کورد دلې چەرخەکا تاریخینە
هۊرگېڵنای و ئاماڎەکەرڎەی: ئەسعەد ڕەشید
بەشەی: چوارسەڎ و نەوەڎ و یەرەمە
* تاریخو (19-12-1993ز.) گېریای پەڼج ئەندامې بەرزې یەکیەتی نیشتیمانی کورڎەسانی بە دەسو چەکدارەکانو بزوتنەوەی ئیسلامی جە شارەکڵەو ڕانیەی، دماتەر گرۊڵیواران کریێ، کە ئینې نامەکېشانې: محەمەڎ سوڵتان، عەلی مام قادر، سەلمان فەخری، بەختیار محەمەڎ مەجید، مستەفا حەسەن، شایانو باسیەن دماتەر دلې شارو ڕانیەینە تەرمەکېشا کېشتې شۊنەو ترومبیلیرە.
* تاریخو (19-12-1993ز.) یۊرەماڵای چەکداری هېزەکانو یەکیەتی نیشتیمانی کورڎەسانی و بزوتنەوەی ئیسلامی، تەمامو کورڎەسانیش گېرتۆ، کە بی بە مایې کوشییای دەیان کەسا جە هەردویلایا.
* تاریخو (20-12-1993ز.) هۊتەرەو بزوتنەوەی ئیسلامی پەی سەرو بنکەو کۊمیتەو ڕانیەی یەکیەتی نیشتیمانی کورڎەسانی، ئەنجامەنە ژمارێشان چەنە کوشیێ و بنکەو کۊمیتەکەیچ گېریا.
* تاریخو (21-12-1993ز.) ئېستەیۆ تەرمو ئازاد کەریم سەمینی دلې یۊ جە جادەکانو شارەکڵەو کفری، کە ئەندامێ یەکیەتی بې و چەنی دە نەفەرا تەری چېردەسې بزوتنەوەی ئیسلامینە بېنې کە وەڵتەر دیلې کریێبېنې.
* تاریخو (21-12-1993ز.) هۊتەرەو یەکیەتی نیشتیمانی کورڎەسانی پەی سەرو بارەگاکانو بزوتنەوەی ئیسلامی جە ناوچەو ڕەواندوزی، شەقڵاوې، هەریر و چوارقوڕنەی، کە پانەیچە پەی ماوێ ڕاو میانو سلېمانی و هۆلېری وزیارە.
* تاریخو (22-12-1993ز.) پەرلەمانو پانیشتو کورڎەسانی، یاساو دەسەو سەرداری هەرېمو کوردەسانو ئېراقیش بەرشنییە.
* تاریخو (23-12-1993ز.) ئەمنستی ئەنتەرناشیۊناڵ، نامێوەش پەی جەلال تاڵەبانی و شېخ عوسمانی کیاستە، تاکو دلې یۊرەماڵای چەکداری میانیشانە ئیتر مافو مروڤی پاشېل نەکەران.
* تاریخو (24-12-1993ز.) گېریای ئەحمەڎ ئەسعەد ئیسماعیل، جە شارو هۆلېری دلې یانەکەو وېشەنە بە دەسو هېزەکانو یەکیەتی نیشتیمانی کورڎەسانی، کە ئەندامێ بزوتنەوەی ئیسلامی بې.
*تاریخو (25-12-1993ز.) یەکیەتی نیشتیمانی کورڎەسان و بزوتنەوەی ئیسلامی ڕېککۆتەنامەی ئاشتیشان مۊرەکەرد بە سەرپەرەشتی مەسعود بەرزانی، کە جە دە ئەنداما پېکئامابې، بەڵام هیچلایێشان پېوەزې نەبیې پۆشۆ و جەڼگ هەر سەرەمڕە بې.
* تاریخو (25-12-1993ز.) بزوتنەوەی ئیسلامی شش دیلې یەکیەتی نیشتیمانی کورڎەسانیش جە شارەکڵەو خورماڵی گرۊڵیواران کەردې، کە ئینې نامەکېشانې: ئەبوبەکر مەجید کەریم (وەرپەرسو کۊمیتەو خورماڵی)، بەختیار ئەحمەڎ، کەمال ئەحمەڎ حەمەمین، شیروان محیەدین ئەحمەڎ، ساحېب جەعفەر محەمەڎ، جەلال بابە مەعروف.
* تاریخو (27-12-1993ز.) هۊتەرەو یەکیەتی نیشتیمانی کورڎەسانی پەی سەرو بنکەی سەرەکی بزوتنەوەی ئیسلامی جە بېتواتە، کە بې بەمایې کوشییای دەیان کەسا و دیلکەرڎەی چڼیین ئەندامە بەرزا بزوتنەوەی ئیسلامی کە دلېشانە شېخ عوسمان عەبدولعەزیزشا چەنەبې، کە ڕابەو ئیسلامیەکا بې، هەم هەشت چەکدارې تەرېشان دمای دیل کەرڎەیشان گرۊڵیواران کریێ کە ئینە نامې حۆتیشانە: مەلا شەریف حسێن مسەفا، مەلا وریا کەرکوکی، نەبی مینا حەسەن، ئەحمەڎ بابەکر ئەحمەڎ، دانا محەمەڎ، عەلی حسێن، بەرزان کۊیی، کە ئینەو دماییشان تەرمەکەش نەئېزیاوە، بڕێ چانېشایچ وەر جە کوشتەیشان فەلاقە کریێبېنې.
* تاریخو (27-12-1993ز.) گېریای (6) شش ئەنداما بزوتنەوەی ئیسلامی جە کۊیە بە دەسو هېزەکانو یەکیەتی نیشتیمانی کورڎەسانی، دماتەر گرۊڵیواران کریێ، ئینە نامې یۊیشانە: بېستون عەبدولڕەحمان عەبدوڵڵا.
* تاریخو (28-12-1993ز.) یەکیەتی نیشتیمانی کورڎەسانی، ناوچەو کفری (18) هەژدە کەسې بزوتنەوەی ئیسلامیش دمای دیلکەرڎەی گرۊڵیواران کەردې، کە ئینې نامەېکېشانې: نازم محەمەڎ تۆفېق، جەلال عەلی قاڎر، شېرزاد عەلی قادر، هاشم محەمەڎ کاکە مەند، ئیبراهیم محەمەڎ کاکەمەند، نەوزاد محەمەڎ خان، لوقمان محەمەڎ ئەمین، سەباح جاسم حەسەن، عومەر فازڵ، حەسەن ڕەفعەت حوسێن، محەمەڎ ڕەحیم، سامان مەجید، گۊران حەیدەر ڕۊسەم، عەباس مەحمووڎ، عەدنان حەکیم تایەر، عادل عوسمان ڕەسوڵ، ئەیوب چەمچەماڵی و کامەران زەڕایەنی.
بەشێ جە کتېبو هاوڕێنامەی، نویستەی هاوڕێ باخەوان، هۊرگېڵنای پەی سەرو زوانی هۆرامی: ئەسعەد ڕەشید. [1]