دوا بەدوای پرێس کۆنفرانسی وەزیری ناوخۆ و وەزیری تەندروستی حکومەتی هەرێمی کوردستان و لەسەر داوای وەزیری ناوخۆ بۆ ڕێکخستنی کاری ڕۆژنامەنووسان و دەزگەکانی میدیایی، ئەنجوومەنی سەندیکای ڕۆژنامەنووسان ئەم ڕێنماییانە بۆ سەرجەم ڕۆژنامەنووسان و دەزگەکانی میدیایی بڵاودەکاتەوە:
1- ڕۆژنامەنووسان ئازادن لە ڕاییکردنی بەرپرسیارێتی خۆیان، هاوکات پێویستە پابەندی تەواوی ڕێنمایی و بڕیارەکانی #وەزارەتی ناوخۆ# و تەندروستی و ژووری ئۆپەراسیۆنی پارێزگا و ئیدارە سەربەخۆکان بن.
2- پێویستە هەموو کەناڵ و دەزگەیەکی میدیایی لیستی ناوی کارمەند و ئەو ڕۆژنامەنووسانەی (لە کاردان)، بداتە تیمەکانی ڕۆژنامەنووسی خۆی بۆ ئەوەی ڕێگری لە هاتووچۆکردنیان نەکرێت، هاوکات لیستی ئەم ناوانە بۆ سەندیکا لە ڕێگەی ئیمێلی سەندیکاوە بنێردرێت، یاخود پەیوەندی بکەن بە یەکێک لە ئەندامانی ئەنجوومەن و لیژنەی داکۆکی، کە لە خوارەوە ژمارەی تەلەفۆنیان نووسراوە.
3- مەرج نییە هەموو ئەندامێکی سەندیکای ڕۆژنامەنووسان لە ئەرک دابێت، بۆیە سەندیکا داوا لە سەرجەم ڕۆژنامەنووسان دەکات، پابەندی ڕێنماییەکانی فەرمی بن، ئاسانکاری هاتووچۆی ڕۆژنامەنووسان تەنها ئەو کەسانە دەگرێتەوە، کە لە کاری ڕۆژانە دان، بۆ بازگەکانیش پێویستە هەر ڕۆژنامەنووسێک و تیمێکی ڕۆژنامەنووسی (پێناسی سەندیکا ئەگەر ئەندام بوو لەگەڵ پێناس یان باجی کەناڵە میدیاییەکەی و هەروەها نووسراوی فەرمی کەناڵەکەی کە بسەلمێنێت لە کار دایە) بەیەکەوە پێبێت و ئامادە بێت.
4- پێویستە دەزگەکانی میدیایی بە ئۆتۆمبیلی دەزگاکەی هاتووچۆ بە ڕۆژنامەنووسانی بکات، واتە ئۆتۆمبێلی شەخصی بەکار نەهێنرێت.
5- بۆ بەدواداچوون و زانیاری تکایە پەیوەندی بە سکرتاریەتی ئەنجوومەن و لیژنەی داکۆکییەوە بکەن:
- ئازاد حەمەدەمین: نەقیبی ڕۆژنامەنووسان 07504458197
- ئەنوەر حسێن: جێگری نەقیب 07701535029
- هەندرێن ئەحمەد: سکرتێری ئەنجوومەن 07504472264
- ئەکەد موراد: ئەندامی ئەنجوومەن 07504513423
- خۆشناڤ جەمیل: ئەندامی ئەنجوومەن 07504509838
- نەزاکەت حسین: سەرۆکی لیژنەی داکۆکی 07701550604
ئیمێلی سەندیکا: info@kurdjs.com
سکرتاریەتی ئەنجوومەنی سەندیکای ڕۆژنامەنووسانی کوردستان
#04-04-2020#

پاشنیوەڕۆی ڕۆژی 10 ی ئۆکتۆبەری 2015 کۆمەڵێک خۆپیشاندەر لەشاری سلێمانی هێرشیان کردەسەر نووسینگەی تۆڕی میدیایی ڕوداو، خۆشبەختانە زیانی گیانی بەدواوە نەبوو، هەرزوو هێزەکانی پۆلیس و چالاکیە مەدەنیەکان گەیشتنە شوێنی ڕووداوەکەو کۆنترۆڵی بارودۆخەکەیان کرد..
بەڵام زەرەرو زیانێکی ماددی زۆر بەر باڵەخانەی نووسینگەکە کەوت..
ئێمە وەک سەنتەری میترۆ بۆ داکۆکی لە مافی ڕۆژنامەنووسان و لقی سلێمانی سەندیکای ڕۆژنامەنووسانی کوردستان و ئیدانەی ئەم هێرشەو هەموو جۆرە هێرش و توندوتیژیەک دەکەین کە بەرامبەر بە میدیاو میدیاکاران و نووسینگەکانی میدیا بکرێت..
داواکارین کاری میدیاو دەسەڵاتی چوارەم تێکەڵ بە سیاسەت و دەسەڵاتەکانی تر نەکرێت و لەلایەن خۆپیشاندەران و هێزەکانی پۆلیسیش بە چاوی گومانەوە لە میدیاکاران نەڕوانن و بیانپارێزن..
پایتەختی ڕۆشنبیری دەبێت لە ڕووی سەرجەم کایە ژیانیەکان و ڕۆشنبیریەکانەوە شارێکی سپی و پاک بێت و میدیا لەم سنوورەدا دەبێت ئازادانە کاری خۆی بکات.. چونکە گەر میدیا ڕێگری لێبکرێت ئەوا دەنگی ناڕازی و نارەزاییەکان ونارازییەکان کێ بیگەیەنێت؟؟؟
لقی سلێمانی سەندیکای ڕۆژنامەنووسانی کوردستان
سەنتەری میترۆ بۆ داکۆکی لە مافی ڕۆژنامەنووسان
10-10-2015

خەندان ڕەهێل سەمەد
بڕیارە لەچەند ڕۆژی داهاتوو دوازدە هەمین ڕاپۆرتی شەش مانگی پێشێلکارییەکان بەرامبەر بە ڕۆژنامەنووسان بڵاو بکرێتەوە و بە گوێرەی وتەی بەرپرسان سەندیکای ڕۆژنامەنوسانی کوردستان لەم ڕاپۆرتەدا دزینی بابەتی ڕۆژنامەنووسی لە لایەن کاڵەکان لە یەکتر بە پێشێلکاری هەژمار دەکرێت، ئاماژە بەوەدەشکرێت پێشێلکارییەکانی شەش مانگی ڕابردوو زیادیکردووە.
حەمید بەدرخان، سەرۆکی لیژنەی داکۆکی لە ئازادی ڕۆژنامەنووسی و مافی ڕۆژنامەنووسان بە خەندانی ڕاگەیاند: ئامادەکارییەکان بۆ ڕاگەیاندنی دوا ڕاپۆرتی شەش مانگی 2013 کە بە ڕاپۆرتی 12 دادەنرێت، لەبارەی پێشێلکارییەکانیشەوە بەرامبەر بە ڕۆژنامەنووسان تەواوکراوە و لەچەند ڕۆژی داهاتوودا ئه و ئامارانە ڕادەگەیەنن.
حەمید بەدرخان وتیشی: "رێژەی پێشێلکارییەکانی شەش مانگی ڕابردوو بە بەراورد بە شەش مانگی پێشتر زیادیکردەوە، ئەویش زیاتر لە مانگی ئەیلولی 2013 تۆمارکراوە، کە مانگی هەڵبژاردنی پەرلەمانی کوردستان بوو".
سەرۆکی لیژنەی داکۆکی لە ئازادی ڕۆژنامەنووسی و مافی ڕۆژنامەنووسان ئەوەشی خستەروو: "راپۆرتی ئەمجارە جیاواز دەبێت لە ڕاپۆرتەکانی دیکە، چونکە لەم ڕاپۆرتە دزینی بابەتی ڕۆژنامەوانی لەنێوان کەناڵەکان بە پێشێلکاری هەژماردەکرێت، بۆ ئەمەش لە ڕاپۆرتەکە باسی لێوە دەکرێت".
بەدرخان ئاماژە بەوەشدەکات: هاوکات پێشێلکاری خودی کەناڵەکان بەرامبەر بە ڕۆژنامەنووسان بە هەمانشێوە بە پێشێلکاری دانراوە و له و ڕاپۆرتەی بڵاوی دەکەنەوە ئاماژە به و کەناڵانە دەکەن کە پێشێلکاریان بەرامبەر بە ڕۆژنامەنووسان ئەنجامداوە.
لە ڕاپۆرتی شەش مانگی یەکەمی ساڵی 2013 کە بەراپۆرتی 11 دەناسرێت، 20 پێشێلکاری بەرامبەر 30 ڕۆژنامەنووس ئەنجامدراوە، له و 20 پێشێلکارییە، سێ حاڵەتی دەستگیرکردن و شەش حاڵەتی لێدان و هەشت حاڵەتی ڕێگەنەدان و سێ حاڵەتی هەڕەشەکردن لە ڕۆژنامەنووسان تۆمارکراوە.
- 11-01-2014

هاوکاری ئازیز ئاکۆ محەممەد، بەڕێوەبەری تۆڕی میدیایی ڕووداو
هاوکارانی بەڕێز لە تۆڕەکەدا.. ڕۆژنامەنووسانی کوردستان
بەناوی ئەنجوومەنی سەندیکای ڕۆژنامەنووسانی کوردستان، گەرمترین پیرۆزبایتان لێدەکەین، بەبۆنەی بەخشینی خەڵاتی (ریکاردۆ ئورتیگا) لە نەتەوەیەکگرتووەکان بە مەجید نیزامەدین گلی، ئەندامی کارای سەندیکا و میدیاکاری کەناڵی ڕووداو. ئەم خەڵاتکردنە نموونەیەکی بەرزی پابەندبوون بە ئیتیکی ڕۆژنامەنووسی و بێلایەنی لە گەیاندنی زانیاریدا، لەسەر ئاستی نێودەوڵەتیدا تۆمارکرد.
خەڵاتکردنی تۆڕی میدیایی ڕووداو وەرچەرخان و سەرکەوتنێکی گەورەی میدیای کوردستانە لەسەر ئاستی نێودەوڵەتیدا و پاڵپشتییەکی بەهێزیشە بۆ پەیام و دۆزی سیاسی خەڵکی کوردستان.
ئەم ڕێزلینان و خەڵاتکردنە بەڵگەی ڕاستگۆیی و بێلایەنی و، ئەنجامی شەونخوونی و کاری بەردەوامتانە لە مەیدانی ڕۆژنامەگەریی کوردیدا.
پیرۆزە.. خوازیاری ئەوەین هەردەم لە بەرەوپێشچوون و پێشکەوتندا بن.
ئازاد حەمەدەمین، نەقیبی ڕۆژنامەنووسانی کوردستان
6/ دیسێمبەری/2018
#04-12-2018#
⚠️ تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!

لقی هەولێری سەندیکای ڕۆژنامەنووسانی کوردستان ڕایگەیاند کە تەنیا لە ماوەی (10) ڕۆژی ڕابردوودا لە هەولێر (3) حاڵەتی هەڕەشە و توندوتیژی بەرامبەر بە دوو ڕۆژنامەنووس و نووسەرێک ئەنجامدراوە، داواش لە لایەنی پەیوەندیدار دەکات بەدوادچوون و لێکۆڵینەوە لەم ڕووداوانە بکەن و کەسانی سەرپێچیکار سزا بدرێن.
لە ڕاگەیەندراوێکدا کە وێنەیەکی بۆ خەندان نێردراوە لقی هەولێری سەندیکای ڕۆژنامەنووسانی کوردستان ڕایگەیاند کە تەنیا لە ماوەی (10) ڕۆژی ڕابردوودا لە هەولێر (3) حاڵەتی هەڕەشە و توندوتیژی بەرامبەر بە دوو ڕۆژنامەنووس و نووسەرێک ئەنجامدراوە.
لە ڕاگەیەندراوەکەدا هاتووە "یەکەمیان لە شەوی 8/7 لە لایەن کەسێکەوە بە ژمارەیەکی نەناسراو هەڕەشە لە هاوکار حەمەد پەیامنێری کەناڵی ئاسمانی پەیام لە هەولێر کراوە".
ئاماژە بەوەشدراوە کە "رۆژی 15/7 یش لە کاتی بەڕێوەچوونی هەڵبژاردنی نوێنەرانی لقی هەولێری سەندیکای پارێزەران پەلاماری هۆشمەند سادق پەیامنێری کەناڵی ئاسمانی (k.n.n) لە هەولێر دراوە".
ئەوەش خراوەتەڕوو کە "نیوەڕۆی ڕۆژی 17/7 لە بەردەم ماڵەکەی خۆیدا لە لایەند چەند کەسێکی نەناسراو و بە ئامێری بریندارکەر پەلاماری دکتۆر مستەفا زەنگەنە نووسەرو ئەدەیب و مامۆستای زانکۆ دراوە و بریندار کراوە".
لە ڕاگەیەندراوەکەدا لقی هەولێری سەندیکا و لیژنەی داکۆکی لە ماف و ئازادی ڕۆژنامەنووسان، وێڕای ئیدانەکردنی هەموو ئەو هێرش و پێشێلکاریانەی لەم ماوەی ئەم 10 ڕۆژدا کراونەتە سەر نووسەران و ڕۆژنامەنووسان داوا لە لایەنی پەیوەندیدار دەکەن لە چوارچێوەی یاسادا بەدوادچوون و لێکۆڵینەوە لەم ڕووداوانە بکەن و کەسانی سەرپێچیکار سزا بدرێن.
- 22-07-2013

خەندان-رەهێل سەمەد
ئەمرۆ دووشەمە 10ی‌ شوباتی‌ 2014، سەندیکای‌ ڕۆژنامەنوسانی‌ کوردستان لە کۆنگرەیەکی‌ ڕۆژنامەنوسی لە شاری‌ هەولێر، بە ئامادەبوونی‌ نەقیبی‌ ڕۆژنامەنوسان وسەرۆکی‌ لیژنەی‌ داکۆکی‌ لە ئازادی‌ ڕۆژنامەنوسی و مافی‌ ڕۆژنامەنوسان و ژمارەیەک لە ئەندامانی‌ ئەنجومەنی‌ سەندیکا، ڕاپۆتی‌ شەش مانگی‌ کۆتایی ساڵی‌ ڕابردووی لە ماوەی نێوان 01-07-2013 بۆ 31-12-2013 ی‌ تایبەت بە پێشێلکارییەکان بەرامبەر بە ڕۆژنامەنوسانی‌ ڕاگەیاند.
لاپەرەکانی‌ ڕاپۆرتەکە کە بە وێنەی‌ شەهید کاوە گەرمیانی‌ دەستپێدەکات، حاڵەتەکانی‌ تیرۆرکردن و هەوڵی‌ تیرۆرکردن و لێدان و ڕێگانەدان و هەڕەشە و دەستگیرکردن و سوکایەتی‌ لەخۆ دەگرێت، بە گوێرەی‌ ئه و ڕاپۆرتە لە ماوەی‌ 01-07-2013 بۆ 31-12-2013 یەک حاڵەتی‌ تیرۆرکردن تۆمارکراوە ئەویش ڕۆژنامەنووس، کاوە گەرمیانیە، لەگەڵ حاڵەتێکی‌ هەوڵی‌ کوشتن بەرامبەر ڕۆژنامەنوس ڕەنجدەر ئیبراهیم.
هەرلە ڕاپۆرتەکەدا هاتووە، له و ماوەی ئه و شەش مانگەدا هەشت حاڵەتی‌ لێدان بەرامبەر بە 20 ڕۆژنامەنوس و کامێرامان لە هەرێمی‌ کوردستان ئەنجامدراوە، لەگەڵ پێنج حاڵەتی‌ ڕێگانەدان و نۆ حاڵەتی‌ هەرەشەکردن و دوو حاڵەتی‌ سوکایەتی‌ و و یەک حاڵەتی‌ دەستگیرکردن تۆمارکراوە.
بە بڵاوکردنەوەی‌ ئەم ڕاپۆرتە، کۆی‌ گشتیی‌ ڕێژەی‌ پێشێلکاریەکان لەماوەی‌ شەش مانگی‌ کۆتایی ساڵی‌ ڕابردوو بەرامبەر بەر ڕۆژنامەنوسان، دەگاتە 27 حاڵەت بەرامبەر بە 42 ڕۆژنامەنووس، ئەمە لەکاتێکدا لەشەش مانگی‌ یەکەم 20 پێشلکاری‌ بەرامیەر 30 ڕۆژنامەنوس ئەنجامدرابوو، ئەمە جگەلە هەندێک حاڵەتی‌ دیکە کە تۆمار نەکراون، بەمەش ڕێژەی‌ پێشێلکارییەکان بەرامبەر بە ڕۆژنامەنووسان لەشەش مانگی‌ دووەم بەرامبەر شەش مانگی‌ یەکەمی‌ ساڵی‌ ڕابردوو، زیادی‌ کردووە.
دوای‌ کۆنگرەی‌ دووەمی‌ سەندیکای‌ ڕۆژنامەنوسان کە لە کۆتایی ساڵی‌ 2007 بەرێوەچوو، سەندیکا هەرشەش مانگ جارێک ڕاپۆرتێک لە بارەی‌ پێشێلکارییەکانی‌ بەرامبەر بە ڕۆژنامەنوسان بڵاو دەکاتەوە و ئاراستەی‌ لایەنی‌ پەیوەندار و ڕای‌ گشتی‌ دەکات، تائێستاش 12 ڕاپۆرتی‌ له و جۆرە بڵاوکراوەتەوە.
- 10-02-2014

لقی سلێمانی سەندیکای ڕۆژنامەنوسانی کوردستان، داوا لەدەزگاکانی ڕاگەیاندن دەکات، لەکاتی دەستپێکردنی هەڵمەتەکانی بانگەشەی هەڵبژاردن،ڕەچاوی ئیتیکی ڕۆژنامەوانی بکەن و ڕێز لەیاساو داب و نەریت بگرن و کەسایەتیەکان، نەشێکنن..
بڕیارە ڕۆژی 15/4 ‌ بانگەشەی هەڵبژاردنەکانی ئەنجومەنی نوێنەرانی عیراق دەستپێبکات کە 23 لیستی هەڵبژاردن لە هەرێمی کوردستان بەشداری پرۆسەکە دەکەن.
لقی سلێمانی سەندیکای ڕۆژنامەنوسانی کوردستان و بەشێک لە ڕۆژنامەنوسانی سنوورەکە و چالاکوانانی کۆمەڵگەی مەدەنی ڕۆژی 12/4 لەهۆڵی ڕۆژنامەنووس بەهرۆز ڕەحیم کۆبوونەوەو لەپاشان لەپرێس کۆنفرانسێکدا داوایان کرد بانگەشەی هەڵبژاردنەکان دووربێت لە توندوتیژی و زمانی زبر و بارگرژی.
سکرتێری لقی سلێمانی ڕۆژنامەنوسانی کوردستان وتی: بارودۆخی کوردستان نەخوازراوەو هەڵناگريَت بەموهاتەرات و پەیامی توندو تیژو نەشیاو مێشک و دڵ و دەروونی خەڵک زیاتر جەنجاڵ بکرێت و ڕەشی لێ ببیتە سپی و سپی لێبکرێتە ڕەش..
رۆژنامەنووسانيش لە نوسراوەکەیاندا نووسیویانە هەموان دەزانن چەند ڕۆژێکی دیکە دەکەوینە هەڵمەتی بانگەشەی هەڵبژاردنەوە، هەر لە ئێستاوە تەپوتۆزی شەڕی بانگەشە باڵی کێشاوە بەسەر بانگەشەی هەڵبژاردندا کە بەداخەوە ئەمەش هێمای ئەوەمان پێدەدات کە ڕۆژانی بانگەشەی هەڵبژاردن ڕۆژانێکی سەخت و پڕ لە کێبڕکێ و گرژی دەبێت.
لە بەیاننامەکەدا ئاماژە بەوەشکراوە، لەماوەی چەند ڕۆژی پێشوودا تا ئێستاشی لەگەڵ بێت هەندێک لەلایەنەکان لە ڕێگەی میدیا و سۆشیال میدیا کەوتونەتە گیانی یەکترو میزاجی گشتییان تێکداوە، ئەمەش وادەکات خەڵکی لە بری ململانێیەکی ئاشتیخوازانە پەنا بۆ جۆرێک لە توندوتیژی ببەن.
هەروەها هاتوە ئەوەی ئەمجارە لە پێشوو جیادەکاتەوە ئەوەیە کە هەندێک لایەن تەنها میدیا فەرمییەکانیان بەکارناهێنن بەڵکوو لە ڕێگەی میدیای سێبەر و پەیج و ئەکاونتە ساختەکانیانەوە یەکتر دەشکێنن.
داواش لە هێز و لایەنە سیاسیەکانی هەرێم دەکەن لە ئاست ئەو بارگرژییە بێنە خوارەوە و لەوە تێبگەن کە بڕواهێنان بە دەنگدەر و کۆکردنەوەی دەنگ لە ڕێی یەکتر شکاندنەوە نابێت، داواش لە لایەنگرانی تەواوی هێزە سیاسیەکان دەکەن کە بانگەشەی هەڵبژاردنەکان ماوەیەکی کەمە و هێندە هەڵناگرێت لایەنە سیاسییەکان کێشە لەگەڵ براکانیان دروست بکەن.
هاوکات لقی سلێمانی سەندیکای ڕۆژنامەنوسانی کوردستان چەند ڕێنماییەکی بڵاوکردەوە وداوای کرد کە میدیاکاران و کەناڵەکانیان پابەند بن بەو خاڵانەوە تا پرۆسەیەکی تەندروستی بانگەشەی هەڵبژاردنەکان بەڕَێوە بچێت و دووربێت لە تەشهیر و زمانی زبر.
رێنماییەکانی لقی سلێمانی بۆ هەڵمەتی هەڵبژاردن
1- تۆمەتبارنەکردنی لایەن و قەوارەو تاقمی بەرامبەر بەبێ بنەماو بەبێ بەڵگەی یاسایی..
2- ڕەچاوکردنی زمان و پاراستنی زمانی میدیا لە زاراوەی ناشایستەو نەشیاو..
3- بەشداری پێنەکردنی منداڵان لەکۆڕو کۆبوونەوەو مەراسیمەکاندا.. وەک ئامێرێک بۆشەڕەپەڕۆ بەکارنەیەن، چونکە کاردانەوەی دەروونی خراپی لەسەر پاشەرۆژیان دەبێت..
4-پاراستنی حورمەت و ئایین و ئایینزاو و کلتورو هەست و نەستی تاکی کورد و کەمەنەتەوایەتیەکانی تری کوردستان تەنانەت لە دانانی کۆمێنتەکانیشدا..
5- ئەو کەناڵانەی تا ئێستا مۆڵەتی ڕەسمییان نیە یان نەوەستاون تا دەرچوونی بڕیاری مۆڵەت.. دەست بەکاربوونی هەندێک لەو کەناڵانە، لەبانگەشەدا دەبنە ئامانجێکی ئاسان بۆ ڕاگرتن یان داخستن..
6-تۆخ نەبوونەوەی تەواوی بەرژەوەندی تاک بە سەر بەرژەوەندی گشتییەوە لەزمان و پەیام و بەکارهێناندا، با بیرمان نەچێت میدیا بۆ تاکەکەسەکان دروست نەکراوە و موڵکی بیری گشتییە..
7-پەنا نەبردن بۆ سڕینەوەی مێژوو خەباتی حزب و لایەن وتاقم و کەسایەتی تر کە لای ئەوان پیرۆزییەو لێدان و بریندار کردنی بەرامبەر گرژی لێدەکەوێتەوە..
8-دەست نەبرێت بۆ سنووری ڕەفتارو ئەخلاق و ناوناتۆرەو و ڕەوشتی تاکەکان چ سەرۆک لیستەکان یان کاندیدەکان..
9-پاراستنی حورمەتی خێزان و کلتوری کوردەواری و پەنا نەبردنە بەر هەندێک زاراوەو وشەی ئەوتۆ کە لەم چەند مانگەی ڕابردوودا زۆر بە بێشەرمانەوە لە هەندێک کەناڵدا بەکارهاتوە..
10-رەچاوی بارودۆخی تایبەتی سلێمانی لەم هەڵمەتەدا بکرێت.. کە زۆرینەی لیست و قەوارەکان بنکەی سەرەکیان لەم شارەدایە..
11-بیرمان نەچێت ئەم هەڵمەتە بۆ بانگەشەی هەڵبژاردنی بەغدایە و دەرئەنجام هەموو دەنگەکان لەودیوی حەمرینەوە دەبنەوە بەیەک..
گەر ڕەچاوی جوانی و پیرۆزیەکانی یەکتر نەکەین،دەشێت هەرچی شارستانیەت و مەدەنیەتمان لەماوەی ئەم 26 ساڵەدا بنیات ناوە هەمووی لەدەست بدەین.
بۆیە هیوادارین و داواکارین کەناڵەکانی میدیای بینراو بیستراو خوێنراو ئەلەکترۆنی ڕەچاوی ئەم ڕێنماییانە بکەن..
لقی سلێمانی
سەندیکای ڕۆژنامەنووسانی کوردستان
12/4/2018