دواڕِۆژ، ئاوارە حەمید
وەزیری کاروکاروباری کۆمەڵایەتی دەڵێت، لەئێستا 658 کەسی ئالودەبوو بەماددەی هۆشبەر لە چاکسازییەکانی کوردستانن، بەڕێوەبەرێکی گشتی لە دەستەی مافی مرۆڤیش دەڵێت، زۆر جار ڕێکەوتن لەنێوان بازرگانان و بەڕێوەبەری بازگەگان هەیە لەسەر هاوردەکردنی ماددەی هۆشبەر.
محەمەد هاودیانی، وەزیری کاروکاروباری کۆمەڵایەتی لە میانی بەڕێوەچوونی کۆنفڕانسی ماددەی هۆشبەر، لەژێر ناوی جەنگێک دژی نەوەی ئێستا و داهاتوو ڕونیکردەوە، لە ئێستادا 658 کەسی ئالودەبوو بە ماددەی هۆشبەر هەن کە 20 کەسیان ژنن لەگەڵ پێنج منداڵ.
وتیشی لەو ژمارەیە 61 کەس خەڵکی کۆماری ئیسلامی ئێرانن کە زۆربەیان بازرگانی ماددەی هۆشبەرن و 19 کەس بە ڕەچەڵەک تورکن لەگەڵ 13 کەسی وڵاتی سوریا.
هاودیانی بە پێویستی زانی کە سەنتەرێکی ڕاهێنان و چارەسەر بۆ توشبوانی ماددەی هۆشبەر دروست بکرێت.
لایخۆشیەوە تاڤگە عومەر، بەڕێوەبەری گشتی لە دەستەی مافی مرۆڤ ڕونیکردەوە، وڵاتانی دەوروبەر بە بەرنامە کار لەسەر هاوردە کردنی ماددەی هۆشبەر دەکەن بۆ ئەوەی توانای گەنجان بکوژن.
تاڤگە نمونەی بەوە هێنایەوە کە لەناوچەیەکی سنوری لەماوەی مانگی نیسان لە کۆی 92 ڕاگیراو 78 کەس بەکارهێنەری ماددەی هۆشبەربوون، لەبەرامبەردا لە قەزایەکی وەک چەمچەماڵ لە هەمان مانگدا تەنها شەش کەس لەسەر مادەی هۆشبەر گیرابوون و لەو شەش کەسە تەنها یەک کەس کورد بووە.
ئەو بەڕێوەبەرە وتیشی بەپێی ئەو زانیارییانەی لەبەردەستماندایە زۆر جار ڕێکەوتن لەنێوان بازرگانەکانی ماددەی هۆشبەر و سەرپەرشتیاری بازگەکان هەیە، بۆیە بەپێویستی زانی کە سەرپەرشتیاری بازگەکان زوو زوو بگۆڕدرێن.
تاڤگە نیگەرانی دەربڕی لەوەی لەناو چاکسازییەکان ئەو کەسانەی بە ماددەی هۆشبەردەستگیردەکرێن لەگەڵ کەسانی تر دادەنرێن، ئەمەش کێشەیە و پێویستە چارەسەر بکرێت.
وتیشی ئەندازیارێک دەستگیر کرابوو لەسەر سەرپێچی هاتوچۆ کە لەماوەی یەک هەفتەدا 16 جۆر مادەی هۆشبەری ناسیوە.
لەبەرامبەر قسەکاتی بەڕێوەبەرە گشتیەکەی دەستەی سەربەخۆی مافەکانی مرۆڤ، محمد هاودیانی، وەزیری کاروکاروباری کۆمەڵایەتی وتی، لە کاتی دەستبەکاربوونم وەک وەزیر لە سەرجەم چاکسازیەکان بەندکراوان بە گوێرەی تاوانەکانیان جیاکراونەتەوە و تێکەڵی یەکتر نین.
06-08-2017

هۆبەی نەهێشتنی ماددە هۆشبەرەکان لە بەڕێوەبەرایەتی ئاسایشی #زاخۆ# دەستگیرکردنی 120 کەسی لە هەردوو ڕەگەز لەسەر بەکارهێنان و بازرگانیکردن بە ماددە هۆشبەرەکان ڕاگەیاند.
لە کۆنگرەیەکی ڕۆژنامەڤانیدا، هۆبەی نەهێشتنی ماددە هۆشبەرەکانی سەر بە ئاسایشی زاخۆ ڕایگەیاند: لە ماوەی ئەمساڵدا 120 کەس لەسەر لە بەکارهێنان و بازرگانیکردن بە ماددە هۆشبەرەکان دەستگیرکراون، زۆربەیان خەڵکی دەڤەرەکەن، خەڵکی دەرەوەی سنووری هەرێمی کوردستانیشی تێدایە.
هۆبەی نەهێشتنی مادە هۆشبەرەکان ئاماژە بۆئەوە دەکات بەشی زۆری ئەوانەی دەستگیرکراون گەنجن، بە گشتی تەمەنیان دەگاتە نێوان 17 65 ساڵی، هەردوو ڕەگەزیش لەنێو دەستگیرکراوەکاندا هەن.
زۆربەی کەسەکان لەسەر مادەی هێرۆیین دەستگیرکراون، کە مادەیەکی مەترسیدارە لە جیهاندا. هۆبەی نەهێشتنی مادە هۆشبەرەکان دەشڵێت بەکارهێنانی و بازرگانیکردن پێی لە هەرێمی کوردستان بووەتە دیاردە، ئەو مادەیەش لە دەرەوەی سنووری کوردستان دێتە نێو هەرێمی کوردستان.
سەبارەت بەبڕی ئەو مادە هۆشبەرانەی لە ماوەی ئەمساڵدا دەستیان بەرسەرداگرتووە، هۆبەی نەهێشتنی مادە هۆشبەرەکان لە زاخۆ دەڵێت بڕەکان و حاڵەتەکان جۆراوجۆرن، هەر جارەو بڕێک دەستیبەسەرداگیراوە، بەڵام بەگشتی دیارنییە.[1]
#22-11-2018#

نووسینی: #ڕێبین ڕەسوڵ ئیسماعیل# و د.#خانزاد ئەحمەد# عەبد
چاپی یەکەم 2019

خەندان هۆگر کەمال
دوای ئەوەی دوو ڕۆژ لەمەوبەر لە لایەن بازگەی بانی مەقان و بازگەکانی دیکەی دەورووبەری شاری سلێمانی دەستبەسەر زیاتر لە سێ تەن دەرمان و مادەی هۆشبەری ساختەدا گیرا، ئەمڕۆ چوارشەممە لە لایەن وەزارەتی تەندروستییەوە لەناوبران.
د. دڵشاد محەمەد، نوێنەری وەزیری تەندروستی لە شاری سلێمانی و دەوروبەری، بە (خەندان) ی ڕاگەیاند: دوای ئەوەی لەلایەن بازگەکانی دەوروبەری شاری سلێمانی و ڕێگە قاچاغەکانەوە، دەستگیرا بەسەر زیاتر لە سێ تەن دەرمان و مادەی هۆشبەر کە بە شامپۆ ڕووپۆشکرابوون، ئەمڕۆش بە بڕیاری وەزیری تەندروستی لە ناوبران.
وتیشی: "دەرمانەکان لە دەرزی و حەپ و شروب پێکهاتبوون کە بە شامپۆ ڕوپۆشکرابوون، لە ناوەڕاست و باشوری عیراقەوە هێنرابوون، بۆ ئەوەی لە شاری سلێمانی و دەوربەری ساغبکرێتەوە".
نوێنەرەکەی وەزیری تەندروستی حکومەتی هەرێم لە شاری سلێمانی، باسی لەوەشکرد، ئەگەر ئەو دەرمانانە بەکاربهێنرایە کارەساتی لە شاری سلێمانی و دەوروبەری دروست دەکرد.
- 13-11-2013

بەڕێوەبەری هۆبەی نەهێشتنی مادەهۆشبەرەکان لەپۆلیسی کەرکووک ڕایدەگەیەنێت کە لە 20%ی بەکارهێنەرانی مادە هۆشبەرەکان لەپارێزگاکە پۆلیسی فریاکەوتنن.
ئومێد سامی، کەرکووک: ئەو وتەیەی عەقید نەوزاد سەلاحەدین بەڕێوەبەری هۆبەی نەهێشتنی مادە هۆشبەرەکان دوای خستنەڕوی ئاماری شەش مانگی ڕابردوی هۆبەکەیان هات کە تیایدا ئاماژە بەوە دەکات ڕێژەی بەکارهێنەرانی مادە هۆشبەرەکانی زیادیکردوە.
عەقید نەوزاد وتی، "لەسەرەتای ئەمساڵەوە تا کۆتایی مانگی شەش 46 دۆسیەی تایبەت بەبەکارهێنەرانی مادە هۆشبەرەکان لەهۆبەکەمان کراوەتەوەو 63 کەس دەستگیرکراوە بەتۆمەتی بەکارهێنان و مامەڵەکردن بەمادە هۆشبەرەکانەوە."
ناوبراو وتیشی، هەر لەو ماوەیەدا دەستبەسەر 9 هەزارو 468 دەنک حەبی ئارتین و 300ملم گرام مادەی هۆشبەردا گیراوە.
بەڕێوەبەری هۆبەی نەهێشتنی مادە هۆشبەرەکان ڕونیکردەوە کە بەگوێرەی ئامارەکانیان "20%ی بەکارهێنەرانی مادەهۆشبەرەکان لەپارێزگای کەرکووک پۆلیسی فریاکەوتنن." لەگەڵ ئاماژەدان بەوەی ڕێژەی بەکارهێنەرانی مادە هۆشبەرەکان لەو پارێزگایە لە هەڵکشاندایە.
س: کەرکووک ناو
- 27-06-2013

دواڕۆژ، عەلی حەمە سەعید
ئەمڕۆ یەکشەممە 8ی کانوی دووەم بەڕێوەبەرایەتی ئاسایشی شارەزوور دەست بەسەرداگرتنی بڕی زیاتر لە 163 هەزار دەنکە حەبی قەدەقەغەکراوی لە جۆری (ترامادۆڵ) ڕاگەیاند بۆ ئەو مەبەستەش لێکۆڵینەوە دەستیپێکردووە، هاوکات لەساڵی ڕابردوشدا 378 کیلۆ مادەی هۆشبەر دەستی بەسەرداگیراوەو 63 تۆمەتباریش لەسەر بەکارهێنان و بازرگانیکردنی بەماددەی هۆشبەر دەستگیر کراون.
ڕائید ئاراس محەمەد، بەرپرسی بەشی ڕاگەیاندن و پەیوەندییەکانی ئاسایشی شارەزوور، لە کۆنگرەیەکی ڕۆژنامەوانیدا ڕایگەیاند" لە درێژەی کاروچالاکیەکاماندا بۆ بنبڕکردنی مادەی هۆشبەر، هێزەکانمان بەفەرمانی دادوەری لێکۆڵینەوەی ئاسایشی شارەزوور و بەگوێرەی مادەی(14)ی مادە هۆشبەرەکان توانیان دەستبگرن بەسەر بڕی هەزار 637 پاکەت حەبی قەدەغەکراو لە جۆری (ترامادۆڵ200ملم) کە سەرجەمیان پێکدێن لە 163هەزار و 700 دەنکە حەبی ترامادۆڵ.
ئاماژەی بەوەشکرد، بەمەبەستی دەستگیرکردنی تۆمەتبارەکان و ڕادەستکردنیان بە یاسا لە ئێستادا لێکۆڵینەوەکانمان لەوبارەیەوە دەستپێکردووە.
هەرلەو کۆنگرە ڕۆژنامەوانیەدا، بەرپرسی بەشی ڕاگەیاندن و پەیوەندییەکانی ئاسایشی شارەزوور ئامارەکانی دەستگیرکردنی تۆمەتباران و دەستبەسەرداگرتنی مادە هۆشبەرەکانی لەساڵی ڕابردوودا ئاشکراکرد بەشێوەیەک کە 63 تۆمەتبار دەستگیرکراون کە پێنج کەسیان سزادراون و19 تۆمەتباریشیان دۆسیەکەیان دانەخراوە 28 تۆمەتباریان لە ژێر لێکۆڵینەوەدان و 11 تۆمەتباریشیان دۆسیەکانیان گواستراوەتەوە.
ڕائید ئاراس محەمەد وتیشی" هەرلەساڵی ڕابردودا، 378 کیلۆ گرام مادەی هۆشبەر لە جۆرەکانی تریاک، حەشیش، گیای هۆشبەر، فۆسفۆر شیشە، حەب و چەند جۆرێکی تری مادەی هۆشبەر دەستی بەسەردا گیراوە کە لەو ڕێژەیە 374 کیلۆگرامیان حەبی هۆشبەر بووە".
- 08-01-2017

ئا: کاروان ساڵحی
دەروازەکانی کەرکووک بۆ چونەناوەوەی مادە هۆشبەرەکان ناڕاستەوخۆ کراوەن، لەچەند دەرمانخانەیەکی نایاساییش لە لاکۆڵانەکانی شارەکەدا پەرستیاران بازرگانی بەو مادەیەوە دەکەن.
عەقید نەوزاد سەڵاحەدین، لێپرسراوی هۆبەی نەهێشتنی مادە هۆشبەرەکان لەپۆلیسی کەرکووک تەشەنەسەندنی مادە هۆشبەرەکان لەکەرکووک بە "دیاردە" ناودەبات و دەڵێت، مادەی هۆشبەر تەشەنەی کردوە بۆ نێو خوێندنگەکان.
چەند جۆرێک لەمادەی هۆبەشەر کە لەلایەن پۆلیسەوە دەستی بەسەردا گیراوە فۆتۆ: کاروان ساڵحی
عەقید نەوزاد وتی، "تائێستا سەردانی دوو قوتابخانەمان کردووە کە ئەو دیاردەیەی تێدابووە، بەڵام لەلایەن بەڕێوەبەری ئەو دوو قوتابخانەیەوە ئەو باسە شاردراوەتەوە بۆ ئەوەی قوتابییەکانیان نەدرێن بەدادگا." ناوبراو وتیشی، هێزە ئەمنییەکان وەک پۆلیس و سوپا بێبەش نین لەدیاردەی بەکارهێنانی مادەی هۆشبەر "لەڕیزەکانی پۆلیس و سوپادا خەڵکمان دەستگیرکردوە لەسەر بەکارهێنانیان."
تەنیا لە 10 مانگی ئەمساڵدا (2013) هۆبەی نەهێشتنی مادە هۆشبەرەکان 70 دۆسیەی تایبەتیان بەمادە هۆشبەرەکان کردۆتەوەو 89 کەسیش دوای دەستگیرکردنیان دراونەتە دادگا، لەکاتێکدا لەساڵی ڕابردو دۆسیەکان کەمتر بون.
هەر لەهەڵمەتەکانی ئەمساڵیاندا هۆبەی نەهێشتنی مادە هۆشبەرەکان دەستیان بەسەر (5گرام) تلیاکدا گرتووە، لەگەڵ 11 هەزارو 517 حەبی ئارتین و (2ملیۆن و هەشتاو دوو) دەنکی حەبی (ترامادۆڵ) کە ئەمانەش جۆرێکی تری مادەی هۆشبەرن.
یاسا بەهەمان شێوەی بازرگانیکردن بەتلیاک مامەڵە لەگەڵ ئەو کەسانەدا دەکات کە حەبی جۆری ترامادۆڵ و ئارتینیان پێدەگیرێت، بەپێی وتەی لێپرسراوی هۆبەی نەهێشتنی مادە هۆشبەرەکان.
ئەو جۆرانە لەمادەی هۆشبەر بەدەروازەکانی کەرکووکدا لەهەردو پارێزگای موسڵ و بەغداوە دەبرێنە ناو شارەوەو ئەو دو پارێزگایە سەرچاوەی تەشەنەسەندنی مادەهۆشبەرەکانن لەپارێزگاکە.
هۆشداریی و ترسی پۆلیس ئەوەیە تائێستا نەیانتوانیووە کۆنترۆڵی بڵاوبونەوەی ئەو دیاردەیە بکەن، کە مەترسی بۆ نەوەی ئایندەو زیادبونی تاوانی جۆراوجۆر هەیە، لەگەڵ ئاماژەدان بەکردەوەی تیرۆریستی.
عەقید نەوزاد ڕونیکردەوە کە "نەمانتوانیووە کۆنترۆڵی بازگەکان بکەین و پۆلیسی لێدابنێن، هەروەها لەڕێگای گەڕان و پشکنین توانیومانە لەنێو گەڕەکەکان چەند پەرستیارێک دەستگیربکەین کە دەیانفرۆشتن و بازرگانیان پێوە دەکردن."
هاوکات ئەوەشی خستەڕو کە "تەشەنەسەندنی ئەم دیاردەیە لەنێو کۆمەڵگەو بەتایبەت لەنێو گەنجان دەبێتە هۆی زیادبونی تاوانی (لاقەکردن، دزیی و تاوانی تری کۆمەڵایەتیی).” زیاتر وتی “لەهەموشی مەترسیدارتر ئەوەیە تیرۆریستان سود لەو کەسانە وەردەگرن کە بێهۆشن بۆ کاری تیرۆریستی و مەرامی خۆیان."
لەئێستادا ڕێکخراوی خێرخوازی کەرکووک بەهاوبەشی لەگەڵ هۆبەی نەهێشتی مادە هۆشبەرەکان چەند خولێکی هۆشیارکردنەوەیان لەوبارەیەوە دەستپێکردووە کە بڕیارە سێ مانگ بەردەوامبێت.
وەفا محەمەد، لێپرسراوی ڕێکخراوی خێرخوازی کەرکووک وتی، "لەقوتابخانەو کۆلێژو وپەیمانگەکان خولەکان دەڵێینەوە دەربارەی زیانەکانی مادەی هۆشبەرو خۆپاراستن لەو مادەیەو چۆنێتی هەوڵدان بۆ کەمکردنەوەی لەنێو کۆمەڵگەدا."
وەفا ئەوەشی وت کە "هەستمان بەتەشەنەسندنی مادە هۆشبەرەکان کردووە، لەناو قوتابخانە و دەزگا ئەمنیەکاندا بۆیە دەبێت بەری پێبگیرێت و خەڵک لەو مەترسییە گەورەیە هۆشیار بکەینەوە."
هاوکات عەقید نەوزاد سەڵاحەدین ئاماژەی بۆ ئەوەکرد کە "داواکارین بەڕێوەبەری پۆلیس و لێپرسراوەکان هاوکاربن بۆ بنبڕکردنی ئەو دیاردەیە بەتایبەت لەسلکی پۆلیس و هێزە ئەمنییەکانی تر."
- 21-10-2013

بەڕێوەبەرایەتی ئاسایشی ڕاپەڕین ئاماری ساڵێکی بەکارهێنەران و بازرگانانی مادەی هۆشبەری لە سنورەکەیان بڵاوکردەوە و بەپێی ئامارەکە، بەکارهێنان و بازرگانیکردن بە مادەی هۆشبەرەوە بە ڕێژەیەکی بەرچاو زیادی کردوە.
ئەمڕۆ بەڕێوبەرایەتی ئاسایشی ڕاپەرین لە کۆنگرەیەکی ڕۆژنامەوانیدا ئاماری ساڵێکی بڵاوکردەوە، بەپێی ئامارەکە لە ساڵی ڕابردوودا (127) کەس دەستگیرکراون، بەڵام ساڵی 2015 تەنها (31) کەس بەهۆی مادەی هۆشبەرەوە دەستگیرکرابوون.
موقەدەم محەمەد فازل، لێپرسراوی بەشی ڕاگەیاندن و پەیوەندییەکانی بەڕێوەبەرایەتی ئاسایشی ڕاپەڕین لە کۆنگرە ڕۆژنامەوانیەکەدا ڕایگەیاند: بەپێی ئه و ئامارەی لەبەردەستماندایە، لە ساڵی 2016دا (239) کەس لە ڕەگەز و تەمەن و نەتەوەی جیاواز بە فەرمانی دادگاکانی لێکۆڵینەوە، فەرمانی دەستگیرکردنیان بۆ دەرکراوە، بەڵام له و ژمارەیە (127) کەسیان دەستگیر کراون، ئەوانی تریش فەرمانی دەستگیرکردنیان هەیە.
وتیشی: بڕی ئه و ماددە و حەبانەی کە دەستیان بە سەرداگیراوە، بریتین لە چوار کیلۆ و حەوسەد و یەک گرام و پەنجا و حەوت سەنت لە ماددە هۆشبەرەکانی (تلیاک، کریستاڵ، شیشە، هێرۆین، تۆوی شادانا)، هەروەها بڕی 156 کارتۆن و 1598 پارچە حەب لە حەبەکانی جۆری ترامادۆڵ، کلۆنسپام، ترافید، تۆپیدۆڵ و پانیکس دەستیان بەسەردا گیراوە، لەگەڵ ئەوەشدا 32 کەسیش پشکنینی خوێنیان پیس بووە.
ئاماژەی بۆ ئەوەش کرد: بە بەراورد بە ساڵی ڕابردوو بە داخەوە ڕێژەکە زۆر زیادی کردووە، لە کاتێکدا لە ساڵی ڕابردوو تەنها (31)کەس دەستگیر کراون به و تۆمەتە و بڕی 1 کارتۆن و 981 دەنکە حەب دەستیان بە سەردا گیرا.
لە پرسیارێکی ڕۆژنیوزیشدا کە ئایا فەراغی ئەمنی لەسەر سنورەکاندا بوونی هەیە؟ موقەدەم محەمەد فازل ئەوەی خستەڕوو: فەراغی ئەمنی بە شێوەیەکی زۆر نییە، ئه و شوێنانەی کە پێشتر لە دەست پێشمەرگەدا بوون و لە ئێستادا کە پێشمەرگە لەگەڵ داعش لە شەڕدایە، ئەوا لە شوێنی ئەوان هێزەکانی ئاسایش جێگایان پڕکردونەتەوە.
لەسەر زیادبوونی بەکارهێنان و بازرگانیکردن بە مادەی هۆشبەرەوە لە سنوری ڕاپەڕین، یوسف عومەر، توێژەری کۆمەڵایەتی لە شارۆچکەی ڕانیە بە ڕۆژنیوزی ڕاگەیاند: لە جیهاندا تووشبوون بە ماددەی هۆشبەر بۆتە دیاردە و وەک کەلتوری لێهاتووە، بە داخەوە لە هەرێمی کوردستان ئاماژەکان دڵخۆشکەر نین، بە حوکمی ئەوەی کە سنورمان لەگەڵ ئێرانە، ماددە هۆشبەرەکان زۆر بە ئاسانی دەگاتە دەست هاوڵاتیانی هەرێم و بازرگانی پێوە دەکرێت، ئەوەش وایکردووە کە کۆمەڵگا بەره و هەرەس و وێران بوون بڕوات.
وتیشی: زۆر بە داخەوە ئەم ماددانە بە ئاسانی بازرگانیان پێوە دەکرێت و دەگاتە دەست هاوڵاتیان، هۆکارەکەشی بوونی فەراغی ئەمنی لە ناوچە سنورییەکانی هەرێم و ئێرانە، لە لایەکیترەوە نەبوونی هەلی کار وایکردووە کە گەنجان زۆرتر ڕوو لە ماددە هۆشبەرەکان بکەن.
ئه و توێژەرە کۆمەڵایەتییە ئەوەشی خستەڕوو: تا ئێستا وەک پێویست بە باشی کار لەسەر بنەبڕکردنی بازەرگانیکردن بە ماددە هۆشبەرەکان نەکراوە، پێویستە ئه و کەسانەی کە ئالودە بوونە بە ماددە هۆشبەرەکان بە باشی مامەڵەیان لەگەڵ بکرێت و بخرێنە ژێر چاودێری، بۆ ئەوەی دوور بن لە کۆمەڵگا تا بە باشی چارەسەر وەردەگرن.
باسی لەوەش کرد: پێویستە سیستەمێکی ڕێکوپێک بۆ خێزان و منداڵ و گەنجان دروست بکرێت بە شێوەیەک لە شێوەکان لە لایەن ڕاگەیاندنەکان و هەروەها بە کۆڕ و سمینار کۆمەڵگا لە بەرامبەر بە مەترسیەکانی ماددە هۆشبەرەکان وشیار بکرێتەوە، پێویستە بە هەموو لایەک بە تایبەت ڕێکخراوەکان و توێژەرانی کۆمەڵایەتی هەوڵ بۆ بنەبڕکردنی ئەم دیاردە ناشیرین و ماڵوێرانکەرە بدەین.
05-01-2017

بەڕێوەبەرایەتی کۆمەڵگەی دەروازەی نێودەوڵەتی باشماخ ڕایگەیاند، لەلایەن یاریدەدەرێتی ئاسایشی باشماخەوە کەسێکی هەرێمی کوردستانیان دەستگیرکردوە کە لە ئێرانەوە گەڕاوەتەوە هەرێمی کوردستان و بڕێکی زۆر ماددەی هۆشبەری پێبوە.
لەراگەیەندراوێکدا بڵاویکردەوە، بەڕێوەبەرایەتی کۆمەڵگەی دەروازەی نێودەوڵەتی باشماخ ڕایگەیاند، کاتژمێر2:30 خولەکی بەرەبەیانی 25/7/2019 لەلایەن یاریدەدەرێتی ئاسایشی باشماخەوە هاوڵاتیەکی هەرێمی کوردستان بەناوی(ر.ذ.د.ش) لەدایکبوی (1975) دانیشتوی یەکێک لەشارەکانی هەرێمی کوردستان لەکاتی گەڕانەوەی لەکۆماری ئیسلامیی ئێرانەوە دەستگیرکرا.
ئاماژە بەوەشکراوە، ئەو هاوڵاتیە بڕی(93) گرام مادەی هۆشبەر لەجۆری(هێرۆین) و بڕی(21) گرام مادەی (شیشە)ی پێبوە، لە ئێستاشدا دۆسیەکەی ڕەوانەی دادگاکراوە بەمەبەستی وەرگرتنی سزاکەی بەپێ ی یاسای سزادانی عێراقی.[1]

دەقی ڕاگەیەندراوەکەی ئەنجومەنی ئاسایشی هەرێمی کوردستان:
هێزەکانی ئەنجومەنی ئاسایشی هەرێمی کوردستان، دوای بەدەستخستنی چەند زانیارییەک لە سەرچاوەیەکی باوەڕپێکراوەوە، توانییان دەست بە سەر بڕی (70) کیلۆگرام لە ماددەی هۆشبەر لە جۆری هیرۆیین و تریاکدا بگرن، کە لە لایەن گرووپێکی ئەفریقییەوە هێنرابووە هەرێمی کوردستان، کە لە شێوەی ماددە خۆراکییەکانی وەک: (تەحین، ژاژی، کەشک، ڕەیحان و ئارد) بوو، بەڵام بە هەوڵ و ماندووبوون و شەونخونی و پلانێکی تۆکمەی هێزەکانی ئەنجومەنی ئاسایشی هەرێمی کوردستان، توانرا دەستی بەسەردا بگیرێت.
ئەو گرووپە پێکهاتبوو لە چوار هاووڵاتیی ئەفریقیي خەڵکی وڵاتی (غانا)، کە ئەم ماددە هۆشبەرانەی هێناوەتە هەرێمی کوردستان، بەڵام لە لایەن هێزەکانی ئەنجومەنی ئاسایشی هەرێمی کوردستانەوە بە پێی ماددەی (14) لە یاسای سزادانی ماددە هۆشبەرەکان، دەستگیر کران و ڕادەستی دادگا کران.
ئەنجومەنی ئاسایشی هەرێمی کوردستان[1]