بەیاننامەیەک لە بنەماڵەی (عەزیز گەردی)یەوە

سوپاسگوزاری خۆمان ڕادەگەیەنین بۆ هەموو ئەو کەسانەی کە لە نەخۆشخانە سەردانی (دکتۆر عەزیز گەردی)یان کردوو لە ڕێوڕەسمی ناشتنی تەرمەکەی لە شاری هەولێر، گۆڕستانی شارۆچکەی بەحرکەی واری باب و باپیرانی ئامادەبوون و ڕۆحی بەرزەفڕیی دکتۆریان کەمێک شادکرد و هەندێک خەمی گرانی سەر دڵی ئێمەشیان ڕەواندەوە.
دکتۆر عزیز گەردی بە زۆر هیوا و ئاوات و خۆزگە و مەرامی گەورە سەری نایەوە، بەلام هەر دەیگووت؛ ئەو خۆزگانە دێنەدی بەڵام لەوانەیە من نەمێنم و نەیبینم..
دکتۆر عەزیز گەردی برامان و براتان لە بەهێزییدا هاوتایی نەبوو!
خەمی گەورەی میللەتی کوردی لەکۆڵ نابوو کەچی هەر بە پێوە ژیا و مرد..
شەو و ڕۆژ دەیخوێندەوە و دەینووسی، نە لە خوێندنەوە تێر دەبوو، نە ماندووش دەبوو!
د. عەزیز گەردی شاخێک بوو، چەندین ساڵ بوو بە کولینگ و بێڵ و ماوەر لێیان دەدا پارچەیەکی بچوکیان پێ لێ نەبۆوە،
چەند تەپکە و تۆڕ و داویان بۆ داناو بۆیان نەگیرا و نەگیرا!
ئەوەندەی جلەوی ئەسپی خورت و سەرکێشی خزمەت و ڕێبازەکەیان گرت و پێیان نەکرا پێیی لە ڕکێبی دەربێنن و لە خانەی زینی دایبەزێنن!
چەکی دەستی د. عەزیز گەردی تەنیا قەڵەمەکەی بوو، کەچی بەرەنگاری زۆر قەلەمی خۆفرۆش و تاغوت و دکتاتۆر و فیرعەون و گەندەلکاران دەبۆوە!؟
با هەموومان بڵێین:
خودایە لۆ خاتری د. عەزیز گەردی لەگوناهی هەموو لایەکمان خۆشبیت..[1]

برای د. عەزیز گەردی
عەبدولقەهار گەردی
هەولێر، بەحرکە
#10-06-2022#

بەدڵگرانیەکی زۆرەوە هەواڵی کۆچی دوایی ئەکادیمی و مامۆستا و نووسەر و وەرگێر و زانای کورد دکتۆر عەزیز گەردی ئەستێرەی درەوشاوەی ئاسمانی ئەدەبی کوردی و شارەکەمان ڕادەگەێنین.
دکتۆر عەزیز گەردی ئەکادیمی و مامۆستا و نووسەر و وەرگێری گەورەی کورد، کەهەموو تەمەنی لەپێناو خزمەتکردنی زمان و ئەدەبی کوردی تەرخانکردبوو و لەڕێی وەرگێڕانی شاکارە ئەدەبییە جیهانییەکانەوە کتێبخانەی کوردی دەوڵەمەند کردووە، خاوەنی زیاتر لە 200 کتێب و بەرهەمە لە نوسین وەرگێران، مایەی شانازیمان بووە و هەربەم شێوەیەش تامێژوو ماوە لە زاکیرەی هەمووماندا دەمێنێتەوە، لەدەستدانی ئەو پیاوە گەورەیە، خەسارەتێکی گەورەیە لەناوەندی ئەدەبی کوردی و میللەتەکەمان.
بەمبۆنە خەمناکەوە، پرسە و سەرەخۆشی خۆمان ئاڕاستەی کەس و کار و دۆستانی دەکەین و خۆمان بەهاوبەشی خەمیان دەزانین. لە خودای گەورە داواکارین دکتۆر عەزیز گەردی بەبەهەشتی بەرین شاد بکات و سەبروو ئارامی ببەخشیتە ئێمە و بەڕێزیان و دۆستان و قوتابیانی، ئەمە دوا کۆست و ناخۆشیتان بێت.[1]

انا لله وانا الیە ڕاجعون

#ئومێد خۆشناو#
پارێزگاری #هەولێر#
#06-06-2022#

دەقی پرسەنامەکەی ئەرسەلان بایز:
بەداخەوە هەواڵی کۆچی دوایی نووسەرو وەرگێڕو ڕۆشنبیری کورد عەزیز گەردی-م بیست، دڵگران و خەمباری کردم.
مامۆستا عەزیز گەردی وەک نووسەرێکی گەورەی کورد لەژیانی پڕ بەرهەمی خۆیدا سەرباری ئەوەی زمانزانێکی گەورە بوو هاوکات خزمەتێکی گەورەی بەکتێبخانەی کوردی کردو بەرهەمەکانی وەک کتێبی دانسقە لەنێو مێژووی کورد دەمێننەوەو دەبنە سەرچاوەی گرنگ بۆ نەوەکانی داهاتوو.
بۆ لەدەستدانی ئەم نووسەرو ڕۆشنبیرە گەورەیە پرسەو سەرەخۆشی و هاوخەمی ئاراستەی خۆمان و نووسەران و ڕۆشنبیران و خانەوادەکەیان دەکەم، بەهیوام ئەمە دواکۆست و ناخۆشی هەموو لایەک بێت.
د. ئەرسەلان بایز
ئەندامی ئەنجومەنی باڵای سیاسی و بەرژەوەندی
یەکێتیی نیشتمانیی کوردستان [1]

⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!

کۆچی دوایی مامۆستا #عەزیز گەردی#، نووسەر، ئەکادیمیست و وەرگێڕە ناسراوەکەی کوردستان خەسارەتێکی گەورەیە و لە دڵەوە نیگەرانی کردین.

ژیان و ئەزموونی مامۆستا عەزیز گەردی وانەیەکی گرنگ و کاریگەرە بۆ هەموو ئەوانەی دەیانەوێت خزمەت بکەن و ناویان لە مێژوودا بە درەوشاوەیی بمێنێتەوە. ئەو یەکێک بوو لەو نووسەرە دەگمەنانەی بێئەوەی چاوەڕوانی هیچ ستایش و پیاهەڵدانێک بێت، لە خەمی زمان و فەرهەنگی نەتەوەکەیدا بوو. بە ئاوڕدانەوەیەک بۆ کتێبخانەی کوردی لەو ڕاستییە تێدەگەین، هیچ کەسێک بە ئەندازەی عەزیز گەردی قەڵەمەکەی پڕکار و بەبڕشت نەبووە. هەر بۆیە ئەمڕۆ کوردستان بە دڵتەنگییەوە ماڵئاواییت لێدەکات و مێژوو بە شانازییەوە ناوت دەهێنێت.[1]

رۆحت شاد و یادت بەخێر مامۆستای پایەبەرز

#بافڵ جەلال تاڵەبانی#
سەرۆکی #یەکێتیی نیشتمانیی کوردستان#
06-06-2022

دەقی پرسەنامەکەی بەرهەم ساڵح:
بەداخێکی زۆرەوە هەواڵی کۆچی دوایی نووسەر و وە ڕگێڕی گەورەی کورد مامۆستا (عە زیز گە ڕدی) مان پێگەیشت.
مامۆستا عەزیز گەردی، نووسەر و وەڕگێرێکی بەناوبانگ و داهێنەر بوو، کارەکانی گوزارشت بوون لە پەیامی مرۆڤایەتی و کوردایەتی، خزمەتێکی زۆری بواری ڕۆشنبیری و فەرهەنگی کوردی کردووە، کۆچی دوایی خەسارەتێکی گەورە بوو.
بەم بۆنەیە وە، پرسە و هاوخەمی قووڵی خۆم ئاڕاستەی خانەوادە و کەسوکار و بنەماڵەی مامۆستا عەزیز گەردی دەکەم، داواکارم لە خودای گەورە خوالێخۆشبوو بە بەهەشت شاد بکات و سەبووری و دڵنەوایی هەموو لایەک بدات.
إنا لله وإنا إلیه ڕاجعون
د. بەرهەم ساڵح
سەرۆک کۆماری عیراق [1]


⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!

دەقی پرسەنامەکەی دەرباز کۆسرەت ڕەسوڵ:
بەڕێزان: کەسوکارو خانەوادەی دکتۆر عەزیز گەردی
بەداخێکی زۆرەوە دوای ململانێیەکی سەخت لەگەڵ نەخۆشی، نووسەرو ئەکادیمی و ڕووناکبیرو وەرگێڕی گەورەی کورد دکتۆر عەزیز گەردی کۆچی دوایی کرد، دڵگران و خەمباری کردین.
دکتۆر عەزیز گەردی لەماوەی تەمەنی پڕ بەخشش و بەرهەمی خۆی توانی خزمەتێکی یەکجار گەورە بە گەلەکەمان بکات، دەیان شاکاری جیهانی وەرگێڕایە سەر زمانی کوردی و بە دەیان بەرهەمی گەورەی پێشکەشی ئەدەبیاتی کوردی کرد، بەرهەمە دانسقەکانی لەنێو کتێبخانەی کوردی بەنەمری دەمێننەوەو یادو یادەوەری لە دڵی هەمووماندایە.
بەداخەوە کۆچی دوایی ئەم کەڵە نووسەرو ڕووناکبیرو وەرگێڕە کەلێنێکی گەورە لەنێو ئەدەبیاتی کوردی دروست دەکات، هەموومان خەمبارو نیگەرانین بۆ لە دەستدانی ئەم مرۆڤە جوانە ناخ پڕ لە وشەیە، پرسەو سەرەخۆشی و هاوخەمی خۆم ئاراستەی کەسوکارو خانەوادەکەی و سەرجەم نووسەران و ڕۆشنبیران دەکەم، هیواخوازم ئەمە دواکۆست و ناخۆشیمان بێت، خوای گەورە سەبووری هەموومان بدات و کۆچکردوو جێگای بەهەشتی بەرین بێت.
دەرباز کۆسرەت ڕەسوڵ
کارگێڕی مەکتەبی سیاسی
یەکێتیی نیشتمانیی کوردستان [1]

بە ناوی ئەنجومەنی زانکۆی پۆلیتەکنیکی #هەولێر#ەوە پرسە و سەرخۆشی خۆمان ئاراستەی خانەوادەی نووسەر و وەرگێڕی ناسراوی کوردستان د.عەزیز گەردی دەکەین. مامۆستا عەزیز گەردی ڕۆشنبیرێکی گەورە و بەتوانا و خاوەنی کەسایەتییەکی بەهێز و خۆشەویست و ڕێزلێگیراوی کوردستان بوو، هەموو تەمەنی خۆی بە نووسین و لێکۆڵینەوە و وەرگێڕان و خزمەتکردنی ئەدەب و ڕۆشنبیریی کوردی بەخشی.
ڕەحمەتی دەیان بەرهەمی بەپێزی بە چاپ گەیاندووە و لە ڕێگەیانەوە خوێنەری کوردی بە بەشێک لە باشترین بەرهەمە جیهانییەکان ئاشنا کردووە، لە زانکۆکان هەزاران قوتابیی پێگەیاندووە کە ئێستا لە شوێنە جیاوازەکان خزمەت دەکەن.
لە خودای گەورە داواکارین ڕۆحی بە بەهەشت شاد بکات و سەبر و ئارامییش بە هەموومان ببەخشێت.[1]

ئەنجومەنی زانکۆی پۆلیتەکنیکی هەولێر
06-06-2022

بە ناوی خودای بەخشندە و میهرەبان

هەواڵی کۆچی دوایی مامۆستا، نووسەر و وەرگێڕی بەتوانای کورد، د. عەزیز گەردی هەموومانی خەمبار کرد. بەم بۆنە خەمناکەوە، پرسە و سەرەخۆشی لە خۆمان، خانەوادە و دۆستانی کۆچکردوو و هەروەها لە تەواوی کۆمەڵی ڕۆشنبیرانی کورد دەکەین.

کۆچی دوایی د. عەزیز گەردی خەسارەتێکی گەورەیە کە بەر زمان و وشەی کوردی دەکەوێت. کەلێنێکی گەورە لە ناو دونیای ڕۆشنگەریی کوردیدا درووست دەکات کە مەگەر بە هەوڵی هەموو لایەک و لە ناویشیاندا بە هەوڵی قوتابیانی کۆچکردوو ئەم کەلێنە کەم بکرێتەوە.

مامۆستای کۆچکردوو لە ماوەی چەند دەیەی ڕابردوودا، بە نووسینی بابەتییانە، وەرگێرانی ورد و وانەگوتنەوەی نموونەیی خزمەتێکی بەرچاو و نەبڕاوەی پێشکەش بە زمان و ئەدەبی کوردی کردووە. ڕەحمەتی دەیان بەرهەمی بەپێزی بە چاپ گەیاندووە و لە ڕێگەیانەوە خوێنەری کوردی بە بەشێک لە باشترین بەرهەمە جیهانییەکان ئاشنا کردووە؛ لە زانکۆکان هەزاران قوتابیی پێگەیاندووە کە ئێستا لە شوێن و ناوەندە جیاوازەکان خزمەت دەکەن.

زانکۆی #سۆران# شانازیی بەوەوە دەکات کە بەشێک لە باشترینی مامۆستاکانی قوتابیی مەرحووم عەزیز گەردی بوون. ئەوان ئێستا لە ڕێگەی نووسین، توێژینەوە و وانەگوتنەوەوە هەوڵی گوێزانەوەی ئەزموونی ئەو و پێگەیاندنی نەوەیەکی نوێ دەدەن.

د. عەزیز گەردی لە پاش خۆی دەیان کتێب و سەدان هەزار وشەی جوانی بۆ کورد و کوردستان بەجێ هێشت. ئێمە لە زانکۆی سۆران هانی قوتابیان و مامۆستایانمان دەدەین کە مەرحوومیان بکەنە نموونە و سەرمەشق بۆ چاولێکردن و درێژە بە ڕێگەی ئەو بدەن کە هەمان ڕێگەی خزمەتکردنە بە زانست و نیشتیمان.[1]

سەرۆکایەتیی زانکۆی سۆران
06-06-2022

دەقی پرسەنامەکەی شاناز ئیبراهیم ئەحمەد:
بەڕێزان خانەوادەی کۆچکردو دکتۆر عەزیز گەردی
بە داخ و پەژارەیەکی زۆرەوە، هەواڵی ماڵئاوایی دکتۆر(عەزیز گەردی)، نووسەرو ڕوناکبیرو مامۆستای زانکۆ و وەرگێڕی ناسراوی کورد-مان پێگەیشت، بۆ ئەو غەمەتان پرسە و ماتەمینیی خۆمتان پێڕادەگەیەنم و لەناخەوە هاوبەشی غەم و پەژارەتانم.
لە کاتێکدا لەدەستدانی مامۆستا عەزیز گەردی بەخەسارەتێکی گەورە دەزانین، بەڵام بەشانازیشەوە دەڕوانینە کاروانە پڕ بەخششەکەی لەبواری فەرهەنگی کوردی و وەرگێڕانی شاکارە ئەدەبییە جیهانییەکان، بۆیە لە ناو و بیرەوەری لە مێژوو و ویژدانی گەلەکەماندا هەمیشە بەزیندوویی دەمێنێتەوە.
خوای گەورە ئارامیی و دڵنەوایی بە ئێوە و خانەوادەکەتان و هەموو لایەک ببەخشێت، ئەوە دوایین کۆست و دڵتەنگیتان بێت، کۆچکردوش بخاتە بەر سۆزی فراوانی خۆی و بەبەهەشتی بەرین شاد بکات.
ٳنا لله وٳنا ٳلیه ڕاجعون
شاناز ئیبراهیم ئەحمەد
کارگێڕی مەکتەبی سیاسی و
سەرپەرشتیاری مەڵبەندی 1ی ڕێکخستنی #سلێمانی#(ی.ن.ک.) [1]

⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!

بەڕێزان بنەماڵەی خوالێخۆشبوو نووسەرو وەرگێڕی ناسراوی کوردستان مامۆستا عەزیز گەردی
سڵاوێکی گەرم...
بەخەم و پەژارەیەکی زۆرەوە هەواڵی کۆچی دوایی نووسەر و وەرگێڕی ناسراوی کوردستان (د. عەزیز گەردی)یمان پێگەییشت، خوالێخۆشبوو ڕۆڵێکی بەرچاوی لە بزاڤی ڕۆشنبیریی گەلی کوردستان هەبوو، لە بواری نووسین و وەرگێڕاندا خزمەتێکی زۆری بە گەلی کوردستان کردو بە بەرهەمەکانی کتێبخانەی کوردی دەوڵەمەند کرد، لەدەستدانی مامۆستا عەزیز گەردی زیانێکی گەورەیە بۆ تەواوی بزاڤی کلتوری کوردستان.
بە ناوی خۆمان و ئەندامانی مەکتەبی سیاسی و کۆمیتەی سەرکردایەتیی یەکێتی نەتەوەیی دیموکراتی کوردستان پرسە و سەرەخۆشیی گەرمی خۆمان ئاراستەی ئێوەی بەڕێزو تەواوی خزمان و کەسوکاری خوالێخۆشبوو و تەواوی نووسەران و ڕۆشنبیرانی کوردستان دەکەین و خۆمان بە هاوبەشی خەمتان دەزانین و، لە یەزدانی مەزن داواکارین خوالێخۆشبوو بخاتە بەر ڕەحمەت و دلۆڤانی خۆی و دڵنەوایی و ئارامی بە هەموو لایەک ببەخشێت.[1]

#غەفوور مەخمووری#
سکرتێری گشتیی
#یەکێتی نەتەوەیی دیموکراتی کوردستان YNDK#
#06-06-2022#