چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و هەشتاهەمە
یانەکە ئۆپەرو بەغڎای و نزیکو مزگی و گۊڕەو شېخ عومەری بې؛ نزیک بە چڵکاوێ. شەوېنە وەرو قېڕەقېڕو قرواقا گۊشت جە هیچیۆ نەبې، مەشی و مەشۊلېچ هەر باس مەکەرە، هەڕەو کۊڵانیچ هەشە دلېشەنە بەرنمەشۊ. نەوەشخانۆ ئامانێ پەی ئا یانەیە. دوکانەکەمۆ فرە دوور بې؛ هۊڎێوەم نزیکتەرۆ گېرت. شش یام حۆت یانې تەرېچ ئەچا حەسارەنە بېنې. ڕۊنە چەقە و هەراو ژەنا و شەوېچەنە دەنگو حۆت ڕادوینا هەتا دوې شەوې، وەرمو چېشی؟ ئیسراحەت کۊن؟ تووتە مەژیوې و منیچ مەژیوېنا. چاگۆ هامنې لوایمې شەقڵاوې و ئیتر هەر ئا دەمەو هامنە دیسان چەنەم شېویا و سەرگەردانی یەخېش گېرتانێ.
سەرنام: ڕازێ زەبیحی و قزڵجی
تازە ژەن و زارولەکېم ئامێبېنې، جەلال بېتووشی کۊنە شەریکم زیڼانەنە ئازاڎ کریا و پەی کارێ مەگېڵې، واتم: هەر پېسە شەریکې بېنمې، ئیسەیچ شەریکېنمې. هیچم چەنە گەرەکنیەنی و بە شەریکی هەرمانە مەکەرمېن. جا کە لوایمې شەقڵاوې، ئاڎیچ چەنیمان ئاما و دەمو ڕێوە وېنېچ مەگېرېنمې.
زەبیحی و قزڵجی جە (مەحەللاتو عەبدوڵڵا شەریفی) گېریێ و خزنیێنە زیڼان. هەر زوو ئېقرارشان کەردەبې کە ئېرانیېنې؛ ئیتر عەبدوڵڵا شەریف نەتاواش وەرېشان بڎۊن. نزیک بە ساڵێ مەنێ و ئاغاکەشان فرە مەردانە یاردیشان مەڎې. دێشاوە دەسو ئېرانی؛ کە ئی ڕازیچە ناوەشە نییەنە:
سەردەمێ کە من شاگردو ئۊسا برایمی بېنا، قزڵجیچ ئاموشۊ عەکاسیەکەی مەکەرې و فېرە ڕتووشی و وردەکاریی تەری بیەبې. ڕوێشا سەییڎێ گەنجی کەوا شۊڕ، دلې دوکانو ئۊساینە ڕوەش کەردە ئېمە: برا من نامېم سەییڎ ئیبراهیمەن ... ، نمەزانو چېشەن (ویرم شیەنۆ). گەر دنیا بییە ڕاتان کۆتە قەسری شیرین، سەرم بڎەیدې. جە هەر کەسی بپەرسدې مەشناسۊم. حکومەتو ئېراقی جە خانەقینۆ دێنې بە پۊلیسی ئېرانی و ڕەسیدشان وەرگېرتەن ئەچا ساڵې حەبس و فرە چەنەپەرسایۆنە، نامې تېکەڵاوې بیېنې. زەبیحی کە نامې ڕواڵەتیەش (قاڎرە سوورا) و کە گېریان واتەنش عەبدولڕەحمانو حەمەڎەمینینا، نامەکې بیېنە (حەمەڎەمینو قالە سووری)! (سەعید ڕەحیم)ەکەو قزڵجیچ، کە دمایی بیەبې (حەسەن عەلی)، بیېنە بە (عەلی ڕەحیمی سەعیدی)! ئی نامېچە پېسە دوې گوناحبارا سیاسی دلې دەفتەرو مەرزوانانو ئېرانینە نییەنې. ئاڎیچې پېسە ئا گرد بۊیاخچیا حیساب کریێنې کە ئېراق مڎۊشاوە بە ئېرانی. ئانەیچمان ویر نەشۊن چا چن ساڵەنە زەبیحی و من فرە عال فېرو عەرەبی بیېبېنمې؛ بەڵام قزڵجی، هەرچن مەڵڵا بې عەرەبیی دلې کتېبې فرە بە خاسی مەزانې، ئیسەو ئیسەیچ فېرو عەرەبی بەغڎایی نەبی! کە قسې کەرې واچېنې پیرە مەڵڵای عەجەمەن و سەرو مینبەریۆ ڕەوزەخوانی کەرۊ! فرەو جاری جوابو عەرەبا بە کوردی مەدېوە!
زەبیحی واچې؛ ئا ڕوە کە دایمېشاوە بە ئېرانی، سەرهەنگێ فرە بېشەرمی قسە قوت، پەرسېما وەنەکەرې، بە منش وات: شمە چ کارێتان کەردەن کە دۆڵەتی هامساماتان تووڕە کەردەن؟
منیچ واتم: جەناب، ئېمە دەسورەشې دلې بازاری بېنمې؛ بېخەتێنمې.
ماچۊ: خاس، ئاغای سەعیدی تۊ قسې بکەرە.
واتم: نەعەم؟!
سەرهەنگ هەر نەعەمش ئەژنی، ڕاسبییۆ، پلې تەقنې و قڼگە وادې:
ماچۊ: ڤەن نەئەم! ئاغای ئېرانی، ئی نەئەمەت چکۊ ئاردەن؟!
منیچ واتم: کاکە قزڵجی گیان! تۊ بە کوردی جوابو عەرەبا مڎەیۆ؛ چەنی بې چېگە عەرەبیت هورستەن، کە گاڵتەمان پەنەکەران! بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]