کورد دلې چەرخەکا تاریخینە
هۊرگېڵنای و ئاماڎەکەرڎەی: ئەسعەد ڕەشید
بەشەی: چوارسەڎ و نەوەڎ و دوەمە
* تاریخو (10-12-1993ز.) ڕۊنامەو ئوزگور گویندەم جە تورکیا، پەی ساڵڕۊ مافو مروڤی دلې لاپەلە یەکەمینە، بەشێ بەیاڼامەو مافو مروڤو نەتەوە یۊگېرتەکاش وەڵاکەردۆ، هەر ئەچا ڕۊنە (200) دوەسەڎ پۊلیسې تورکی پەلامارەو بنکەو ڕۊنامەکەیشان دا و (110) سەڎ و دە کەسې ڕۊنامەکەیشان گېرتې، کە فرېشان تەنیا یەک ڕۊ دلې زیڼانینە مەنێ و باعزێشا زیڼانیې کریێ.
* تاریخو (10-12-1993ز.) پەلامارەو حسکی پەی سەرو بارەگای سەرەکی لیواو (24) هېزو یۊگېرتەو پېشمەرگەی، کە ئەنجامەنە دەسشان گېرت سەرشەرە و هەرچی چەک و تەقەمەنی و زەخیرەش دلېنە بې بە تالانی بەردشان.
* تاریخو (11-12-1993ز.) گېرتەی کۊنیشتێ جە ئەمستەردام پەی مەلا بەختیاری، ئەندامو سەرداری یەکیەتی نیشتیمانی کورڎەسانی، کۊنیشتەکې چەنەدوایێ بې سەرو پەرەئەسای ژیوای دیموکراتی جە کوردەسان.
* تاریخو (11-12-1993ز.) هۊتەرې پارتو دیموکراتو کورڎەسانی پەی سەرو دوې بارەگا حسکی، دلې شارو هۆلېری، کە چن کەسێ جە هەردوې لایا کوشیێ و بارەگاکېچ کۆتې دەسو پارتی، یاڼزە پېشمەرگې حسکیچشان دیلې کەردې.
* تاریخو (11-12-1993ز.) شېرکۊ بېکەسی شاعېر، وازش جە شالیاری شالیارگاو ڕۊشنویری ئارد.
* تاریخو (13-12-1993ز.) هۊتەرەو پارتو دیموکراتو کورڎەسانی پەی سەرو بارەگاکانو حسکی دلې شارو سلېمانینە، کە ئەنجامەنە چن کەسێ جە هەردوېلایا دلې جەڼگەکەینە کوشیێ، هەم (15) پاڼزە پېشمەرگې حسکیچ دیلې گېریێ.
* تاریخو (13-12-1993ز.) چن سەڎ کەسێ جە خەڵکو سلېمانی، دژو جەڼگی براکوشی میانو حسک و پارتی ڕاپیمایێشان سازکەرد، کە بڕێ ماچان ئی ڕاپیمایە یەکیەتی نیشتیمانی کورڎەسانی سازنان.
* تاریخو (16-12-1993ز.) سەروېرەگا دلې هۊڵو ئەخناتونو ئەمستەردامی، گروپێ هۊڵەندی کە وەڵتەر سەردای کورڎەسانیشان کەرڎەبې، فلیمێشان سەرو یەرە ساڵو بارو زروفو پانیشتو کورڎەسانی نیشان دا و دەیان کوردې و هۊڵەندیې ئاماڎې بېنې.
* تاریخو (16-12-1993ز.) تاکو (19-12-1993) چن لیژنێ میانو یەکیەتی نیشتیمانی کورڎەسانی و بزوتنەوەی ئیسلامینە پېکئامێ، پەی هېمن کەرڎەیۆ بارودۊخو میانیشان و فاڕایۆ دیلەکا.
* تاریخو (17-12-1993ز.) یەکیەتی نیشتیمانی کورڎەسانی، ناوچەو کفری کەمینێش پەی بزوتنەوەی ئیسلامی نیارە، ئەنجامەنە چوارشان کوشیێ.
* تاریخو (18-12-1993ز.) یۊرەماڵای چەکداری هېزەکانو یەکیەتی نیشتیمانی کورڎەسانی و بزوتنەوەی ئیسلامی دلې شارو کفرینە، کە بی بە مایې کوشییای چوار کەسا جە هېزەکانو بزوتنەوەی و زامڎاربییەی چن نەفەرێ تەریشان.
* تاریخو (18-12-1993ز.) دەسگیرکەرڎەی دوې ئەندامې یەکیەتی نیشتیمانی کورڎەسانی بە دەسو چەکدارەکانو بزوتنەوەی ئیسلامی دلې شارو کفرینە.
* تاریخو (19-12-1993ز.) بەخاک ئەسپارای تەرمو هیوا ڕانیەیی، کە ئەندامو بزوتنەوەی ئیسلامی بې و بە دەسو هېزەکانو یەکیەتی نیشتیمانی کورڎەسانی کوشییابې، سەڎان کەسې جە کفری بەشداری بەخاک ئەسپاراکەیشان کەرد، ئەنجامەنە چەکدارەکې یەکیەتی نیشتیمانی کورڎەسانی ڕاپیماییەکەشان وەرو دەسڕېژو گرۊڵیا دا و یۊ جە ئەندامانو بزوتنەوەی ئیسلامی کوشییا و یۊ تەریچ زامڎار بی، تۊڵەو ئانەینە هېزەکانو بزوتنەوەی ئیسلامی پەلامارەو بنکەو یەکیەتی نیشتیمانی کورڎەسانیشان دا جە کفری و بی بە مایې کوشتەی چوار کەساشان و گېرتەی بارەگاکەیشان و دیلکەرڎەی دەیان ئەندامې یەکیەتی.
* تاریخو (19-12-1993ز.) کوشییای کامەران ئەحمەڎی بە دەسو چەکدارەکانو بزوتنەوەی ئیسلامی جە شارەکڵەو کۊیەی، کە ئەندامێ یەکیەتی بې.
* تاریخو (19-12-1993ز.) یۊرەماڵای چەکداری هېزەکانو یەکیەتی نیشتیمانی کورڎەسانی و بزوتنەوەی ئیسلامی جە شارەکڵەو ڕانیەی، کە بی بەمایې کوشییای (6) شش کەسا جە هېزەکانو یەکیەتی.
بەشێ جە کتېبو هاوڕێنامەی، نویستەی هاوڕێ باخەوان، هۊرگېڵنای پەی سەرو زوانی هۆرامی: ئەسعەد ڕەشید. [1]