یاڎەوەریەکېم
بەشەی ویس و حۆتەمە
یاوا سەوزەمێڎانو شاری.چارەک سەعاتێوە جە نیمەڕۆی لاش دابێنە. هەوای ڕۊح برێژیای هامنیی گرڎکەسېوەش خزنابێنە چیروو درەختە سنۆبەرەکا. شار هەڵمیش چۆوە هورزێ و پەحاڵێوەیچ تەموو بیابانە دوورەدەسەکا گېرتەبێرە. خیابان فەقیرتەر جە وېرەگاکاش ئەرمانێنە.ڕەنگەش هورپڕووسقیابێنە. بازاڕ جە ئەورایېوە بې کەس و بې یانەولانەی شێ.
خەیلێ کاتەن وێناش کەروونە. پا تەنگدەسی و مەلالییەوە نەناڵنێ و گلەیی و بنداشتش ویر نەمەنەبې. میاچەماش عەرز و حاڵوو چېوەتەری کەرې، عالەم و ئادەم و زەمانە چنەش نەیاوېنە. عالتەر فکریانېشنە. فرەو کەڕەتا چەمم پنە کەوتەبێ، لاموە بېگانە نەئەرمانێنە. هیچکات ئێڼەو ئارۊی پەیم موهێم نەبېنە، وێچم نەزانېنې چی؟!
سەرەم سەرو چارەکەکەو دەسیش، (نایلۆنەکەی ماچوونە) نەبڕیېوە. دلې تفاقەکەیشنە بېجگەم جە چن نانێ لەواشێ هورفلێقیای و لاروولوېرێ! دانە تەماتێ سوورێ و کوچېو خیار، چېوەتەر نەدێ چەموە. گەرماو هامنی نایلۆنەکەش پڕووزنابێ و هەڵمیش چنە ئەی. منیچ میاچەمای گرژی خەڵکی تەماشا کەرېنێ و کەساتی بازاڕی و بې بەزەیی هامنی سووری و بې بەرقی و وەیلانی ۋیروئاوەزی چەقیایرەو ئەئی مەردۆمییە...ئێڼەم زانا وەرو چەمامەوە گوم بی. هەر پی سەرسووڕمانیوە تاکو چوارڕاو شەبڕەنگی تەماشام نەتەمامیا. دلې مێوەی ڕەنگاوڕەنگی هامنییەرە کە پیادەڕەوەکاش کەرڎېبېنې بە نەقش و نگاروو قاڵییە کورڎی گەرووسی، لەشم فێنک بیوە مانیاییش ئاستەرە و سەیاوە. پاساژوو حاجی وەیسی جە بې بەرقی و بې کارەبایی-نە، نەدارېوە ئێفلیجی شێنە. گورج و گۆڵ دلې لەمێشنە زیانېرە. نم و شۆی تەنیایی کەڕوکاس کەرڎەبېنې. سەوزەمەیدانچایېوەش دەم کەرڎەبێ و خزابێنە بې کەسی و ئێفلیجی خیابانی.
سەرو سەندەڵییەکاو سەوزەمێڎانەکەیوە عڼەش دەیبێوە و نایلۆنەتفاقەکەش یاوابێوە. بەبې دزی خوای چا ئاسماناوە و بە ئاشکرای بەڼەی غوڵامی چی سەراوەنوو زەمینینە، مل بەرزانە و بەبې شرم و بەبې ڕیا تیکەکاش قووت دێنە...ئاسمان بې مەلامات واق بییەبێنە نما و سوجدەو موئمێنێوە تەزبێحەکاش و دۆعایەکاش ئەژمارێنە!تەنانەت هەناوەو هەناسەیش و دەنگو نانە وشکەکې و خرمەو خیاراو بانجانا، ئاسمانی نەچڵاکنېرە، ئەجې هەزار ساڵې چېوەڵتەر کەڕوکاس بییەبێ!
بورهان ئەختەر.[1]
کوردیپێدیا بەرپرس نییە لە ناوەڕۆکی ئەم تۆمارە و خاوەنەکەی لێی بەرپرسیارە. کوردیپێدیا بە مەبەستی ئەرشیڤکردن تۆماری کردووە.
ئەم بابەتە بەزمانی (هەورامی) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
ئەم بابەتە 96 جار بینراوە
ڕای خۆت دەربارەی ئەم بابەتە بنووسە!