دەقی پەیامەکەی مەڵبەندی #سۆران#ی #یەکێتیی نیشتمانیی کوردستان#:
کەسوکاری سەربەرزی شەهیدان،
خەڵکی شۆڕشگێڕ و خۆڕاگری خۆشناوەتی
خانەوادە و قوربانیانی ئەنفال و کیمیاباران
ئەمڕۆ سی و پێنج ساڵ تێدەپەرێت بەسەر بۆردومانکردنی گوندەکانی شێخ وەسان و بالیسان و دۆڵی خۆشناوەتی و هەروتیایەتی بە چەکی کیمیایی، کە ڕژێمی دیکتاتۆری بەعسی لەناوچوو بۆ یەکەمجار چەکی کیمیایی قەدەغەکراوی لە (16 / 4 / 1987) دژ بە خەڵکی شۆڕشگێڕ و تێکۆشەری گوند و ئاواییەکانی سنوورەکە بەکارهێنا، کە دەیان منداڵ و ژن و پیاوو گەنج بوونە قوربانی، لە ئەنجامی بۆردوومانەکەدا (263) هاووڵاتی بێ تاوان شەهیدو (620) یشیان بریندار بوون.
تاقیکردنەوەی چەکی کیمیایی لە لایەن جەللادەکانی سەدامی فاشی، بەرامبەر خەڵکی سڤیلی خۆشناوەتی هەڵبژاردنی بێدەنگی وڵاتانی بەناو دیموکراسی ئەوپەڕی ڕیسوایی و بێ مۆڕالییان بوو بەرامبەر دۆزی ڕەوای میللەتەکەمان، کە ئەو کارەساتە سەرەتای دەستپێکی بەکارهێنانی چەکی کۆمەڵکوژو قەدەغەکراو ئەنجامدانی تاوانی جینۆسایدکردنی گەلەکەمان بوو، کە دواتر زۆربەی ناوچەکانی تری کوردستانی گرتەوەو ویژدانی مرۆڤایەتی هەژاند.[1]

⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!

کەس و کاری سەربەرزی شەهیدان
خەڵکی خۆڕاگر و تێکۆشەری دۆڵی خۆشناوەتی
33 ساڵ لەمەوبەر لە 16 / 4 / 1987 ڕژێمی بەعسی لەناوچوو تاوانێکی تری خستە سەر ئەو تاوانانەی کەلە چوارچێوەی کۆمەڵکوژی و لەناوبردنی گەلی کوردستان جێبەجێی دەکرد، لەو ڕوژەدا ڕژێمی لەناوچوو بەچەکی قەدەغەکراوی کیمیاوی گوندی شێخ وەسانان و بالیسان و گوندەکان دۆڵی خوشناوەتی چەند جارێک بۆمباران کرد و لەئەنجامدا چەندین قوربانی شەهید و برینداری لێکەوتەوە.
هەر ئەوکات ژمارەیەک لە بریندارەکان دوور لەهەموو بەهایەکی مرۆڤایەتی لەلایەن ڕژێمەوە زیندەبەچاڵکران کە لە دوای ڕوخانی ڕوفاتی ژمارەیەک لەو شەهیدانە لە گۆرێکی بەکۆمەڵدا لەکارگەی قیری #هەولێر# دۆزرانەوە و گەرێندرانەوە زیدی باوک وباپیرانیان و بەخاک سپێردرانەوە.
بەشێکی زۆری بەرکەوتووانی چەکی کیمیاوی ئەو ناوچانەش کە ڕزگاریان بوو تائێستاش ئاسەواری ئەو چەکە بە جەستەیانەوە ماوە و کاریگەری لەسەر تەندرووستیان درووستکردووە.
خەڵکی خۆراگری بالیسان و شیخ وەسانان و دوڵی خۆشناوەتی.
مێژوو شاهیدی خۆراگری و قوربانیدانی ناوچەکەتان دەدات کەهەردەم پشتیوان و پاڵپشتی شۆرشەکانی گەلی کوردستان بوون و لەمێژووی کوردایەتیدا لاپەرەی ڕەنگین بەخوێنی قوربانیدانتان نەخشاندوە.
بەرگری و خۆڕاگریتان لەبەرانبەر مەترسیدارترین چەکی کۆکوژی کیمیاوی شکستی بە پیلانی دوژمنان هێنا و ئێوەش سەربەرزانە لە سەر خاکەکەی خۆتان مانەوە.
ئێمە لە وەزارەتی کاروباری شەهیدان و ئەنفالکراوان خزمەتی زیاتری کەسوکاری سەربەرزی شەهیدان و ئەنفالکراوان و بەرکەوتوانی چەکی کیمیاوی و تاقانەکانی جینوساید لەو سنوره و هەموو کوردستان بە ئەرکی سەرشانمان دەزانین.
کەسوکاری سەبەرزی شەهیدان
لە کاتێکدا ئێمە یادی 33 ساڵەی بەرکەوتووانی کیمیابارانی ناوچەکەتان دەکەینەوە کوردستان لە قۆناغی خۆپارێزی لە مەترسییەکانی ڤایرۆسی کۆرۆنادایە و لەبەر پابەندبوون بە ڕێکار و ڕێنماییە تەندرووستییەکان نەتوانرا وەک ساڵانی
پێشوو مەراسیمی شایستە بۆ یادی شەهیدەکانمان بکەینەوە، لەگەڵ ئەوەی بۆ هەمیشە یادی شەهیدانمان بەرز ڕادەگرین هەوڵەکانی وەزارەتی کاروباری شەهیدان و ئەنفالکراوان بەرێگار و شێوازی تر بەردەوامە بۆ ئەوەی ئەو تاوانانەی بەرانبەر گەلی کوردستان کراون لەسەر ئاستی نێودەوڵەتی بناسرێن.
درود بۆ ڕوحی پاکی شەهیدانی بالیسان و شیخ وەسانان و دوڵی خۆشناوەتی و سەرجەم شەهیدانی کوردستان
سەربەرزی بۆ کەسوکاریان
وەزارەتی کاروباری شەهیدان و ئەنفالکراوانی حکومەتی هەرێمی کوردستان
#16-04-2020#

لەیادی 33 ساڵەی کیمیابارانکردنی بالیسان و شێخ وەسانان و دۆڵی خۆشناوەتی، سەرۆکی پەرلەمانی کوردستان پەیامێکی بڵاوکردەوە.
لە 33یەمین ساڵڕۆژی کیمیابارانی دۆڵی بالیسان و شێخ وەسانان و خۆشناوەتیدا سەری ڕێزونەوازش بۆ سەرجەم شەهیدانی ئەم تاوانە شەرمهێنەرەی ڕژێمی فاشستی لەناوچوو دادەنەوێنین.
ئەم بۆنە خەمهێن و دڵتەزێنە لەکاتێکدایە کەمرۆڤایەتی بەهۆی ڤایرۆسێکی نەبینراوەوە ڕووبەڕووی مەترسییەکی نادیار بۆتەوە، بەڵام هەوڵی لەناوبردنی نەتەوەیەک بەبەرچاوی هەموو دونیاوە بوو، بێدەنگیشی لێکرا، بۆیە جارێکی تر بەبیر هەموو جیهان و ڕێکخراوەکانی بواری مافەکانی مرۆڤی دەهێنینەوە کەوا لاپەڕە ڕەشەکانی ئەم مێژووە نەفرەتییە هەڵدەنەوه و وەک تاوانێکی جینۆساید بیناسێنن. لەم یادە تاڵەدا هاوخەمیی خۆمان بەسەرجەم کوردستانیان و بەرکەوتووانی ئەم هێرش و تاوانکارییە دژ بەمرۆڤایەتییە ڕادەگەیەنین و هیوای چاکبوونەوەش بۆ برینداران دەخوازین کەبەشێکیان تاوەکو ئەمڕۆش بەدەم ئازارەکانی ئەم تاوانەوە دەناڵێنن. وەک پەرلەمانی کوردستانیش داواکارین لە حکومەتی عیراقی کە ئەم ڕۆژە ڕەشە لەمێژووی عێراق لەگەڵ تاوانەکانی تری ئەنفال و کیمیابارانکردنی هەڵەبجه و بادینان بەجینۆساید بناسێنێت و قەرەبووی زیانە گیانی و مادییەکان بکاتەوه و داوای لێبووردنیش لەسەرجەم کوردستانیان بکات لەپای ئەم تاوانە گەورەیە کەدەرهەقی خەڵکی سیڤیل کراوە، وەک چۆن بەئەرکی خۆمان و پابەندی حکومەتی هەرێمی دەزانین کەباشترین خزمەتی کەسوکاری سەربەرزی شەهیدانی ئه و تاوانکارییە بکەین و لەساڕێژکردنی برینی کەسوکاریاندا کەمتەرخەمی نەکەین.
لەیادی دڵتەزێنی کیمیابارانی دۆڵی خۆشناوەتیدا جارێکی تر سەری ڕێزو نەوازش بۆ شەهیدانی ئەم تاوانه و سەرجەم شەهیدانی کوردستان دادەنەوێنین.
د.ڕێواز فایەق
سەرۆکی پەرلەمانی کوردستان
#16-04-2020#