چن وانێ جە گوڵزارو ئەدەبیاتی
ئەڵقیٛ یوٛوەمە
ئی چنڎ وانیٛمە جە کتیٛبو ( گوڵزارو ئەدەبیاتی )ینە هوٛر گرتیٛ، کە ئیٛژا م ابراهیم میکە علی هوٛرگیٛڵنان پەی زوانی هۆرامی.
(ڕازەو گرەوە نەعنیەتەکەی)
* ئازاڎی ئا حەقەنە هەکە خوڎای بەخشان بە ئانزانی حیچ کەس حەقش نیا پسانوٛشۆ جە ئانزانیوی تەری، حەرچەنی ڕوٛح خوڎا کرداو حەر ویٛچش مبەخشوٛش و ویٛچش مسانوٛشۆ، ئەر ئانزانیٛو کەسیٛو بکوٛشوٛ بوٛ بە قاتڵ (بکوٛش) حەرپا تەشکە ئازاڎیچ خوڎا کرداو حەرکەس بگیٛروٛشۆ جە ئانزانیوی بوٛ بە قاتڵو ئازاڎی.
*زینڎان وەنگەو زینڎنانیەکان و بەریچ زینڎان و ئاکەسانە هەکە ئەسیری دەسو نەفسیشانیٛ نمەتاوا بە موٛ جە قسیٛ نەفسیشا بەرپشا.
* گرەو سەرو سەوای مەکەرە چوون ڕوٛزگارەکیٛ بە مەیلو توٛ نمەجماوە تا هەمیٛڎداربی پانەی گرەوەکەی مبەریۆ.
(داستانەو مەڕەکیٛ پەنە واتا)
* شەمشەلە کوٛرە چنڎ یاسا جە لیشکەو ڕوٛجیاری، بیٛ هاگێکیٛچ ئنڎە یاسیٛنیٛ جە قسیٛ هاگایەکا.
* ئانزان بەچیٛش بێرە حەر ئانەشە لاوە قبوڵاو بڕوا بە دنیێویٛ بەرو قبوڵ کریاکەو ویٛش نمەکەروٛ.
*ئانەی بە عەمرش مەڕەش نەوینێ بوٛ ناگاهانەنە بوزاش دلیٛ مەڕیٛویٛ قوڵی و تاریکیٛ مەڕەکیٛ مەژگش مدروٛنەو پەیش هەن حەیبەتییٛ بمروٛ.
*ئانەی بەعەمرش دلیٛ مەڕیٛنە ژیوان و بەرش نەڎیە ناگەهان باراش بەر توٛشو سامی و پەشوکیای بوٛنەو پەیش هەن شیٛت بوٛ یام بمروٛ.
(داستانەو سەروەشەکەی )
* سەروەش ئانە نیەن شەراب منوٛشوٛ
شوانیٛوەن کەشۆ گەلەی مدوٛشوٛ !
* سەروەش ئانە نیەن لوان دنیاو مەسی
دزیٛوەن چەنیت مەیوٛ خوڎا پەرسی!
* سەروەش ئانە نیەن قسیٛ دڵیٛش مکەروٛ
دوٛسیٛوەن، دژمنیچ ئانەی نمەکەروٛ!
* سەروەش ئانە نیەن بیٛ هەڎەر مگنوٛ
کەسیٛوەن خاسەش پەی ئانەین بەرگنوٛ!
شەوقی عەلی شەیدا. [1]