چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و نەوەڎ و یەکەمە
کەم کەم جە کوردایەتی پاکشېش کەردېنە، بییەن بە هەڤاڵو کومونیستاو شېعرەکېش سوور هۊرگېڵێنې! من کە دیڎم، هامکاری لېژنەو ناوچەو شوېعی قامیشلی مەکەرې؛ بەڵام بە ئەندام قبووڵ نەکریابې. ژیوایشەنە چەرمەسەریې فرېش دیڎېبېنې؛ پەی چن جارێ زیڼانی کریابې؛ ئېش و عەزیەتش چەشتەبې. زاروڵې فرې و نانی کەم، چۆپەڕو نەڎارینە مەژیوې. ژەمەو وېش و ژەن وزاروڵەیش ئەغلەب چایی و نانی وشک بې، جاری چامنە بې چاییەکەیچ نەبې.
ڕەمۆ، ڕەئیسو لێژنەی، کۊلکە خوڼەواریێش بې، هامکارێش بې نامەکېشم ویرنەمەنېنە (پاسەبزانو برۆ بې)؛ سیاو و چەرمە جە یۊی جیانەکەرېوە؛ بەڵام فرە وشک و دووئاتەشە بې، هەر واچې: من بە دەلیلې عیلمیې پەیتان ئیسپات کەرو! ڕوێ جمعەی دمای نمێ، گەلە سۆفیێ ڕیشدارې، تەسبېح بە دەسې، بە دۊعا وانای ملان پەی یانەو ڕەمۆی، ئەڎاو ڕەمۆی ماچۊ: نییەن یانەنە؛ کارتان چېشەن؟
ئاڎیچې ماچان: خودێ، خوها مە، ئەم شوعینە! هاتینە جەم ڕەمۆ، ژمە ڕا بێژێ!
واتا (ئېمە شوېعیېنمې ئامێنمې پەی لاو ڕەمۆی فېرې شوېعیەتیمان بکەرۊن).
ئەڎایچش ماچۊ: ئای، بەڵام ئەپا سەرو سۊکتۆ نماو جمعەیۆ ئامێندې پەی شوېعی فېربییەی!؟
ڕیش تووتە! ڕەمۆو من هەزار دژمانی بە ( ) مڎۊ!
کاتێ کە جە قامیشلی مەژیوېنا، خەڵکې فرې ئېنې پەی لایم. کوردې فرە تۊخې، کۆمۆنیستی، مەڵڵێ، حاجیې و گرڎ نۊعێ؛ کۊنیشتو وېرەگایامان وەشبې. جارێشا کابرێوە کە فرە کوردایەتینە گریابې، نامېش (عەبدێ تێلۆ) بې، واچې: هەریاگێ مەگنۊ میانو دیجلە و فوراتی سەرو کورڎەسانی حیسابەن و داگیرکریان. سەیدا جگەرخوێن فەرماواش: نەخێر! ئی جزیرەیچ ماڵو عەرەبییەن و ئېمە بە ناڕەوا دلېشەنە مەژیومې. عەبدێ چەمېش پڕێ تۊقۆ سەرێش، بومباخەکېش گېرت و داش وەرو شەپڵاخا. هەی نەکەری! سەیدامان چېرو دەساشەنە بەرئارد و بە عەبدێم وات جارێتەر نەیۆ دیڎەنیم، بەرمکەرد. دماو ئانەی بە ماوێ، کوردێوە دۊڵەمەڼیی حەسەکەیی بە نامې سەعید، بە ماشېنو وېش سەیدا و منش بەردیمې پەی گېڵای پەی دلې عەشاییرە عەرەبا شەممەری. شەوێشا مېمانې شېخ عوبێد نامێ بېنمې کە شېخو بەرەبابێ شەممەڕی بې. سیاویانە و قەسرەش دلې سەحرای و چن ماشینێ کادیلاکې جبەرو سیاویانەکەیشەنە مدرێبېنې. شېخ دڵوەشیم مەڎېوە کە سکرتېرش بون، ژەنیم پەی بارۊن و دۊڵەمەڼم بکەرۊن؛ دیارەن نەکەرېناش. شەوې تەماکۊم پەنە نەمەن، پا شەوې کیاستاش شارەکڵی ترکیای نزیک بە سنووری، چن نۊعە جگەرې و تەماکۊشان پەی ئاردا. عەرەبێ شارەسانی چاگە بې قەڎرێ جە قامیشلی حاکم و ئیسەیچ جە حەسەکە میانو شارەسانو جزیرەی داواکاری گردینەن، ماچۊ منیچ ئینانا چەنیتان. واران بە خوڕ مەوارې، شەوێ دلې ساراینە مەنیمێ، ڕۊی دمایین مېمانو سیاویانەو شېخێ عەرەبی کۊنە کوردی بە نامې شېخ محەممەڎی بېنمې. زوانش بەدەویانە بې (بەدەوی: هۊزێ شوانکارې دەشتەکیې کۊچەریې عەرەبې)؛ واچې؛ کوردەنا؛ پەسیېنە دژمانی بە نەسڵ و بنەچەو عەرەبی مەڎې. وەرو پیری هەر چڼگێش مەنەبێ، پەیش گېڵنایمێ ماچۊ: ژەنەراڵێ فەڕانسی ئاما پەی حەسەکەی، بە عەشاییرەکا ماچۊ: هەر سەرخېڵێ نەسەبش عەسڵە عەرەب بۊ، حقووقش پەی مەبڕوە. نۊرەم ئاما، لوانې چوەر، خەنجەرەکېم سەرو مېزەکېوە نیارە، واتم: ئانە نەسەبمەن و خەنجەرەو کوردی نامې بابایمەنە. حقووقی زیاتەرش پەی بڕیانێ. پاسەدیاربې عەشاییرې هامسێش فرە وەرش مەتەرسېنې. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]