چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و هەشتا و یەکەمە
مەبەراشان پەی قەسری شیرینی و چاگە کەراشا زیڼان، نامې سەیڎەکێشان ویرمەگنۊوە، ئۆ پاسەبانێ مەپەرسان: فڵانە سەیڎی مشناسدې؟ پاسەبان دەسێ مەگېرۊ سینەشۆو ملو ئەفسەرێ مەچڕۊ، ئەفسەرەکە ماچۊ: پەی چېشیتانەن؟
ئاڎیچی ماچان: قۊممانە!
ئەفسەرەکەیچ ماچۊ: ئېمە خوڵەو وەرو پەیا ئاغاینمې، فەرماودې بەروتان.
سەییڎ کە تومەز شېخو ئەهلو حەقین و فرەو خەڵکو شاری موریدشەن، ماچۊ: بەڵې قۆمې منەنې. نانو وېرەگایشان پەنە مڎۊ و ئەفسەرەکەی ڕامسپارۊ کە ئاگاش چەنەشان بۊن، ماراشاوە پەی زیڼانی. ساعبو ئا ڕوەیە ماراشان پەی کرماشانی.
چاگە پەنەشان ماچان: کۊگەتان گەرەکەن با بەرمېتان؟ شمە ئازادېندې!
ئاڎیچې ماچان: کرماشان مەنمێ؛ خوڎاحافیز!
بە جۊتە ملان پەی تارانی، چاگە ملا پەی یانەو عەوڵڵاغاو ئێلخانیزادەی کە مەتیەزاو قزڵجیین و فرە نزیکەن جە دیوانی. عەوڵڵاغا پەنەشان ماچۊن چارەتان نییەن، لۊدې وېتان شاردێ. قزڵجی ڕوەو کرماشان پەی لاو سەعیدی حافیدی مامۊزایش کە (مودەعیلعام) بې ملۊ. زەبیحیچ ملۊ پەی دەگاو شېخ موعتەسەمو شېخ حیسامەددینی، نزیک بە شارو سنەی؛ چەنی سۊفیێ شېخی مێوە پەی مەرزو ئېراقی؛ وېش مەکەرۊ شارو سلېمانیرە. زەبیحی واچې: سەرو جادەی نزیک بە هەڵەبجەی دەسم پەی جیبێ گېرت، سوارش کەردا. پۊلیسې ڕێ کۆتې شکە وەنەم، پەرساشا ئینە کېن، ساییقەکە ماچۊ برامەن.
پۊلیسەکە ماچۊ: دروې کەری!
ساییقەکەیچ ماچۊ: یەرە تەڵاقەم کۆتەبۊ برامەن و مەبەروش پەی سلېمانی.
نەجاتمان بی. کابرای ساییق ماچۊ: گەر پەرسێش نامېش چېشەن، چېشم واتێ؟ خۊ هەلای نامېت نمەزانو! کە یاوانې سلېمانی هەوەڵ کۊڵان وېم کەرد یانێوەرە:
واتم: واڵەکېم مېمان وەرگېردې؟
ئاڎیچە ماچۊ: سەرو چەمام، فەرماوە.
پیاکەش شەوې ئاماوە، یاوانە قاچاخەنا. قاتێ چۊخەڕانک و بیبینێش پەنەدانې. پەی سەوایش جیبێ ئاما وەربەرە پەنەش وات مەشۊم ئی کوڕەمە پەی بیاونی ئا یاگې کە وېش گەرەکەشەنە، ئەشۊ نەگېریۊ. تاکو دەشتەو کەرکوکیش بەردا و ڕاییم کەردۆ.
ماچۊ: جە بەغڎا سەرو کەلەو زەبیحی پېڎابی:
پەنەش واتا: کاکە! هەرچی پۊلیسو بەغڎایەن ئەشناساناشا، تەگبیر چېشەن؟
منیچ واتم: لوە پەی سوریای پەی لاو ئاشنێوە من!
نامېم پەی یانەو حاجۆی نویستە. سەرو ڕاسئەسپارای زەبیحی دەرەجە دوې قیتاری گېریا کە واچې بە هینو دۊڵەمەڼاش مزانان و بېشکتەرەن. زەبیحی یاوا مووسڵ و وېش یاونا سووریە و یانەو حاجۆی مەرزیارە. پەنەئەشناسێ (تەسکەرە) مەردێوەش بە نامې عیسا عەرەفاتی پېڎاکەرد و وېش یاونا شام.
سەرنام: گېریای ئۊسا برایمی
ڕوێشا واتشان ئۊسا براییم گېریان، من و جەلالی شەریکم قەرارمان دا هەر شەوێ یۊمان بلۊ پەی یانەیش، چېششان گەرەکبی پەیشان بسانمې و سەرو زەڕی پەکەشان نەگنۊن. شەوەی هەوەڵە جەلال لوا، ناماوە. کۊڵانەکەنە ئاڎیچشان گېرتەبې. ئیسەیچ نمەزانو بە چ تەرس و لەرزێوە، هەر شەوې بە فېڵێ وېم کەرد یانەشارە. ویرمەن جارێشا بە کابرێوە کە دلې کۊڵانەکەیشانە مدرابې ئەرەجیام پۊلیسەن، واتم: برا من شاگردو ئا ئۊسایە بېنا دوې ساڵې چێوەڵ، ئی سەگبابە، هەرچن کەرو هەقەکەم نمەڎۊ پەنە، کابرایچ ماچۊ: پەی وېش شوېعی بې گېریان، لوە بەشکوم ژەنەکېش پوڵەکەت بڎۊ پەنە! گەرمەو ئا تەرس و لەرزەینە کابرێوە ئاما وەرو دوکانی بە فارسی پەرساش: ئېگە ستودیۆ سەباحەن؟ بە عەرەبی واتم نمەیاووتەنە. هەر چەمې مەگېڵنېنا چکۊوە بەربشون، ئاخری نیشتەرە. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]