێکی پڕ شکۆ لە بێزاربوون و نا گوتنی خۆتان بەو ڕژیمە خوێنڕێژ و دژە کوردە، نیشان بدەنەوە. لە هەموو چالاکێکی ئازادیخوازی کورد لە نێوخۆی کوردستان و دەرەوەی وڵاتیش، داوا و چاوەڕوانیمان ئەوەیە بە هەموو توانای خۆیانەوە پشتی ئەم بانگەوازە بگرن و هەوڵی سەرخستنی بدەن.
ڕسوایی و نەمان بۆ ڕێژیمی تیرۆر و سەرکوت و تاوان، کۆماری ئیسلامیی ئێران
سەرکەوێ ئیرادەی شۆڕشگێڕانەی گەلی کورد
ناوەندی هاوکاریی حیزبەکانی کوردستانی ئێران
پێکهاتوو لە:
- کۆمەڵەی شۆڕشگێڕی زەحمەتکێشانی کوردستانی ئێران
- کۆمەڵەی زەحمەتکێشانی کوردستان
- سازمانی خەباتی کوردستانی ئێران
- حیزبی دیموکراتی کوردستانی ئێران
- حیزبی دیموکراتی کوردستان
18ی خەرمانانی 1397
#09-09-2018#

ماوەی نزیک بە هەفتەیەکە شۆفیری ماشینە بارهەڵگرەکان لە چەندین شاری ئێران و کوردستان لەوانە مەشهەد، هەمەدان، بوشێهر، ئیسفەهان، شیراز، #سەقز#، #کرماشان#، #دیواندەرە# و... بۆ دەربڕینی ناڕەزاییەتیی بەرامبەر بە جێبەجێ نەکردنی خواستە پیشەیییەکانیان مانیان گرتووە و سەرەڕای بەڵێنە بێبنەماکانی کاربەدەستانی کۆماری ئیسلامی بۆ جێبەجێکردنی داواکارییەکانیان، مانگرتنەکان لە چەندین شاری جۆراوجۆر بەردەوامە.
هەرچەند مانگرتنی شۆفیری ماشینە بارهەڵگرەکان داواکارییەکی پیشەیییە، بەڵام دەرهاویشتە‌ و بەشێکە لەو قەیرانە ئابورییەی کە دەسەڵاتدارانی ڕێژیم بۆ خەڵکی ئێرانیان خولقاندووە، خەڵک بۆ بەدەستهێنانی بژیوی ژیانی ڕۆژانەیان تووشی چەندین کێشە‌ و گرفت دەبنەوە. ئەمەش لە کاتێکدایە کە کۆماری ئیسلامی ساڵانە چەندین میلیارد دۆلار خەرجی گرووپە توندڕەو و تێرۆریستییەکان لە وڵاتانی جۆراوجۆر دەکات.
ئێمە وێڕای دەربڕینی پشتیوانیی خۆمان لە مانگرتنی بەربڵاوی شۆفیری ماشینە بارهەڵگرەکان لە شارەکانی ئێران و کوردستان، هەروەها مانگرتن‌ و ناڕەزایی چین و توێژە جۆراجۆرەکانی کۆمەڵگای ئێران، ‌خوازیاری دەستەبەربوون و وەدیهاتنی داواکارییە ڕەواکانیانین.
وڵام نەدانەوە بە داخوازیی شۆفیرە مانگرتووەکان، نمونەیەکە لە پشتگوێخستنی ژیانی خەڵک لە لایەن بەرپرسانی ڕێژیم ئیسلامی.
سەرکەوتوو بێت مانگرتنی شۆفیری ماشینە بارهەڵگرەکان لە شارەکانی ئێران و کوردستان، بڕووخێ ڕێژیمی کۆماری ئیسلامیی ئێران.
ناوەندی هاوکاریی حیزبەکانی کوردستانی ئێران
5ی جۆزەردانی 1397ی هەتاوی
#26-05-2018#

بەڕێز کاک #نێچیرڤان بارزانی# سەرۆکی هەرێمی کوردستان
بە بۆنەی هەڵبژاردنی بەڕێزتانەوە بۆ پۆستی سەرۆکی هەرێمی کوردستان لەلایەن هەموو حیزبەکانی بەشدار لە ناوەندی هاوکاریی حیزبەکانی کوردستانی ئێران پڕ بە دڵ پیرۆزباییتان لێدەکەین.
بە لەبەرچاوگرتنی ئەزمون و لێهاتوویی جەنابتان لە ئیدارەی حکومەت و دڵسۆزیتان بۆ گەل و نیشتمان، هیوادارین بە هەوڵەکانی ئێوە ژیانی خەڵک لە باشوری کوردستان ڕوولەباشبون بکات و وەک هەمیشە ببنە پاڵپشت بۆ هەموو کوردان لە هەر چوارپارچەی کوردستان.
جارێکی دیکە پیرۆزبایتان لێدەکەین و هیوای سەرکەوتن بۆ ئێوە و دۆزی ڕەوای کورد دەخوازین.
ناوەندی هاوکاریی حیزبەکانی کوردستانی ئێران
8ی جۆزەردانی 1398ی هەتاوی
#29-05-2019#

هاونیشتمانیانی خۆشەویست!
گەلانی ئازادیخوازی ئێران!
خەڵکی خەباتگێڕ و مافخوازی کورد!
شۆڕشی ڕێبەندانی 1357 دەنگی ناڕەزایەتیی پەنگخواردووی گەلانی ئێران لە بەرانبەر دیکتاتۆریی پاشایەتیی بنەماڵەی پەهلەوی و درێژەی پرۆسەی خەبات بۆ ئازادی و دێموکراسی و ڕزگاربوون لە چنگی دیکتاتۆری بوو.
لە ماوەی زیاتر لە سەد ساڵی ڕابردوودا و بە بڵاوبوونەوەی بەها مرۆییەکانی وەک ئازادی، دادپەروەری و دێموکراسی بە هەموو جیهاندا، گەلانی ئێران بە وەڕێخستنی چەندین بزووتنەوە و شۆڕشی گەورە، خەبات و قوربانیدانێکی کەم وێنەیان بۆ جێگیرکردنی ئەو چەمکە مرۆییانە و ڕزگاربوون لە چنگ ڕێژیمە دیکتاتۆرەکان و دەسەڵاتدارە سەرەڕۆکانی زاڵ بەسەر چارەنووسیاندا بەڕێوە بردووە، بەڵام مخابن تێکڕای ئەو هەموو هەوڵ و خەبات و قوربانیدانە تا ئێستا نەیتوانیوە ئامانجە بەرزەکانی شۆڕشی گەلانی ئێران لە ڕێبەندانی 57 و چەندین بزووتنەوە و ڕاپەڕینی دیکە لەو وڵاتەدا دەستەبەر بکات و ئازادی و دێموکراسی و دادپەروەری و مافە ڕەواکانی دیکەی نەتەوەکانی ئێران لەلایەن کۆمەڵێک دەسەڵاتداری سەرەڕۆی هەڵگری بیری شۆڤینیزم و کۆنەپەرەستی و دیکتاتۆرییەوە زەوت کراون و بەرهەمی خوێن و خەباتی هەزاران مرۆڤی تێکۆشەر و ئازادیخواز بووەتە قوربانیی پیلانە نگریسەکانی دەسەڵاتدارانی هەردوو ڕێژیمی پاشایەتی و کۆماری ئیسلامی.
شۆڕشی ساڵی 57ی گەلانی ئێران کە لووتکەی سەرکەوتنی 22ی ڕێبەندانە، تەقینەوەی گڕکانی ناڕەزایەتیی گەلانی ماف پێشیلکراوی ئێران لە بەرانبەر زوڵم و دیکتاتۆریی بنەماڵەی پەهلەوی بوو، هەر بۆیە ئامانجی ئەو خەڵکە ڕاپەڕیوە لە شۆڕش و ڕاپەڕین نەیدەتوانی شتێک بەدەر لە بەدیهێنانی ئازادی و دێموکراسی و دادپەروەری بێت. بەڵام مخابن لە نیوەی ڕێگای شۆڕشدا خومەینی و هاوبیرانی بە پیلانێکی ورد و ئامانجدار کەڵکی خراپیان لە نەبوونی ڕێبەرایەتییەکی دێموکراتیکی تۆکمە و ئاڵترناتیڤێکی بەهێزی هەڵگری ئامانج و بەهاکانی شۆڕش وەرگرت و هێژمۆنی و دەسەڵاتی ڕەشی خۆیان بەسەر شۆڕشێکدا سەپاند کە بەرهەمی ماندووبوون و بەرامەی ڕەنج و خەباتی خەڵک و هەموو چین و توێژە ئازاردیتووەکانی کۆمەڵگای ئێران بوو.
کەسایەتیی خومەینی وەکوو ڕێبەر و دامەزرێنەری ئەو ڕێژیمە و تاڵانکەری بەهاکان و ئامانجە بەرزەکانی شۆڕشی 1357، ئاوێنەی باڵانوێنی ئیدئۆلۆژی و ئامانجە دژەمرۆییەکانی سیستمی ویلایەتی فەقیه و هێمای ڕق لە دڵی و کۆنەپەرەستیی هەڵگرانی ئەو بیر و باوەڕە شوومە بوو کە بۆ گەلانی ئێران پەیامهێنەری مەرگ و کوێرەوەری و بەجێمان لە کاروانی پێشکەوتن و شارستانییەتی سەردەم بوو.
هەر بۆیە لە ماوەی زیاتر لە چوار دەیە دەسەڵاتداریی ئەو ڕیژیمەدا حافزەی مێژوویی گەلانی ئێران بەگشتی و نەتەوەی کورد بەتایبەتی بە کۆمەڵێک بیرەوەریی تاڵی وەک هێرشی دڕندانە بۆ سەر کوردستان، ئەهواز، بەلووچستان، تورکەمەنسەحرا، هێرش بۆ سەر باڵوێزخانەکان، تیرۆریزمی دەوڵەتی لە نێوخۆ و دەرەوەی وڵات، کۆمەڵکوژیی خەڵک و زیندانییانی سیاسی، کوشتاری جیابیران، کاولکاری و ئاژاوەگێڕی لە وڵاتانی دەوروبەردا، شەڕی کاولکەری 8 ساڵە، دزین و تاڵانکردنی سامانە گشتییەکانی وڵات، گەندەڵیی بەربڵاو، هەژاری، بێکاری، پاکتاوی فەرهەنگی و ئاسیمیلاسیۆن، تەریککەوتنەوە لە کۆمەڵگای نێودەوڵەتیدا، سەرکوت و داپڵۆسین و هەڵاواردنی سیستماتیک، ستەم و چەوسانەوەی نەتەوایەتی و ڕەگەزی و چینایەتی، سووکایەتی بە کەسایەتی و کەرامەتی ژن، پەرەدان بە کولتووری مەرگخوازی، گەمارۆی ئابووری و گرانی و بێ داهاتی، کاولکردنی ژینگە و دەیان خەساری کۆمەڵایەتی و خەفەقانی سیاسیی تاقەتپڕووکێن ئاخنراوە.
ئەوانە تەنیا مشتێک لە خەرمانی دیارییەکانی ئەو ڕێژیمە ئازادیکوژە بۆ گەلانی ئێران بەگشتی و گەلی کورد بەتایبەتی بووە.
لە ماوەی ئەو ساڵانەدا خەڵکی کوردستان هەمیشە لە ڕیزی پێشەوەی خەبات بۆ دابینبوونی ئازادی و دادپەروەری و مافە نەتەوایەتییەکانیان وەکوو قەڵایەکی لەگیراننەهاتوو دژ بە تەوژمی سەرکوت و دیکتاتۆری و داگیرکاریی دەسەڵاتدارانی تاران ڕاوەستاون و زۆرترین قوربانییان لە سەنگەری خەبات بۆ بەچۆکداهێنانی ڕێژیمدا پێشکەش بە بارەگای ئازادی و سەروەریی نیشتمانی کردووە.
لە چەند ساڵی ڕابردوودا درێژەی سیاسەتەکانی ڕێژیم بە جۆرێک تەنگی بە هەموو چین و توێژەکانی دیکەی کۆمەڵگەی ئێرانیش هەڵچنیوە کە ئیدی دەتوانین بڵێین خەبات بۆ ڕووخاندنی ڕێژیم و وەلانانی یەکجاریی ئیدئۆلۆژییە سەدە نێوەڕاستییەکەی بووەتە داخوازیی گەلانی دیکەی ئێرانیش و دروشمەکانی خۆپیشاندەرانی خەزەڵوەری خوێناوی و بەفرانباری ئەمساڵ دەربڕی ئەو ڕاستییەن کە ڕێژیم لەنێو بیر و باوەڕەکانی خەڵکدا ڕووخاوە و هیچ ڕەوایی و ئاسۆیەکی مانەوەی بۆ بەدی ناکرێت.
چل و یەک ساڵ پاش ئەو شۆڕشە، پێداگریی خەڵک لەسەر ئامانجە بە تاڵانبراوەکانی شۆڕش ئەوەمان پێ دەڵێت کە شۆڕش بە لاڕێدا براوە و نەیتوانیوە ئامانجی ڕاستەقینەی خۆی بپێکێت و لە ڕاستیدا خەبات بۆ بەدیهێنانی ئەو ئامانجانە بە گوڕوتێنێکی زیاترەوە بەردەوامە.
ناوەندی هاوکاریی حیزبەکانی کوردستانی ئێران لە بەرەبەری 22ی ڕێبەندان، 41ەمین ساڵوەگەڕی سەرکەوتنی شۆڕشی گەلانی ئێران بەسەر دیکتاتۆریی پەهلەویدا، جارێکی دیکە دروشم و ئامانجە ڕەوا و دێموکراتیکەکانی هەڵقوڵاوی ناخی ئەو شۆڕشە واتە ئازادی، دێموکراسی، دادپەروەری و مافە نەتەوایەتییەکانی گەلانی ئێران وە بیر هەموان دێنێتەوە و جەخت لەسەر ئەو ڕاستییە دەکاتەوە کە تا کاتی دابینبوونی ئەو ئامانجانە تێکۆشان و خەباتی بێ پسانەوەی گەلانی ئێران بەگشتی و بزووتنەوە و خەڵکی کوردستان بەتایبەتی بۆ بەدیهێنانیان بەردەوام دەبێت و شانبەشانی هێزە سیاسی و پێشکەوتنخوازەکانی سەرانسەری ئێران بۆ بەدیهێنانی ئەو ئامانجە بەرزانە لە خەبات بەردەوام دەبێت.
سەرکەوێ خەباتی گەلانی ئێران دژ بە دیکتاتۆری و ستەم و کۆنەپەرەستی
سەرکەوێ خەباتی مافخوازانەی گەلی کورد لە پێناوی وەدیهێنانی ئامانجە سیاسی و نەتەوەییەکانی
بڕووخێت ڕێژیمی کۆنەپەرەستی کۆماری ئیسلامی
ناوەندی هاوکاریی حیزبەکانی کوردستانی ئێران
21ی ڕێبەندانی 1398ی هەتاوی
10ی فێڤرییەی 2020ی زایینی
⚠️ تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!

کۆمەڵانی خەڵکی خەباتگێڕی کوردستان
جارێکی دیکە لە کاتێکدا بەرەوپیری نەورۆز، جێژنی نەتەوەیی کورد و وەرزی ژیانەوەی سروشت دەچینەوە کە وڵاتەکەمان ئەگەرچی هێشتا لە ژێر چەپۆکی دەسەڵاتێکی تاوانکاری خولقێنەری کارەسات و زەبروزەنگ و دیکتاتۆریدایە، بەڵام هاوکات لاپەڕەیەکی زێڕینی دیکە لە مێژووی خەبات و ڕاپەڕین و بەرەنگاریی گەلانی ستەملێکراوی ئێران و کوردستان لە بەرانبەر ئەو سیستمە ئازادیکۆژەدا هەڵدرایەوە.
ساڵێک کە تێپەڕی، درێژەی چوار دەیە داپڵۆساندن و چەوساندنەوە و کەمتەرخەمی بەرانبەر بە ماف و داخوازییە مرۆییەکانی گەلانی ئێران لە لایەن کۆماری ئیسلامییەوە بوو. لەم ساڵەدا شاهیدی زنجیرەیەک ئاڵوگۆڕی نێوخۆیی و دەرەکی بووین کە لە هەموویاندا جەوهەری دژەمرۆیی ئەو ڕێژیمە زیاتر لە جاران بۆ خەڵکی نێوخۆ و بیروڕای گشتیی گەلانی ناوچەکە ئاشکرا بوو.
لە ساڵی ڕابردوودا سەرکوتەکان، پێشێلکارییەکان و دڕندایەتیی هێزی سەرکوتکەر نەک هەر نەیتوانی تۆزقاڵێک لە ئیرادەی شۆڕشگێڕی و خەباتی بێ وچانی کرێکارانی مافخواز و پێشەنگایەتیی ژنانی یەکسانیخوازی وڵاتەکەمان لە ڕەوتی خەبات و تێکۆشاندا کەم بکاتەوە، بەڵکوو بوێری و ئازایەتیی ئەوان و یەکڕیزیی هەموو چین و توێژە ستەملێکراوەکانی دیکەی کۆمەڵگا زیاتر لە جاران لە گۆڕەپانی کردەوەدا سەلمێنرا.
گرینگترین ڕووداوی ئەم ساڵ بەربەرەکانێی شکۆداری خەڵک و تێپەڕینیان لە هێڵە سوورەکانی کۆماری ئیسلامی بوو کە لە ڕاپەڕینە جەماوەرییەکانی خەزەڵوەر و بەفرانباردا بە شێوەیەکی تایبەتی ڕەنگی دایەوە و لەرزۆکیی کۆڵەکەکانی ڕەوایی و هێزی کۆماری ئیسلامیی زیاتر لە جاران دەرخست. نەتەوەی کورد وەک هەمیشە لە ڕیزی پێشەوەی ئەو خەباتە ئازادیخوازانەیەدا حەماسەیەکی مێژوویی دیکەی خولقاند و بەتایبەتی لە شارەکانی کرماشان، مەریوان، جوانڕۆ و بۆکان ڕاپەڕینی ئازایانەی خەڵک، ڕێژیمی تووشی شڵەژانێکی کەموێنە کرد.
ئەو ڕاپەڕینە لەگەڵ سەرکوتی خوێناوی و بێبەزەییانەی ڕێژیم بەرەوڕوو بوو و هەزاران کەس لە ئازاترین ڕۆڵەکانی گەلانی ئێران و گەلی کورد بە تایبەتی لە لایەن هێزە دژی گەلییەکانەوە کوژران و بریندار بوون و هەزاران کەسی دیکەش بە شیوەیەکی دڕندانە ڕفێنران و لە چاڵە ڕەشەکانی ڕیژیمدا کەوتنە ژێر سووکایەتی و ئەشکەنجەی جەستەیی و دەروونی و گوشار و هەڕەشە بۆ سەر بنەماڵەکانیان هێشتا درێژەی هەیە.
بەڵام ڕێژیم بە پیچەوانەی ئەوەی کە بە سەرکوتی خەڵک دەیهەوێ خۆی وەکوو دەسەڵاتێکی بەهێز نیشان بدات، لە هەر دوو ئاستی نێوخۆیی و دەرەکیدا دەستەوەستانی و بێ توانایی خۆی لە چارەسەری کێشەکاندا بە تەواوی دەرخست.
لە لایەکەوە ئابووریی ئێران کە پێشتر بەهۆی دەستوەردانی حکوومەت و دامەزراوەکانی ژێر فەرمانی ڕێبەر و گەندەڵیی و تاڵانی سەرمایەکانی وڵات لە لایەن کاربەدەستانی باڵای ڕێژیمەوە لە دۆخێکی شپرزەدا بوو، پاش هەڵوەشانەوەی ڕێککەوتنی ناوکی کە لێکەوتەی ڕاستەوخۆی سیاسەتەکانی خودی ڕێژیم بوو، لەوەش زیاتر تووشی داتەپین و کورتهێنانی بوودجە بووە کە ئەوەش لە تەنیشت تێچووی سەرسووڕهێنەری ئاژاوەگێڕییە نێودەوڵەتییەکانیان، تاڵانچیەتیی بەرپرسان، نادادپەروەریی کۆمەڵایەتی، گرانی، دابەزینی نرخی تمەن، بێکاری، هەژاری و... دەسەڵاتدارانی تارانی تووشی قەیرانێکی پڕووکێنەر کردووە کە لێهاتوویی و زانستی چارەسەری ئەو قەیرانەیان نیە.
لە لایەکی دیکەوە، لە وڵاتانی ناوچەدا خەڵک زیاتر لە ڕابردوو، لە سیاسەتی داگیرکارانە و ناوەرۆکی کاولکەر و دژەمرۆیی کۆماری ئیسلامی تێگەیشتوون و ئیدئۆلۆژیی ئایینیی ئەو ڕێژیمە چیدی توانای ڕاکێشانی سەرنجی خەڵک و فریودانی بیروڕای گشتیی گەلانی ناوچەی نەماوە، هەربۆیە لە لوبنانەوە تا سووریە و بەتایبەتی شەقامی شارە شیعەنشینەکانی عێراق شاهیدی داڕمانی ڕەوایی ئیدئۆلۆژیی کۆماری ئیسلامی بووین کە پێشتر لە ژێر دەمامکی پاراستنی شوێنە پیرۆزە ئایینییەکان و شەڕی تیرۆردا پێگەیەکی لە نێو بەشێک لە خەڵکی ئەو وڵاتانە بۆ خۆی دەستەبەر کردبوو، بەڵام ئێستا لە ڕووی ئیدئۆلۆژیکەوە بە تەواوی ڕەنج بە خەسار و مایەپووچ دەرچووە.
هەر لەو پێوەندییەدا کوژرانی قاسم سلێمانی، فەرماندەی سپای تیرۆریستیی قودس و بەڕێوەبەری سەرەکیی پیلانەکانی ڕێژیم لە ناوچەکەدا لە لایەن ئەمریکاوە، بەرهەمێکی دیکەی دەستێوەردانەکانی کۆماری ئیسلامی لە ناوچەکەدا بوو کە لەگەڵ پێشوازیی گەلانی ئازاردیتووی ناوچەکەش بەرەوڕوو بوو. هەر لە درێژەی ئاڵوگۆڕەکانی پێوەندیدار بەو ڕووداوەدا یەکەی مووشەکیی سپای پاسداران فڕۆکەیەکی نەفەرهەڵگری ئۆکراینیی کردە ئامانج کە لە ئاکامدا دەیان کەسی بێ تاوان گیانیان لە دەست دا و قەیرانێکی نێوخۆیی و گوشارێکی نێودەوڵەتیی دیکەی خستە سەر گەمارۆ و گوشارەکانی پێشوو.
لە دژکردەوە بەو ڕووداوە و چلەی گیانبەختکردوانی ڕاپەڕینی خوێناویی خەزەڵوەردا شەقام و زانکۆکانی ئێران بۆ جارێکی دیکە بوونە مەکۆی ناڕەزایەتی و دروشمدان دژ بە تەواویەتی پێکهاتەی ڕێژیم و لە کوورەی ڕقی جەماوەردا هێما و وێنەکانی ڕێبەرانی ڕێژیم ئاگریان تێ بەردرا.
هەر لەم ساڵەدا شانۆی هەڵبژاردنی مەجلیسی شۆرای ئیسلامیی ڕێژیم لە کاتێکدا بەڕێوە چوو کە بۆ یەکەمجار بایکۆتێکی بەربڵاو سەرانسەری ناوچەکانی ئێران و کوردستانی گرتەوە، بە جۆرێک کە تەنانەت لە ئامارەکانی خودی ڕێژیمیشدا نەیانتوانی نکۆڵی لە سەرکەوتنی بایکۆت و تەریککەوتوویی ڕێژیم لە نیو خەڵکدا بکەن.
لە بەهار و زستانی ئەمساڵدا بەهۆی شەپۆلی باران بارین، لافاوێکی ماڵوێرانکەر ناوچەکانی ئێران و کوردستانی گرتەوە کە بەو هۆیەوە زیانێکی گیانی و ماڵیی زۆر لە خەڵک کەوت و ژینگەی وڵات خاپوور کرا. لەو نێوانەدا بۆ جارێکی دیکەش دەستەوەستانی و بێ مودیریەتیی ڕێژیم دەرکەوت و سەلمێنرایەوە کە نە ئیرادە و نە توانای بەرەنگاربوونەوەی ئەو جۆرە کارەساتانەیان تێدا نیە و خەڵک لە بەرانبەر کاولکاریی ڕووداوە سروشتییەکاندا - کە بەشێک لەوانەش کاریگەریی سیاسەتی دەسەڵاتدارانیان لە سەرە- ناتوانن پشت بە یارمەتی و پشتیوانیی ڕێژیم ببەستن، ڕێژیمێک کە نە خۆی توانای پاراستنی خەڵکی تێدایە و نە لووتبەرزییەکانیان ڕێگە دەدات داوای یارمەتی لە کۆمەڵگای نێونەتەوەیی بکەن.
دوایین کارەساتی ئەمساڵ کە بەهۆی گوێنەدانی ڕێژیم بە دۆخی ژیان و تەندروستیی خەڵک ڕووی دا، گواستنەوەی ڤایرۆسی کرۆنا لە چینەوە بۆ ئێران و لە ئێرانەوە بۆ وڵاتانی دەوروبەر بوو کە بەهۆی کەمتەرخەمی و نەزانکاریی دەسەڵاتدارانی تاران ئێستا سێبەری هەڕەشە باڵی بە سەر ئێران و هەموو ناوچەکەدا کێشاوە و تا ئێستاش ڕێژیم هیچ هەنگاوێکی ئەرێنیی بۆ پێشگرتن بە بڵاوبوونەوەی ئەو نەخۆشییە هەڵنەگرتووە و بگرە بە بێ گوێدانە ڕێنوێنییە تەندروستییەکان، شاری قوم وەکوو ناوەندی ئەو نەخۆشییە نەک هەر قەرەنتینە نەکراوە، بەڵکوو کراوەتە ناوەندێک بۆ هەناردەکردنی ڤایرۆسی کرۆنا بۆ هەموو ناوچەکانی ئێران و کوردستان. هەر ئەو سیاسەتەش بۆتە هۆی تووڕەیی زیاتری خەڵک لە سیاسەت و بەڕێوەبەریی کۆماری ئیسلامی.
لە پێوەندی لەگەڵ پرسی مودیریەتی ئەو قەیرانەدا خامنەیی، ڕێبەری ڕێژیم لە بڕیارێکی نوێدا دەسەڵاتەکانی لە وەزارەتی تەندروستی و کابینەی ڕۆحانی وەرگرتۆتەوە و ڕادەستی سپای تیرۆریستیی پاسدارانی کردووە. ئەو ئاڵوگۆرە لە لایەکەوە بۆ جارێکی دیکە ئەو ڕاستییە دەردەخات کە سەرۆک کۆمار و حکوومەت لەو سیستمەدا خاوەنی دەسەڵاتێکی ڕاستەقینە نین. لە لایەکی دیکەوە ئاماژەکان وا نیشان دەدەن کە ڕێژیم بە ناوی مودیریەتی قەیرانەوە خەریکی میلیتاریزەکردنی زیاتری کۆمەڵگا و خولقاندنی تاوانێکی دیکە دژ بە مرۆڤایەتییە و پێویستە ئازادیخوازان و خەڵکی وڵاتەکەمان و کۆمەڵگای نێودەوڵەتی بە هەڵگرتنی هەنگاوی پێویست ئەو سیاسەتە دژەمرۆییە لەقاو بدەن و پێش بە ڕوودانی کارەساتێکی گەورە بگرن.
هەروەها ئێمە وەکوو ناوەندی هاوکاریی حیزبەکانی کوردستانی ئێران بە پێویستی دەزانین وێڕای پێداگری لەسەر ڕاگەیەندراوی پێشووی خۆمان لەو پێوەندییەدا، جارێکی دیکە داوا لە خەڵک بکەین بە ڕەچاوکردنی ڕێنماییە تەندروستییەکان، یارمەتیدەری هەوڵەکان بۆ سەرکەوتن بە سەر ئەو پەتایەدا بن.
هاونیشتمانیان!
کۆی ئەو ڕووداوانەی ساڵی ڕابردوو نیشان دەدەن کە ڕێژیم لە هەموو ڕوویەکەوە لە ئاستی جیهانی و ناوچەیی و نێوخۆییدا لە گێژاوی قەیران و دەستەوەستانی چەقیوە و هەرچی زیاتر پەلەقاژە دەکات زیاتر ڕۆ دەچێتە نێو ئەو گێژاوەوە. بێگومان ئەوە هێز و ئیرادەی شۆڕشگێڕانەی یەکگرتووی ئێوەیە کە لە ساڵی داهاتوودا دەتوانێ ڕێژیم بۆ هەمێشە لە زۆنگاوی قەیرانەکانیدا نوقم بکات و مرۆڤایەتی لەو دێوەزمە نگریسە ڕزگار بکات.
با هەموومان ئەمساڵ فەلسەفەی نەورۆز وەکوو هێمای ژیانەوە و ڕاپەڕین، بکەینە چرای ڕێگای ژیان و خەباتمان و بە تێکۆشان و گیانبازیی زیاتر، یەکڕیز و یەکگرتوو تا ڕووخاندنی ڕێژیم و بنیاتنانی داهاتوویەکی دوور لە ئازار و ستەم و چەوسانەوە بۆ خۆمان و نەوەکانی داهاتوو، لە سەنگەری خەباتدا پتەو ڕاوەستین و بە کەڵک وەرگرتن لە هەموو شێوەکانی خەباتی ئازادیخوازانە، یەک جار بۆ هەمیشە کۆتایی بە مۆتەکەی دەسەڵاتی ستەمکارانەی ڕێژیمی ئازادیکوژ و کاولکەری کۆماری ئیسلامی بێنین.
ئێمە لە ناوەندی هاوکاریی حیزبەکانی کوردستانی ئێراندا وێڕای پیرۆزبایی نەورۆز و سەری ساڵی نوێ لە گەلی کورد و سەرجەم ئازادیخوازانی گەلانی ئێران، لەگەڵ شەهیدانی ڕێگای ئازادی، یەکسانی و ڕزگاریی وڵاتەکەمان پەیمانی نوێ دەکەینەوە کە تا وەدیهێنانی ئاواتەکانیان و بنیانتانی سیستمێکی دێموکراتیک و دابینبوونی ماف و ئازادییەکانی نەتەوەکەمان، لە سەنگەری گیانبازی و تێکۆشاندا بەردەوام بین و وانەی نەسرەوتن تا سەرکەوتن بکەینە چرای ڕێنوێنی تێکۆشانمان.
سڵاو لە شەهیدانی ڕێگای ئازادی و دادپەروەری
سڵاو لە ئیرادەی پۆڵایینی زیندانیانی سیاسی
سەرکەوێ خەباتی گەلانی ئێران بۆ ڕووخاندنی کۆماری ئیسلامی
سەرکەوێ خەباتی ڕزگاریخوازانەی گەلی کورد
ناوەندی هاوکاریی حیزبەکانی کوردستانی ئێران
نەورۆزی 1399ی هەتاوی
2720ی کوردی
#18-03-2020#

ناونیشانی بابەت: پەیامی ناوەندی هاوکاریی حیزبەکانی ڕۆژهەڵاتی کوردستان بە بۆنەی 8ی مارسی 2023، ڕۆژی جیهانیی ژن

ژنان و پیاوانی یەکسانیخواز و ڕاپەڕیوی کوردستان!
خەڵکی ئازادیخواز و خەباتگێڕی ئێران!
کۆڕوکۆمەڵ و ڕێکخراوە داکۆکیکارە نێودەوڵەتییەکانی مافەکانى ژنان!
ئەوساڵ لە کاتێکدا یادی 8ی مارس، ڕۆژی جیهانیی ژن دەکەینەوە کە نزیکەی 6 مانگ بەسەر ڕاپەڕینی شۆڕشگێڕانەی گەلانی ئێران بە پێشەنگایەتیی ژنان و لاوان لە ئێراندا تێ‌دەپەڕێ. ڕاپەڕینێک کە سەرەڕای ئەوەی لەگەڵ بەرزی و نزمی لە ئاستی چالاکی لەسەر شەقامەکان و مەیدانە جۆراوجۆرەکانی خەباتدا بەرەوڕوو بووە، بەڵام لە مکوڕبوون و شێلگیربوون لەسەر ویستە سەرەکییەکانی –کە لە گرینگترینیان سڕینەوەی هەڵاواردنی ڕەگەزییە- بەردەوام بووە و تا ئێستاش بەردەوامە. ڕاپەڕینێک کە تا ئێستاش دەسکەوتی بەنرخی بۆ کۆمەڵگە بەگشتی و بەتایبەت بۆ ژنان وەدی هێناوە، بە چەشنێک کە لەو ماوەیەدا شاهیدی وەرچەرخانێکی مێژوویی لە ڕوانینی کۆمەڵگە بۆ پێگە و ڕۆڵی ژن لە بیاڤی گشتیدا بووین. لە ئەنجامی ئەو ڕاپەڕینەدا گۆڕانکاری بەسەر ڕوانین و بەهاکانی کۆمەڵگەدا هاتووە و ژن جارێکی دیکە نە وەک قوربانی بەڵکوو وەک پێشەنگ و ئاکتۆری سیاسی بووەتە زامنی دابینکردنی کۆمەڵگەیەکی ئازاد و پێشکەوتوو، بووەتە هاندەر و پاڵنەر بۆ بەسەرکەوتن‌گەیاندنی ئەم شۆڕشە و پێشکەوتنێکی گەورە لە ساڕێژبوونەوەی کەلێنی ڕەگەزیدا ڕووی داوە، بە جۆرێک کە خواستی یەکسانیی ڕەگەزی و سڕینەوەی هەڵاواردنی ڕەگەزی لە خواستێکی ژنانەوە بۆ خواستی گشتیی کۆمەڵگە گۆڕاوە.
دروشمی ژن، ژیان، ئازادی وەک پارادایمی سەرەکی و ستڕاتیژیی #شۆڕشی ژینا #کە لە هەناوی کۆمەڵگەی کوردستانەوە سەری هەڵداوە و نەتەنیا سەراسەری ئێران، بەڵکوو وەکوو پێناسەی ئەو شۆڕشە لە ئاستی نێودەوڵەتیشدا دەنگدانەوەی بەرینی هەبووە، ئاماژەیەکی ڕوونە بۆ بەرجەستەبوونی ئەو گۆڕانکارییەی کە لە زەینیەتی پیاوسالاریی کۆمەڵگەی ئێران و بەتایبەت کۆمەڵگەی کوردستاندا هاتووەتە ئاراوە؛ کە ئەویش بەرهەمی خەباتی ساڵانێکی زۆری ژنان و پیاوانی مافخواز بووە. لە ئاستی نێوخۆییدا، ژنان لە ڕیزی هەرە پێشەوەی ناڕەزایەتییەکان‌دان و لە پاشکۆیەتیی نەریتییەوە بەرەو پێشەنگایەتیی شۆڕشێکی کۆمەڵایەتیی پێشکەوتنخواز هەنگاویان ناوە. لە ئاستی دەرەکیشدا، درێژبوونەوەی دروشمی ژن، ژیان، ئازادی بۆ زۆرێک لە وڵاتانی جیهان و پشتیوانیی فراوان لەو دروشمە چ لە ئاستی نوخبەی سیاسی و چ لە ئاستی کەسایەتییە ئەکادیمی و فەرهەنگی و هونەرییەکان لە جوغڕافیایەکی فراوانی نێودەوڵەتیدا، هەروەها دەرکردنی ئێران لە کۆمیسیۆنی پێگەی ژنی ڕێکخراوی نەتەوە یەکگرتووەکان، لە کاردانەوەکانی کۆمەڵگەی نێودەوڵەتی بوون بەرانبەر بە دەسەڵاتی دژەژنی کۆماری ئیسلامی. سەرهەڵدانی شۆڕشی ژینا لە کوردستان و بەشداریی بەرچاو و شوێندانەری ژنان لە ناڕەزایەتییەکاندا و، هەروەها پاڵپشتیی بێ‌وێنەی لاوان لە تایبەتمەندییە پێشکەوتنخوازانەکانی ئەو ڕاپەڕینە، نیشان لە پێگەیشتوویی کۆمەڵگەی کوردی لە پێگەی ژن و کارکردەکانی لە کۆمەڵگەدایە.
لە ئێرانی ژێر دەسەڵاتی کۆماری ئیسلامیدا ژێرخانە یاسایی، سیاسی، فەرهەنگی و ئابوورییەکانی ستەمی ڕەگەزی بە شێوەی سیستماتیک ڕێگەیان بۆ هەرچی زیاتر چەوسانەوەی ژنان خۆش کردووە. لە ڕوانگەی ئەو سیستەمە کۆنەپارێزەوە، پەراوێزبوونی ژن و ستەمی ڕەگەزی دیاردەیەکی سرووشتیین کە پێویستە ژنان پابەند بن پێیەوە. سەرەڕای ئەوەی ڕێژیم سەرجەم دامودەزگا تەبلیغی و پەروەردەیی و میدیاییەکانی بۆ جێخستنی ئەو خوێندنەوەیە لە ژنان تەرخان کردووە و هەوڵی داوە ژنان بە کۆمەڵێک پرسی لاوەکی و بێ‌بایەخی وەک جۆری پۆشش و هەڵسوکەوت و ژیانی تایبەتی سەرقاڵ بکا و دووریان بخاتەوە لە مافە سیاسی، ئابووری و فەرهەنگییەکانیان. بەڵام دەبینین بزووتنەوەیەکی چالاکی ژنان بۆ وەدیهێنانی ویست و مافەکانیان بەدرێژایی تەمەنی کۆماری ئیسلامی لە ئارادا بووە. ئەو بزووتنەوەیە بە تایبەت لە ساڵانی ڕابردوودا زەمینەی شۆڕشێکی فەرهەنگی – کۆمەڵایەتیی ڕەخساندووە کە کاریگەریی حاشاهەڵنەگری هەبووە لە سەرهەڵدانی ئەو کەشە شۆڕشگێڕانەیەی ئێستاکە لە کۆمەڵگەی ئێراندا دەیبینین.
ڕووداوەکانی ڕاپەڕینی ئەم‌دواییانەی گەلانی ئێران بەئاشکرا ئەوەمان پێ دەڵێ کە کۆمەڵگەی ئێران ئامادەیی تەواوی بۆ تێگەیشتن لە پرسی ژنان و زەروورەتی چارەسەری یەکسانیی ڕەگەزی بە مەبەستی ڕێگەخۆشکردن بۆ گەشەی سیاسی و ئابووری هەیە. دەور‌گێڕانی پێشەنگانەی ژنان لە خۆپیشاندان و ئاکسیۆنە جۆراوجۆرەکانی ناڕەزایەتی لە هەموو بوارەکاندا هەڵگری ئەو پەیامەیە کە کۆمەڵگەی ئێران خۆی بۆ داڕشتنەوەیەکی نوێ لە پەیوەندییە سیاسی و ئابووری و کۆمەڵایەتییەکان ئامادە کردووە. بەشێوەیەک کە سەقامگیری لە کۆمەڵگەدا بەبێ چارەسەری پرسی ژن مومکین نییە و هیچ دەسەڵاتێک ناتوانێ بەر بەو گۆڕانکارییە بگرێ.
بزووتنەوەی مافخوازانەی ژنان لە کوردستان بەهۆی ئەو پاشخانە مێژووییەی هەیەتی و بەتایبەت بە ئیلهام‌وەرگرتن لە بزووتنەوەی نەتەوەیی، خاوەن ناسنامەیەکی بەرچاوتر و کردەی ئامانجدارترە. ژنی کورد وەک بەشێک لە ناسنامەیەکی فراوانتری چەوساوەی نەتەوەیی، ئەنگیزەی بەهێزتری بۆ بەرەنگاربوونەوەی ستەم بەشێوەیەکی گشتی هەیە. حوزووری چالاکانەی ژنانی کورد لە خەباتی نەتەوەیی، لە ڕیزەکانی پێشمەرگەوە بگرە تا مەیدانە جیاوازەکانی خەباتی فەرهەنگی و سیاسی و میدیایی، دەرفەتی شازی بۆ بزووتنەوەی ژنان ڕەخساندوە تا بتوانێ لە پێناسە کردنەوەی ناسنامەی خۆیدا کەڵکی لێ‌وەرگرێ.
سەرەڕای هەموو ئەو ئاستەنگانەی لە بەردەم ژنان لە #کوردستان#دا هەن، لە هەمان کاتدا ئەزموونی کاری ڕێکخراوەیی لە بوارە جیاوازەکان و بەتایبەت ناسنامەخوازیی ڕێکخراوەییدا وایکردووە ژنان دەرفەتی گەورەیان لە داڕشتنەوەی پەیوەندییە کۆمەڵایەتییەکان بە ئاڕاستەی سڕینەوەی چەوسانەوەی ڕەگەزی لەبەر دەستدا بێ. ژنانی کورد گەیشتوونەتە ئەو ئاستە لە تێگەیشتوویی و ژیری کە لە گٶڕانکارییە چاوەڕوانکراوە سیاسییەکانی داهاتوودا، بتوانن هەڵاواردنی ڕەگەزی لە یاساکان و دامەزراوە ڕەسمییەکاندا بسڕنەوە، کاریگەریی لەسەر دامەزراوە فەرهەنگی، فێرکاری و میدیاییەکان دابنێن بە ئاڕاستەی کۆتایی هێنان بە عەقڵییەتی پیاوسالار.
ئێمە وەک ناوەندی هاوکاریی حیزبەکانی ڕۆژهەڵاتی کوردستان وێڕای ڕێزگرتن لە 8ی مارس، ڕۆژی نێونەتەوەیی ژن و پیرۆزبایی ئەو یادە لە ژنان و بەتایبەت ژنانی کورد لە ڕۆژهەڵاتی کوردستان، باوەڕمەندیی خۆمان بە هێزی هەراو و یەکلاکەرەوەی ژنان لە هەموو بوارەکاندا دووپات دەکەینەوە و پێمان‌وایە لەگەڵ ئەوەی هەنگاوی کاریگەرمان بۆ ڕەخساندنی دەرفەتی گونجاو بۆ وەدیهێنانی یەکسانیی ڕەگەزی ناوە، لە هەمان کاتدا دان بەو ڕاستییە دادەنێین کە شۆڕشی پێشکەوتنخوازی ژینا و دروشمی سەرەکیی ئەو شۆڕشە، پلان و بەرنامەی جیددیترمان لێ دەخوازێ و پابەندمان دەکا بە هەڵگرتنی هەنگاوی گەورەتر لەپێناو گەیشتن بە کۆمەڵگەیەکی هاوسەنگ و دوور لە ستەمی ڕەگەزی. ئێمە پێداگری لەسەر ئەو ڕاستییە دەکەینەوە کە ئامانجە سیاسی، کۆمەڵایەتی، نەتەوەیی و چینایەتییەکان نایەنەدی بەبێ ئەوەی ژنان پێگەی ڕاستەقینەی خۆیان لە کۆمەڵگەدا ببیننەوە.
سەرکەوێ شۆڕشی ژینا و خەباتی پێشەنگانەی ژنان لەژێر دروشمی ژن، ژیان، ئازادی،
نەمان بۆ دەسەڵاتی دژەژنی کۆماری ئیسلامی.
ناوەندی هاوکاریی حیزبەکان ڕۆژهەڵاتی کوردستان
6ی مارسی 2023 [1]

8ی مارسی هەموو ساڵێک وەبیرهێنەری مێژوویەک لە تێکۆشانی بێ وچانی ژنان لە سەرانسەری جیهاندا بۆ دابینبوونی مافەکانیان و گەیشتن بە یەکسانیی ڕاِستەقینەی نێوان مرۆڤەکانە.
ژنانی کۆمەڵگای ئێران و ڕۆژهەڵاتی کوردستانیش بەتایبەتی لەم ساڵانەی دواییدا خەبات و تێکۆشانێکی ماندوویی نەناسانەیان بۆ پاشەکشەکردن بە سیستمی کۆماری ئیسلامی و یاساکانی کە لەسەر بناغەی چەندین جۆر هەڵاواردن و یەک لەوانەش ستەم و هەڵاواردنی ڕەگەزی دژ بە ژنان بنیات نراوە، بەڕێوە بردووە.
ئه و سیستمە سیاسییەی کە ئێستا وەکوو وەیشوومەیەک باڵی بەسەر وڵاتەکەماندا کێشاوە، هەم میراتگری کۆمەڵێک داب و نەریتی پیاوسالارانەیە کە خۆبەخۆ دژ بە ویستی ڕەوا و ئەمڕۆیی ژنانی یەکسانیخواز کار دەکات و هەم بۆ خۆی بەرهەمهێنەری کولتوور و عەقڵیەتێکی ئیدئۆلۆژیکە کە ژن له و کولتوورەدا خاوەنی هیچ مافێک و هەڵگری هیچ بایەخێکی مرۆیی نیە و تەنیا وەکوو ئامراز و کاڵا و کۆیلەیەک بۆ خزمەتکردن بە پیاوان و دەزگای بەرهەمهێنانی حەشیمەتێکی گوێڕایەڵ و پەروەردەکردنی سەرباز بۆ بەردەوامی و مانەوەی سیستم چاوی لێ دەکرێت.
لە دیارییەکانی ئه و سیستمە بۆ ژنان دەتوانین ئاماژە بۆ هەڵاواردن لە بواری میرات، یاسای فرەژنی و یاساکانی دیکەی تایبەت بە پێگەی ژن لە بنەماڵە و ژیانی هاوبەشدا، قەساس و حەد و تەعزیر و خوێنبایی، ڕەواییدان بە قەتڵی نامووسی، دەستدرێژیی سێکسی لە زیندانەکاندا، بەردبارانکردن، گەشتی ئیرشاد، حیجابی زۆرەملی و بەربەست دانان بۆ بەشداریی چالاکانە و ئازادی ژنان لە بوارەکانی ژیانی سیاسی و کولتووری و کۆمەڵایەتیدا بکەین کە لە دووتوێی هەواڵەکانی پێوەندیدار بە پێشێلکردنی مافەکانی ژنان و کارەساتەکانی پێوەندیدار بە ژیانی ژنان وەکوو تووشبوون بە مادە سڕکەرەکان، خۆکوژی و خەمۆکیدا خۆی دەنوێنێت و بەشێکی زۆر کەم له و ڕاستییانە لە ڕاپۆرتی ڕێکخراوەکانی مافی مرۆڤی نێوخۆیی و نێودەوڵەتیدا ڕەنگ دەداتەوە.
لە وەها کۆمەڵگا و سیستمێکدا ژنان و پیاوانی یەکسانیخواز ئەرکێکی زۆر قورسیان بۆ هەڵگرتنی بەربەستەکان لە ئەستۆیە و لەگەڵ هەڕەشە و گوشاری سیستمی سیاسی و توێژی کۆنەپارێز و دواکەوتووی کۆمەڵگا بەرەوڕوو دەبنەوە کە چاوی بە دیتنی پێناسەیەکی نوێ و مرۆڤسالارانە بۆ پێگەی ژن و پێکهێنانی هاوسەنگییەکی ڕاستەقینە لە نێوان ژن و پیاودا هەڵنایەت.
لەگەڵ ئەوەشدا ژنانی خەباتکاری ئێران و کوردستان بوێرانە بۆ داکۆکی لە مافەکانی خۆیان ڕاوەستاون و تێچووی قورسی ئه و خەباتە هەرگیز نەبۆتە هۆی ئەوەی کە ژنان لە داوا ڕەواکانی خۆیان پاشگەز ببنەوە.
لەم ساڵانەی دواییدا خەباتی ژنان بۆ لابردنی کۆسپەکانی سەر ڕێگای وەدیهێنانی مافەکانیان، ڕۆژ لە دوای ڕۆژ زیاتر بۆتە بەشێکی دانەبڕاو و پێشەنگی خەباتی هەموو چین و توێژە ماف پێشێلکراوەکان بۆ بە چۆکداهێنان و ڕووخاندنی سیستمی سەرەڕۆ و دژەمرۆیی کۆماری ئیسلامی.
لە خۆپیشاندانە تابۆشکێنەکانی زستانی ئەم ساڵیشدا ژنان بە بەشداریی خۆیان لە ڕێکخستن و بەهێزکردنی ڕاپەڕینە جەماوەرییەکانی خەڵکدا توانیان ڕۆڵێکی ئازایانە بگێڕن و ببنە هێما و پێشەنگی بەشێک لە ناڕەزایەتییەکان. نموونەی هەرەدیاری ئه و هەوڵانەی ژنان، ڕووداوی لابردنی حیجابی زۆرەملی وەکوو یەکێک لە هێماکانی دەسەڵاتی ژنکوژی کۆماری ئیسلامییە کە لە هەنگاوی بوێرانەی کچێک لە شەقامی ئینقلابی تارانەوە دەستی پێکرد و سەرەڕای ئەوەی کە ڕێژیم هەوڵی داوە بە هەڕەشە و سەرکوت و گرتن و لێدان، پێش بە پەرەسەندنی ئه و جۆرە ناڕەزایەتییانە بگرێت، لە ماوەیەکی کورتدا چالاکیی کچانی شەقامی ئینقلاب بوو بە نەریتێکی گشتی بۆ دەربڕینی ناڕەزایەتیی ژنان دژ بە کۆماری ئیسلامی و یاساکانی.
ئێمە وەکوو ناوەندی هاوکاریی حیزبەکانی ڕۆژهەڵاتی کوردستان وێڕای پیرۆزبایی 8ی مارس لە هەموو ژنانی جیهان بەتایبەتی ژنانی یەکسانیخوازی وڵاتەکەمان، پشتیوانیی خۆمان لە هەموو داوا ڕەواکانی ژنان بۆ پێکهێنانی کۆمەڵگایەکی بەختەوەر و ژیانێکی مرۆیی کە لە ڕاستیدا داواکاری و ویستی هەموومانە، دەردەبڕین، لە هەر دەرفەتێکدا و لە هەر تریبوونێکەوە کە لە بەردەستماندا بێت، دەنگمان دەخەینە پاڵ دەنگی هاواری مافخوازانەی ژنانی بەندکراوی وڵاتەکەمان و خەبات بۆ دابینبوونی ماف و داخوازییەکانیان بە ئەرکی لەپێشینەی خۆمان دەزانین.
سڵاو لە ژنانی مافخواز و خەباتگێڕی وڵاتەکەمان
سەرکەوتوو بێت خەباتی یەکسانیخوازانەی ژنان
ناوەندی هاوکاریی حیزبەکانی کوردستانی ئێران
پێکهاتوو لە :
کۆمەڵەی شۆرشگێری زەحمەتکێشانی کوردستانی ئێران
کۆمەڵەی زەحمەتکێشانی کوردستان
حیزبی دێموکراتی کوردستان
حیزنی دێموکراتی کوردستانی ئێران
سازمانی خەباتی کوردستانی ئێران
#08-03-2018#

پێنج حیزب و لایەنی سیاسیی کوردستانی ڕۆژهەڵات، لە بارەگای ناوەندیی کۆمەڵەی زەحمەتکێشانی کوردستان لە زڕگوێز کۆ بوونەوە.
ئەمڕۆ شەممە ڕێکەوتی 30ی بەفرانباری 1396ی هەتاوی، (21-01-2018)کۆبوونەوەی پێنج حیزب و لایەنی سیاسیی کوردستانی ڕۆژهەڵات، لە بارەگای ناوەندیی کۆمەڵەی زەحمەتکێشانی کوردستان لە زڕگوێز بەڕێوە چوو.
لەو کۆبوونەوەیەدا، حیزب و لایەنە سیاسییەکانی کوردستانی ڕۆژهەڵات، باسیان لەسەر بارودۆخی هەنووکەیی کۆماری ئیسلامیی ئێران و درێژەدان بە سەرکوت و ناڕەزایەتییە خەڵکییەکان و پێویستی هەرچی زیاتر لێک نزیکبوونەوەی حیزب و لایەکان بەتایبەتی پێداگریان لەسەر هاوکاری و هەماهەنگی بۆ نێوخۆی کوردستانی ڕۆژهەڵات لە بواری پشتیوانی لە ناڕەزایەتییە خەڵکییەکان و چالاکانی مەدەنی، لەقاودانی سیاسەتەکانی کۆماری ئیسلامیدا، کرد.
هەر لەو کۆبوونەوەیەدا، باس لەوه کرا، کە لە کۆڕ و کۆمەڵە نێونەتەوەییەکان، زیاتر گوشار بخرێتە سەر کۆماری ئیسلامی، بۆ ئەوەی گوشار لە سەر چالاکانی مەدەنی کەم بکرێتەوە.
هەر لەو کۆبوونەوەیەدا، ناوەندێک بۆ هاوکاریی حیزبە کوردییەکان بۆ کار و تێکۆشانی داهاتووو پێک هات، هەروەها کۆبوونەوە و هەماهەنگی لە نێوان هەموو هێز و لایەنەکان لەسەر پرنسیپه ئەسڵییەکان بۆ هاوکاری بە مەبەستی ڕووخاندنی کۆماری ئیسلامی و بونیاتنانی سیستمێکی دێموکراتیک لە ئێران بە مەرجی دابین بوونی مافە نەتەوایەتییەکانی گەلی کورد، بەڕێوە دەچێت.
پاش تەواوبوونی کۆبوونەوەی پێنج لایەن و حیزبەکان لە کۆنفڕانسێکی ڕۆژنامەوانیدا، دید و بۆچوون و مەبەستی ئەو ناوەندە بۆ کاناڵەکانی ڕاگەیاندن شی کرایەوە.
جێگەی ئاماژەیە، شاندێکی حیزبی دێموکراتی کوردستانی ئێران، بە سەرپەرستیی محەممەد نەزیف قادری ئەندامی دەفتەری سیاسیی حیزبی دێموکراتی کوردستانی ئێران، لەو کۆبوونەوەیەدا بەشدار بوون.

کۆمەڵانی خەڵکی کوردستان!
کۆڕ و کۆمەڵە مرۆڤدۆستەکان!
وەک ئاگادارن شەوی هەینی 4ی ڕێبەندانی 1398ی هەتاوی بەرانبەر بە 24ی ژانویەی 2020ی زایینی، بومەلەرزەیەکی بەهێز پارێزگای خارپێت لە کوردستانی باکووری هەژاند کە ناوەندی ئەو بوومەلەرزەیە شاری سڤیریج بوو. بەهۆی ئەو ڕووداوە ماڵوێرانکەرە کە ڕۆژی دواتر ناوچەکانی دیکەشی لەو پارێزگایە و هەروەها پارێزگای مەلاتییە گرتەوە، مخابن دەیان هاونیشتمانی گیانیان لەدەست داوە و سەدان کەس بریندار بوونە و سەدان خانوو ڕووخاون و خەڵکێکی زۆر تووشی کارەسات و بێ ماڵ و حاڵی بوونە و لە چارەنووسی بەشێکیان کە لەوانەیە لەژێر دار و پەردووی خانووە ڕووخاوەکاندا مابن، هێشتا هەواڵێک لەبەر دەستدا نییه. بەپێی هەواڵی گەیشتوو، خەڵکی لێقەوماوی ئەو دەڤەرانە ئێستا بەهۆی کاریگەریی بەفر و سەرمای تاقەتپڕووکێن و زیان و ماڵوێرانییەک کە بەهۆی بومەلەرزەکەوە تووشی هاتوون، لە دۆخێکی زۆر نالەباردان و پێویستیی خێرایان بە یارمەتیی مرۆیی و فریاکەوتن هەیە.
ناوەندی هاوکاریی حیزبەکانی کوردستانی ئێران بەم بۆنەیەوە هاوخەمیی خۆی ئاراستەی کەسوکاری قوربانییانی ئەو کارەساتە سروشتییە دەکات و هیوای چاکبوونەوە بۆ برینداران دەخوازێت. هەروەها داوا لە خەڵکی نیشتمانپەروەری کوردستان، مرۆڤدۆستان لە هەر شوێنێکی جیهان و کۆڕ و کۆمەڵە مرۆڤدۆست و خێرخوازییەکان دەکات، بە هەر شێوەیەک کە پێیان دەکرێت، بە هانای خەڵکی لێقەوماوی ناوچە بومەلەرزە لێدراوەکانەوە بچن و یارمەتیی مرۆیی خێرا و پێویست بگەیەننە فریای ئەو خەڵکە بێ دەرەتانە و ڕێگە نەدەن سەرما و زوقمی زستان ببێتە هۆی قووڵتربوونی برینی ئەو کارەساتە گەورەیە.
ناوەندی هاوکاریی حیزبەکانی کوردستانی ئێران
6ی ڕێبەندانی 1398ی هەتاوی
#26-01-2020#

بەڕێز ڕێکخراوی پەروەردەیی، زانستی و کولتووریی نەتەوە یەکگرتووەکان (یوونسکۆ)

سڵاو و ڕێز

ئێمە وەکوو حیزب و ڕێکخراوە سیاسییەکانی ئەندامی ناوەندی هاوکاریی حیزبەکانی کوردستانی ئێران لە بەرەبەری 21ی فیورییە (ڕۆژی جیهانیی زمانی دایکی)دا بە پێویستمان زانی لە دووتوێی ئەم نامەیەدا بەڕێزتان لە بارودۆخی نالەباری زمانی دایکیی نەتەوە ستەملێکراوەکانی ئێران ئاگادار بکەینەوە و داواتان لێ بکەین وەکوو ئۆرگانێکی بەرپرسیار لەو پێوەندییەدا گوشار بخەنە سەر کۆماری ئیسلامیی ئێران بۆ ئەوەی کە کۆتایی بەو ستەم و هەڵاواردنە بێنێ کە بە هۆی سیاسەتەکانی ئەو ڕێژیمە بە سەر کولتوور و شوناس و زمانی دایکیی نەتەوە ستەملێکراوەکانی ئێراندا هاتووە.

ئێران وڵاتێکی فرەکولتوور و فرەنەتەوەیە کە هەرکام لە نەتەوەکانی پێکهێنەری ئەم وڵاتە خاوەنی زمان و شوناسی جیاوازی خۆیانن. بەپێی یاسا نێونەتەوەییەکانی پێوەندیدار بە مافی مرۆڤ، ئاخێوەرانی هەر زمانێک مافی خۆیانە کە بە زمانی دایکیی خۆیان بخوێنن و کولتوور و زمانی خۆیان بپارێزن و پەرەی پێ بدەن. هەر وەک دەزانن، ئەو مافە لە ڕاگەیەندراوی جیهانیی مافە زمانییەکان، جاڕنامەی زمانی دایکیی ڕێکخراوی یوونسکۆ، پەیماننامەی نێونەتەوەیی مافە مەدەنی و سیاسییەکانی ڕێکخراوی نەتەوە یەکگرتووەکان و کۆنڤانسیۆنی مافەکانی منداڵانێشدا هاتووە. کۆماری ئیسلامیی ئێرانیش هەموو ئەو پەیماننامە نێونەتەوەییانەی واژۆ کردووە و لە ڕێکخراوەکانی پێوەندیدار بەو بەڵگەنامانە و یەک لەوانەش یوونسکۆدا ئەندامە. بە پێی مادەی 9ی یاسای مەدەنیی ئێران، ئەو بەڵگەنامانە دەبێ وەکوو یاسا پەسەندکراوەکانی مەجلیسی شۆرای ئیسلامیی ئێران کاریان پێ بکرێت. بەڵام کۆماری ئیسلامیی ئێران بە پێچەوانەی بەرپرسیارێتییەک کە واژۆکردنی ئەو بەڵگەنامانە دەیخاتە ئەستۆی، نەک هەر هێچ هەنگاوێکی بۆ جێبەجێکردنیان هەڵنەگرتووە، بەڵکوو بەپێی ئەسڵی 15ی یاسای بنەڕەتیی ڕێژیم، زمانی فارسی وەکوو تاقە زمانی فەرمیی وڵات دەناسێت و بە کردەوەش پرسی خوێندن بە زمانی دایکیی نەتەوە نافارسەکانی ئێران (کە زیاتر لە نێوەی حەشیمەتی ئێران پێک دەهێنن) وەکوو هەڕەشەیەک بۆ سەر تەناهیی نیشتمانی و یەکپارچەیی وڵات پێناسە دەکات و ئامادە نییە دان بە مافە زمانییەکانی ئەو نەتەوانە و یەک لەوانە نەتەوەی کورد لە ئێران و ناوچەکانی کوردستانی ئێراندا بنێت. لەو پێوەندییەدا ڕێژیمی ئێستای ئێران بە درێژەدانی سیاسەتەکانی ڕێژیمی پاشایەتیی پەهلەوی، ئاسیمیلاسیۆنی زمانی و سڕینەوە و سووکایەتی بە کولتوور و شوناسی بەشێکی زۆر لە نەتەوەکانی ئێران، گۆڕینی دێمۆگرافی و تواندنەوەی زمانی کوردی و زمانی نەتەوە ستەملێکراوەکانی دیکەی لە نێو زمانی نەتەوەی باڵادەستدا گرتوتە پێش و سەرمایەکانی وڵاتی خستۆتە خزمەت سیاسەتی تواندنەوەی کولتوور و شوناسی ئەو نەتەوانە. چالاکانی کولتووری و زمانیی کورد، کە بە شێوەی خۆبەخشانە هەوڵ دەدەن خولی فێرکردنی زمانی دایکی بۆ ڕۆڵەکانی ئەم نەتەوە ستەملێکراوە بەڕێوە ببەن، لەگەڵ بەربەستی جۆراوجۆر لە لایەن دام و دەزگا حکوومەتییەکانەوە بەرەوڕوو دەبن و حکوومەت مۆرکی تاوانی ئەمنیەتی لە چالاکییە مافخوازانەکانیان دەدات.

ئێمە وەکوو حیزب و ڕێکخراوەکانی ئەندام لە ناوەندی هاوکاریی حیزبەکانی کوردستانی ئێراندا کە بۆ وەدیهێنانی مافە سیاسی و مرۆییەکانی نەتەوەی ستەملێکراوی کورد لە کوردستانی ئێراندا خەبات دەکەین، داواتان لێ دەکەین چاوەدێرییەکی چالاکانە بە سەر هەڵسوکەوت و سیاسەتی کاولکارانەی ڕێژیمی ئێران لە پێوەندی لەگەڵ ئەم بابەتەدا بکەن و هەوڵ بدەن گوشار بخەنە سەر ڕێژیم بۆ ئەوەی کە پابەندیی خۆی بە یاسا و پرەنسیپەکانی ڕێکخراوی ئێوە و ڕێککەوتنە نێونەتەوەییەکانی پێوەندیدار بە زمانی دایکی، کە بۆ خۆی واژۆی کردوون، بە کردەوە بسەلمێنێت و کۆتایی بە ستەم و سەرکوت و هەڵاواردن لە دژی کولتوور و زمانی دایکیی ڕۆڵەکانی نەتەوەی کورد بهێنێت.

لەگەڵ ڕێزماندا
ناوەندی هاوکاریی حیزبەکانی کوردستانی ئێران
ژانویەی 2019ی زایینی