بوڕهان سەعید سۆفی
#پێشمەرگە#ی دێرین و فەرماندە و ئەندامی(کۆمیتەی سەرکردایەتی) #یەکێتی نیشتمانی کوردستان#ە، لەساڵی(1962) لەشاری(#هەولێر#)ی پایتەختی هەرێمی کوردستان چاوی بەژیان هەڵهێناوە، قۆناغەکانی خوێندنی بنەڕەتی(سەرەتایی و ناوەندی) و ئامادەیی(پیشەسازی) لە شاری هەولێر تەواو کردووە.
لەتەمەنی(17)ساڵیدا ساڵی(1979) پەیوەندی به ڕێکخستنەکانی(#کۆمەڵەی ڕەنجدەرانی کوردستان#)ەوە دەکات، لەتەمەنی(19) ساڵیدا لەمانگی حوزەیرانی ساڵی(1981) لە(قوەتی خۆشناوەتی) چەکی پێشمەرگایەتی لەشان دەکات.
لەتەمەنی(20)ساڵیدا ساڵی(1982) وەک پێشمەرگە بەشداربووە لە ئۆپەراسیۆنی(هێزی پشتیوانی) لە #ڕۆژهەڵاتی کوردستان# بۆ بەهێزکردنی بەرگری هێزەکانی(حزبی دیموکراتی کوردستانی ئێران) بەرامبەر بە پێشڕەوییەکانی پاسدارانی کۆماری ئیسلامی هەر لە هەمان ساڵدا لەکەرتی(3)ی تیپی(83)ی(هەورێ) دەکرێتە(فەرماندەی مەفرەزە).
سالی(1983) دەگوازرێتەوە تیپی(85)ی بەڕانەتی دەکرێتە(جێگری فەرماندەی کەرت) له و ماوەیەدا خۆی و سێ برای(نەهرۆ و شەهید سەردار و سەرتیپ) پێشمەرگەبوون، هەر به و هۆیەشەوە دەزگا ئەمنیەکان(دایک و زڕدایک و چوار برای و خوشکێک)ی دەستگیرکران، ناچار(باوک و دوو برای) ناچار بوون شار بەجێ بێڵن بچنە ناوچەکانی ژێردەسەڵاتی پێشمەرگه و ساڵی(1984) دەستگیرکراوەکانیش ئازاد دەکرێن لە(#سماقوڵی#) دەگیرسێنەوە‌.
لەبەر لێهاتویی زوو کراوە بەفەرماندەی کەرت لەتیپی(85)ی بەڕانەتی و بەشداری چەندین نەبەردی و قارەمانێتی پێشمەرگانەی بێ وێنەی کردووە وەک(گرتنی هیران و #دێگەڵە# و #تەقتەق# و شەڕی12ڕۆژەی دۆڵی سماقوڵی ساڵی1987) و ئۆپەراسیۆنی گرتنی(سەری ڕەش) وشەڕی بەرگریکردن لەسەرکردایەتی ساڵی(1988)، جگە لەکۆمەڵێک لە شەڕەکانی(دەشتی هەولێر و کەندیناوە و قەراج و بەڕانەتی و ناو شاری هەولێر).
لەدوای ئەنفالەکاندا لە مانگی(ئاب)ی 1988 ەوە تاوەکو(تشرینی یەکەم)ی 1989 لەسنوری(دەشتی هەولێر) بۆ ماوەی(14) مانگ لەناوجەرگەی دوژمن پارتیزان بووە.
ساڵی(1990) لەگەڵ ڕێکخستنەوەی هێزی پێشمەرگەی کوردستان دەکرێتە فەرماندەی تیپی(93ی #کۆیە#) و پێش ڕاپەڕینی 1991 جارێکیتر بۆ هەماهەنگی جەماوەر و پێشمەرگە بە پارتیزانی دێتەوە بۆ دەشتی هەولێر، لەڕاپەریندا ڕۆڵێکی بەرچاوی بینیوە لە شاری هەولێر، دوای ڕاپەرینیش ڕووبەرووی ئه و هێزەی سوپای عێراق ‌بۆوە کە لە #موسڵ#-ەوە بەره و هەولێر دەهاتن لە نزیک شارۆچکەی(خەبات) له و ڕووبەڕوو بونەوەیە(بریندار) دەبێت، پاش ماوەیەک دەکرێتە فەرماندەی(بەتالیۆن) و دواتر فەرماندەی(هێزی 10ی دەشتی هەولێر)، ساڵی(1993) دوای یەکخستنی هێزی پێشمەرگە و دروستبوونی سوپای یەکگرتووی کوردستان بووە فەرماندەی(لیوای 40ی #ئاکرێ#)، ساڵی(1995)دەکرێتە فەرماندەی(لیوای تایبەت)، ساڵی(1996) ڕووبەڕووی سوپای عێراق بۆوە لەشاری هەولێر لەزۆربەی شەڕەکانی بەرۆکی یەکێتی نیشتمانی کوردستانی گرتۆتەوە بەشداری کردووە بەشەڕە نەگریسەکانی ناوەخۆش، ساڵی(2001) لە کۆنگرەی(2)ی یەکێتی نیشتمانی کوردستان بە ئەندامی(کۆمیتەی سەرکردایەتی) یەکێتی نیشتمانی کوردستان هەڵبژێردراو، دواتر بووە(کارگێڕی فەرماندەیی گشتی هێزی پێشمەرگە)، لەشەڕە ناوخۆییەکاندا لە(چوارتا) جارێکیتر(بریندار) دەبێت، ساڵی(2003) لەسنوری پارێزگای(#هەڵەبجە#) لەشەڕی(پشتیوانانی ئیسلام) بەشداریکردووە لە(بیارە).
لەساڵی(2005-2010) وەزیری(گواستنەوە و گەیاندن) بووە لە حکومەتی هەرێمی کوردستان، هەمیشە یەکێک بووە لە ڕیفۆڕم خوازەکانی ناو یەکێتی نیشتمانی کوردستان و لەساڵی(2018)ەوە بەر لە هەڵبژاردنەکانی30-9-2018 پەرلەمانی کوردستان کراوە بە لێپرسراوی(مەڵبەندی 14ی ڕێکخستنی کۆیە)ی یەکێتی نیشتمانی کوردستان و بە ماوەیەکی کەم لە کارکردندا دەنگە ناڕازییەکانی یەکێتی نیشتمانی کوردستانی لە سنوری مەڵبەندەکەی کەمکردەوه و یەکێتی بۆوە‌ حزبی یەکەمی سنوری کۆیە.

فەرماندەیەکی دێرینی #یەکێتیی نیشتمانیی کوردستان# وەک شایەتحاڵێک چەند ڕاستییەکی ڕووداوەکانی خیانەتی 31ی ئاب ئاشکرا دەکات و دەڵێت:ئەو میللەتەی بە دە هەزاران شەهیدی داوە لەسەرجەم شۆڕشەکاندا لەپێناو پارێزگاریکردن لە خاکی پیرۆزی کوردستان، تاوەکوو حکومەت و پەڕڵەمان و قەوارەیەکی سیاسیمان هەبێت، بەداخەوە بە دەبابەی سەدام حسێن پەڕڵەمان و حکومەتی هەرێمیان داگیرکرد.

فەرماندەی دێرینی یەکێتی #بورهان سەعید سۆفی# لەمیانی بەشداریکردنی لە بەرنامەیەکی تایبەتیی تەلەڤزیۆنی گەلی کوردستان-دا بەمشێوەیە چیرۆکی خیانەتی 31ی ئاب دەگێڕێتەوە و دەڵێت:دەمژمێر 10:00ی شەو جەنابی کاک کۆسرەت بانگی کردم کە چەند سەرکردەیەکی دیکەش لە ژوورەکەی دانیشتبوون، لێی پرسیم بەبڕوای تۆ چۆن شەڕەکە دەستپێدەکات، وتم لەوانەیە وەک ڕاپەڕین دەستپێبکات بەوپێیەی زۆربەی هێزەکانی ئێمە لە عەنکاوەیە ڕەنگە زۆر تەرکیز بکەنە سەر ڕێگای گوێر و گەزنە و کانی قرژاڵە، دواتر میحوەرەکان دابەشکرا من سەر لەشکری 4 بووم، هێزەکەی ئێمە بۆ پارێزگاریکردن بوو لەبارەگای سکرتاریەت تاوەکوو هێزەکان زوو نەگەنە ئەوێ زۆرتر ئاڕاستەکەمان ڕووبەڕوی پارتی بوو، دەمژمێر 6:00ی سەرلەبەیانی کاک کۆسرەت شەهید فاروقی ناردە لام وتی کاک کۆسرەت دەڵێت هێزی تیپی کۆڕایم بۆ بنێرێت بۆ ڕێگای گوێر، دواتر کاک کۆسرەت ناردی بەداوی خۆمدا و وتی نزیکەی 200 کەس لەگەڵ خۆت بهێنەو بگەرە ناو هەولێر.

ئازایەتی پێشمەرگە بێ سنوور بوو

ئێمە بۆ پارێگاریکردن لە هێزەکانمان و بۆ کەشفکردنی ڕێگەکە تاوەکە هێزەکانمان شەو بە سەلامەت دەربچن، لەگەڵ شەهیدی فەرماندە شەهید ستار کەرکووکی، بۆ وەستاندنی هێزەکانی ئێراق لە ڕێی بنەسڵاوە 13 شەهیدماندا کە چەندین دەبابە بوون هێرشیانکردە سەر باداوا، تا نیوەڕۆ مقاوەمەیەکی باشمانکرد، بەڵام باڵانسی هێزمان نەبوو یەکێتی چەکی قوورسی نەبوو، ئەگەر ئازایەتی پێشمەرگەکانمان نەبوایە نەمانەتوانی نیودەمژمێریش بەرانبەر هێزی ئێراق شەڕبکەین، ، بورهان سەعید سۆفی وایوت

وتیشی:دواتر لەسەر جادەی شەستی سەیتەرەیەکمان دانا و هەندێک پێشمەرگەی پارتی بەدیل گیران، ئێمە هەر لەو گەڕەکە ماینەوە و دوای تکایەکی زۆر لەکاک کۆسرەت کە ڕازی نەدەبوو هەولێر بەجێبهێڵین، دەیوت تا دوا نەفەس شەڕدەکەین، پاشان ڕازیمانکرد و لەدەوروبەری هەولێر هێزەکانمان کۆکردەوە و هێزێکمان لەدەوروبەری هەولێر دانا، بەمشێوەیە لە ڕۆژی 31 ئاب تا توانیمان بەرگریمان کرد.

سەر بۆ بەعس و ماڵ بۆ پارتی....هەولێر تاڵانکرا
بورهان سەعید سۆفی باسی ڕێککەوتنەکانی پارتی دەکات لەگەڵ حکومەتی بەعس و دەڵێت: پێمانوانەبوو پارتی دیموکراتی کوردستان بەو ڕادەیە خیانەتکاربێت، ئەو میللەتەی بە دە هەزاران شەهیدی داوە لەسەرجەم شۆڕشەکاندا لەپێناو پارێزگاریکردن لە خاکی پیرۆزی کوردستان، تاوەکوو حکومەت و پەڕڵەمان و قەوارەیەکی سیاسیمان هەبێت، بەداخەوە بە دەبابەی سەدام حسێن پەڕڵەمان و حکومەتی هەرێمیان داگیرکرا، دوای ئەو هەموو هەوڵەی میللەتی کورد بۆ بەدەستهێنانی قەوارەیەکی سیاسی و پەڕڵەمان دای، بچێت پەنا بباتە بەر حکومەتی بەعس و خەونی کورد کەسەدان ساڵە هەوڵی بۆ دەدات بشێوێنیت، پارتی لە هەولێر تەڕ و وشکیان بە یەکەوە سووتاند و بەدوای تاڵانییەوە بوون بە جۆرێک سەر بۆ حکومەتی ئێراقی و ماڵ بۆ پارتی، هەتا 4 بۆ 5 ڕۆژیش لە هەولێر تاڵانی بوو.[1]

دەقی پرسەنامەکەی بورهان سەعید سۆفی:
بەداخ و پەژارەیەکی زۆرەوە هەواڵی شەهیدبوونی فەرماندەی هێزی کۆماندۆی کوردستان (ئاکام عومەر)م پێگەیشت. شەهید ئاکام نمونەی فەرماندەیەکی قارەمان و دڵسۆزی گەلەکەمان بوو، بۆ هەمیشە لەیادماندا دەمێنێتەوە.
بەو بۆنە خەمناکەوە پرسە و هاوخەمی خۆم ئاڕاستەی بنەماڵە و خزم و دۆستانی دەکەم، لە یەزدانی مەزن داواکارم جێگای شەهیدی نەمر بەهەشتی بەرین بێت و دواناخۆشی خانەوادە بەڕێزەکەیان بێت.
انالله وانا اليه ڕاجعون
بورهان سەعید سۆفی
ئەندامی مەکتەبی سیاسی و
لێپرسراوی مەکتەبی شەهیدان و تێکۆشەران[1]

تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!

دەقی پرسەنامەکەی بورهان سەعید سۆفی:
هەڤاڵی بەڕێز کاک کۆسرەت ڕەسوڵ
سەرۆکی ئەنجومەنی باڵای سیاسی و بەرژەوەندی #یەکێتیی نیشتمانیی کوردستان#
بەداخ و پەژارەیەکی قوڵەوە هەواڵی کۆچی دوایی خاتوو (زوبەیدە سەعید ئۆمەر) دایکی بەڕێزتانم پێگەیشت.
خاتوو زوبەیدە سەعید یەکێک بوو لەو ژنە تێکۆشەرانەی کە شانبەشانی بەڕێزتان و بنەماڵە تێکۆشەرەکەتان تەواوی ژیانی خۆی بۆ کوردایەتی و یەکێتیی نیشتمانیی کوردستان تەرخان کرد.
بەم بۆنە خامناکەوە پرسەو سەرەخۆشی قوڵی خۆم بە ئێوەی بەڕێزو و تەواوی خزمان و کەسوکاری کۆچکردوو ڕادەگەیەنم و لە پەردەردگاری مەزن داواکارم جێگای کۆچکردوو بەهەشتی بەرین بێ و دوا کۆست و ناخۆشی بنەماڵە تێکۆشەرەکەتان بێت.
انا للە وانا الیە ڕاجعون
بورهان سەعید سۆفی
ئەندامی مەکتەبی سیاسی یەکێتیی نیشتمانیی کوردستان[1]


⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!

دەقی پیرۆزباییەکەی #بورهان سەعید سۆفی#:
بەڕێزان لەسەرنوسەر و ڕۆژنامەنوسان و کارمەندانی (PUKmedia)
لە 19هەمین ساڵیادی دامەزراندنی ماڵپەڕەکەتاندا گەرمترین و جوانترین پیرۆزباییتان ئاڕاستە دەکەم، هیواخوازم وەک چۆن تائێستا سەرچاوەیەکی متمانەپێکراوی خوێنەران بوون بەهەمان شێوە لێرە بەدواش لەسەر ئەو ڕێچکەیە بەردەوام بن.
‏PUKmedia یەکێک بووە لەزمانحاڵە جوانەکانی #یەکێتیی نیشتمانیی کوردستان# و گرنگی داوە بەسەرجەم بوارەکانی ژیانی کۆمەڵگا، لەڕووی پرنسیپەکانی کاری ڕۆژنامەوانیشەوە هەمیشە پێشەنگ بووە لە پاراستنی ئیتیکی کاری ڕۆژنامەوانی و بەرپرسیارانە پەیامەکانی بڵاوکردۆتەوە و نەریتێکی جوانی کاری میدیایی پێشکەش کردووە.
دووبارە پیرۆزبایی خۆمتان ئاراستە دەکەم و هیوای سەرکەوتن و سەرفرازیتان بۆ دەخوازم.
بورهان سەعید صۆفی
ئەندامی مەکتەبی سیاسی یەکێتیی نیشتمانیی کوردستان[1]