چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و حەفتا و هەشتەمە
سەرنام: پیا فەعلەن و ژەنی بەڼا
وەڵینا واتەن: (پیا فەعلەن و ژەنی بەڼا). (بەڼا: ئۊسا دیوارەن)، یانې وەشمەکەرۊن. فەعلە، ئا کەسەنە کە کەرەسې مارۊ پېسە هەرمانبەری، واتا هەرچن پیا کەرەسې واردەمەنی بارۊوە، گەر ژەنێ نەبۊن پەیش بنیۊ سەر، ئانە هەرپېسەنە ئا هەرمانبەرەیە کە کەرەسې مارۊو ئۊسا دیوارێ نییەن بەکارشان بارۊن، پاگەرە پژگیاو مەبام بە تەپ و تپز پەی گیانو خەڵکی، هەر پۆکەیچ واتەنشان ژەنی و یانە؛ واتا: تاکو ژەنی نەبۊ، یانە نییەن. ئانە فرە خاس منەنە قۊمیا.
چن ساڵې ئاوارەی سەڵت و تەنیا، شەو و ڕۊ ئڼەو هەرو باری ماڼیاتەر، مەکۊشییانا؛ یاوابېنا دووکانداری؛ بەڵام هەر ئاڼە بې کە ڕۊ بە ڕۊ بوەروش و ئاوی بارەو دەسې بشۊرە. جارێشان ویرم کۆتۆ کە ماوەو ساڵێ ڕەبەقینە هیچ میوێم نەچەشتەبې، بەڵام کە بییا بە ساحېبو ژەنې، فرە بە پەلە وەزعە فاڕیا. ڕۊبعە کیلوێ گۊشت، کەمێ ڕوەن و برنج، کوچێ ماس و نانو بازاڕی، کە یەرە ژەمەی یەرې جەسې مەوەرېنمېش، بایی ئا تەنیا ژەمە واردەیە بې کە بە سەڵتی مەوەرېناش. وېرەگانە کە مەگېڵېناوە نۊعێ میوەیچ ئەسانېنا. دەرامەتەکەم هەر پېسە جارانی ڕوێ شش تاکو دە تمەنې بې؛ بەڵام ژەنە ئۊسا بەڼا بە مشورەتە یانەڎارەکېم پاسە سازنابېش کە پاشەکۆتیچمان ببۊن.
سهۊڵدانێ تەختەم ئەسا کە پەی گەرماو بەغڎای فرە پەنەواز بې. وردەوردە پانکە کۊنێ و ڕادوینە کۊنێم دلې هەڕاجیەکەینە ئەسێ و هەرپاسە ڕوەو وەری لوېنمې و ڕۊ بە ڕۊ پۊشتە تەرې و سېرتەرې بېنمې. کوڕەکەم فرە چەنەم نەبان (ئاژەڵێن کە بەچەکې وېش گەرەکېش نەبان) و نامۊ بې؛ هەر مەگرەوې و مەواچې: (ملوە پەی یانەو وېمان)، نیازو یانەو مامۊیش بېش، دوور جە من مەپەرسې: (ئەرې ئا کابرا کېن)؟!
کوردې فرېم دیڎېبېنې جە ژەن و پیای، کە ماوە چل ساڵا دلې بەغڎاینە ژیوێبېنې و هەڵای فېرو عەرەبی نەبیېبېنې. منیچ مەواچېنا خوڎایا داخۊم ئی ژەنې منە چەنی فېرەو عەرەبی ببۊن! کەچی ساڵێش نەبەرد پاسە فېرە بییە کە هەر پېسە ژەنە عەرەبە بەغڎاییا مەلې پەی بەری و بازاری وېش مەکەرې و کەرەسې پەنەوازې یانەی ئەسانې و زامەتو بازارکەردەی گرڎ ڕوێ کۊڵی منۆ کەرېوە.
پەنەم واتە دەی بۊ دەرس بوانە!
ئاڎیچە ماچۊ: حەی! تازە بە سەرەی چەرمۆ؟!
بە هەزار تکێ و لاڵیایۆ چن شەوێ جارێ دەرسێم لاوە مەوانې. کەچی پا گرڎ بېزاریشە جە وانای فېرەو کورڎی وانایۆ بییە. محەممەڎ جە سابڵاخ نریابې وەرو وانای؛ بە ڕواڵەت پۊلو یەکەمیش بڕیەبې؛ بەڵام هەر واچېنی وېمەنا بە زاروڵەیی: گېل و تەممەل! تەنانەت پیتەکایچ نەشناسې. پاسەم پەنەکەرد پیتەکا بشناسۊ، بنیۊشا یۊیۆ؛ واچې کورڎیې بوانۊ. ڕازې زاروڵانې قۊڕې سەمەرېش پەی مەنویسېنا پەیش مەوانېناوەو پەنەشان مەخوې و وەشیش چەنەشان ئې. فېرو کورڎی وانایۆ بی. ئینجا بە نیمە کورڎی و نیمە عەرەبی بەغڎایی چېوی سەمەرېش پەی مەنویسېنا؛ چانەیچ چەمېش کریێوە.
ویرمەن جارێشا دەسش پەی ڕادوینەکەی بەرد، ئەڎێش دەسگېرت.
ماچۊ: ڕۊڵە گیان! تاتەت ئا گرڎو ڕەنجەیە مڎۊن، نەکای ڕادوینەکە مەڕیۊن؛ پەیش نمەسنیۊوە. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]