نامې: پەروینە
نازنام: وەزیری
نامۊ تاتەی: حسێن خان
ڕۊ پېڎابییەی: #18-12-1941#
ڕۊ مەرڎەی: #18-12-2010#
یاگۊ پېڎابییەی: #سنە#
یاگۊ مەرڎەی: #لەندەن#
$ژیۋاینامە$
پەروینە، کناچی حسێن خانی موشیر وەزیری، وەچې موشیر دیوانی دوەمی، تاریخو (18-12-1941) دلې شارو سنەی ئامێنە پېڎا، دلې تەلارەو موشیر دیوانی بابایشەنە گۆرې بیېنە. موشیردیوان باباو پەروین خانمې جە زەمانو ناسرەدین شاو قاجارینە دەسەڵاتو شالیارگاو کورڎەسانیش پەنە ئەسپاریان، تەمەنو زاروڵەییش هەر دلې باڵەخانەو موشیردیوانی جە سنە دان سەر و دماتەر هەر جە شارو سنەی لوێنە وانگا. پەی درېژەدای بە وانای میانی یام سانەوی لوێنە دەبیرەسانو مەستوورەی ئەردەڵانی. دماتەر ساڵەو (1960) چەنی (ئەسعەد سیراجەدینی نەقشبەڼیی) کوڕو شېخ مەولانای کوڕو شېخ عەڵائەدینو بیارې، هامسەرگیریش کەردەن. دمای یەک ساڵی جە هامسەرگیریش جە شارو کرماشانی پېسە نویسەرې و واچەرې مەرزیێنەرە.
پەروینە، یوە بیېنە جە کیانیاکارە سەرکۆتەکانو سەردەمو وېش و پېسە پېشکەشکارێ و واچەرێ هەرمانەش کەردېنە. سەرەتاو ساڵانو شەسەکاوە تاکو ساڵەو (1979) چەنی هامسەرەکەیش دلې ئېزگەو ڕادوینینە هەرمانەش کەردېنە، دیارتەرین بەرنامەکانیشان بەرنامەو (هەوارگەی دڵان) بییەن، کە بە مەڵامەتو گۊشگېرە فراوە دمای وەڵاکەردەیۆ بەرنامەکاشا جە کرماشان، دلې ڕادوینو سنەی و شارەکانو تەریچەنە جارێ تەر وەڵێ کریێنێ، پەروین خانمە چەنی هامسەر و زاروڵەکاش ماوەو (21) ساڵان جە وڵاتو لەندەنی نیشتەجایې بیېنۑ.
چەنی هونەرمەڼی دەنگوەش مەزهەری خالقی جە ڕادوینو تارانی ئاشنێ بیېنې، چاگە بەرنامېش تۊمارې کەردېنې. پەروین خانمە، فەترێ پېسە واچەرې دلې ئېزگەو تارانی هەرمانەش کەردېنە، هەواڵە کوردې و فارسیەکېش وانێنێ، شارەزاییش جە زوانی فارسینە بە تەرزێ بییەن گەر کاتو وانایۆ هەواڵەکانە نەشناسێشا کە کوردەنە، هیچ کەس نەزانې و هەر مەرەجیېشا فارسەنە. پەروین خانمە چەنی هامسەری و زاروڵەکاش دمای فاڕیای دەسەڵاتی سیاسی جە ئېرانەنەو نەمەنەی حوکمی شایی و ئامای سەرو دۆری جمهوری ئیسلامی، ئېرانشان جیائاستەن و ئامێنې پەی کوردەسانو پانیشتی، چەنی شېخی گۆرەو نامڎارو پیرو تەریقەتو نەقشبەڼی (شېخ عوسمان سیراجەدینو بیارې) تەشریفشان ئاردەن و شارەکڵەو بیارې ماواو زاڎگاو وېشان نیشتەجایې بیېنې. دماتەر ڕاو ئاوارەیی و غەریبیشا گېرتېنەوەرو یاوێنې وڵاتانو ئۆروپای. پەروین خانمە جە ئاوارەییچەنە شان بە شانو مېردەکەیش خزمەتو ئەدەب و هونەرو میللەتەکەیشەنە بیېنە، شار بە شارو وڵات بە وڵات گېڵێنې و هەریاگێ کۊنیشتێ ئەدەبی سازیابۊ ئاڎې چاگە ئاماڎې بیېنې و بە دەنگە پەڕجووکەیش ئاوازې خەمگینې و نەرم و نیانېش یاونێنې بە گۊشې وەردەنگەکاش. چەنی ئانەیچە ئی خانمە بەهرەڎارې تاقە ئاواتش ئانەبییەن بگېڵۊوە پەی کورڎەسانی و چېگە خزمەت بە ئەدەب و فەرهەنگەکەیش بکەرۊن. مانگەو (04) ساڵەو (2010) سەردای کورڎەسانیش کەردەنۆ کە زانابېش گرفتێ تەندرووسی ئینا دلې دڵیشەنە، مانگەو (11) هەر ئا ساڵې مەگېڵۊوە پەی لەندەنی، چاگە دمای وەرگېرتەی چارەسەری، بەڵام چوونکوم قەدەرش پاسەبییەن، ڕۊ (18-12-2010) پەی هەتا هەتای چەمېش نیێنې پېوەرەو دۊس و کەس و کارو دنیاش جیائاستېنە، هەر ئا ڕووە کە ئامێنە دلې دنیێ، هەر ئەچا ڕۊو تاریخەنە دنیانە بەرشییە. تەرمەکەش ئاریاوە پەی بیارې نزیک مەشاییخانو نەقشبەڼینە بە خاکیشان ئەسپاران.
ئەسعەد ڕەشید. [1]