Nav û paşnav: Mesût Îş
Nasnav: Sîdar Roj
Cihê jidayikbûnê: Êlih
Navê dayik - bav: Şukran – Mehmet Emîn
Dîrok û cihê şehadetê: #09-01-2022# / #Wan#
SÎDAR ROJ
Axa Bakurê Kurdistanê bi berxwedana ku gelê me yê bindest di tevahiya dîrokê de li dijî dagirkeran nîşan da tê zanîn. Rêber Apo û partiya me PKK’ê ku di pêşengiya wî pêş ket, gelê me yê ku bi qirkirinê re rûbirû mabû û di hedefa tinekirinê de bû, ji nû ve zindî kir û ev berxwedan gihand serketinê. Gelê me, bi dîtina vê rastiyê re bêdudilî bi Tevgera Apoyî ve hat girêdan.
Hevrê Sîdar li Êlihê navenda berxwedanê, di nav malbateke welatparêz a ji Mêrdînê de ji dayik bû. Tevlîbûna ji nava malbatê bo refên gerîla, hişt ku ew di temenê biçûk de têkoşîna me nas bike. Hevrêyê me yê ku ji bo debara malbata xwe xebitî û perwerdehiya xwe domand, bi taybetmendiya xwe ya kedkariyê derket pêş. Di dibistanên ku ji hêla mêtingeran ve veguherî navendên asîmîlasyonê de, polîtîkayên ku ciwanên Kurd ji nasnameya wan a bingehîn dûr dixistin, dît. Tevî vê yekê, wî karî xwe biparêze. Lêgerîna wî kûrtir bû û xwesteka wî ya têkoşînkirinê mezin bû. Hevrê Sîdar bi rêya lêkolînê hewl da ku têkoşîna me ji nêz ve fêm bike. Dema ku hevrêyê me Sîdar parêznameyên Rêber Apo xwend, bersivên pirsên xwe û çareseriyên nakokiyên xwe dît. Di salên zanîngehê de, tevlî xebatan bû û rastiya gel ji nêz ve nas kir. Êrîşên DAÎŞ’ê, ku armanc dikirin Şoreşa Azadiya Rojava têk bibin û gelê me qir bikin, di hevrê Sîdar de hêrseke mezin çêkir. Wekî ciwanekî Kurd ê bi rûmet, wî qet bêdengî wekî vebijarkek nedît. Berxwedana dîrokî ya Kobanê biryara wî xurt kir. Hevrê Sîdar, ku berê dixwest tevlî gerîla bibe lê ji ber şert û mercan nekarî bigihîje armanca xwe, di sala 2014’an de gihîşt armanca xwe û bi tevlîbûna nav refên Gerîlaya Azadiya Kurdistanê xeyalên xwe pêk anî.
Hevrê Sîdar ê ku derbasî Herêmên Parastinê yên Medyayê bû û tevlî perwerdeyê bû, zû adapteyî şert û mercên dijwar ên çiyayî û jiyana gerîla bû. Hevrêtiya jidil û cewherî ya di nav gerîlayan de bandorek kûr li hevrêyê me kir. Bi tevahî hebûn û hêza xwe ji bo pêkanîna pîvanên PKK’ê û têkoşînê, bêdudilî xwe feda kir. Hevrêyê me yê ku her tim bi aliyê xwe yê kedkariyê li pêş bû, hem ji hêla îdeolojîk û hem jî ji hêla leşkerî ve pêşketinek girîng bi dest xist. Hevrê Sîdar dema ku pratîka xwe li herêma Şehîd Harûn dimeşand, ku wî wekî perçeyek bihuştê li Kurdistanê ku hemû bedewî lê kom bûne bi nav dikir, bi dilsozî û hevrêtiya xwe hezkirina hemû hevrêyên xwe qezenc kir. Hevrêyê me, ku her tim ji bo her peywirekê amade bû, di demek kurt de di jiyanê de bû pêşengek. Hevrê Sîdar, ku armanca wî ya sereke li eniyên pêş li dijî dagirkeran şerkirin bû, derbasî herêma Zagrosê bû û tevlî xebatên li herêma Zapê bû. Ji çalakiya xwe ya yekem a li dijî mêtingeran hêzek mezin girt û bi berdewamî li rêyên ku hê baştir tevlî bibe, digeriya. Hevrêyê me Sîdar, zû hînê taktîkên gerîla bû, beşdarî gelek çalakiyan bû û di lêdana derbên giran ên li artêşa Tirk de roleke girîng lîst. Hem di jiyanê de û hem jî di şer de bû pêşeng û ji bo bersiv bide pêvajoya şer kedek mezin da. Hevrêyê me, ku şerê gerîla li Bakurê Kurdistanê ji xwe re kiribû armanca sereke, bi biryardariyeke mezin li ser pêşniyara xwe israr kir. Hevrêyê me piştî tevlî perwerdehiya li akademiyeke leşkerî bû pêşniyara wî hat qebûlkirin û di sala 2019’an de derbasî herêma Botanê bû.
Hevrê Sîdar, ku tevlî xebatên li Eyaleta Wanê bû, bi aqilê xwe yê xurt û kesayetiya xwe ya afirîner zû adapteyî şert û mercên dijwar ên gerîla yên Bakurê Kurdistanê bû. Wî têkoşîna xwe bi biryardarî û bi israreke mezin meşand, hêrsa xwe ya li dijî dijmin bi çalakiyên xwe nîşan da. Ew qet qetilkirina pismamê xwe Huseyîn Îş a di sala 2006’an de ji aliyê dagirkeran ve ji bîr nekir û tolhildana hemû şehîdên me, di şexsê Şehîd Huseyîn de, kir pîvanê bingehîn ê têkoşîna xwe û bêwestan têkoşîn kir. Hevrê Sîdar, tevî hevrêyên xwe ala berxwedanê ya têkoşîna azadiyê ya gelê me li Bakurê Kurdistanê bilind kirin û bûn xwedî meşek di rêya fedaîbûnê de. Hevrê Sîdar, her tim xwe deyndarê gelê me hîs dikir, lêhûrbûnên xwe kûrtir dikir û li ser vê bingehê bû xwedî jiyanek mînak. [1]