یاڎەوەری
بەشەی حۆتەمە
دلیٛڕاسەو پایزو ساڵەو (1984ز.) یانەما خورماڵ بیٛ، یانەکا (لالۉ حەمەڕەشید سادق)ینە بیٛنمیٛ، ویٛرەگانێوە نیم سات ڕۉ مەنەبیٛ هەرچی سەربازیٛ ڕەمێ( فیرار) بیٛنیٛ دلیٛ یانەکانەو بازاڕەکارە بیٛنیٛ جیاشا ئاست و لوێ ڕووەو دەشتەکاو دەگایەکا نزیکو خورماڵیرە و ویٛشا پەنا دا، تومەز ئەژنیەنشا تفەنگ چییٛ (جاشیٛ) حکومەتی ئیٛشەو مەیا فیراریٛ گیٛرا ، ئیٛتر خۉ چاوەختەنە هەرکەس گیٛریێ حسابو پیٛشمەرگەیش پەی کرییٛو ملش کرییٛ پەتەرە یا بەگرۉڵیە کوشییٛ، دماو وەرپڕای ( بانگو مەغریب)ی مەفرەزێ یاسریێ تفەنگچییٛ (جاشیٛ) حکومەتی ئامێ ئاگەڕەکیٛ ئیٛمە تەقەشا دا بەرەی پەرساشا فیراری ؟ واتم نا داواو ئاویٛشا کەردە بەنەبەدڵی ئاویم پەی ئاردیٛ ، دماو پەنج دەیەقا دیسان ئەڵقەڕیٛزشا زڕناوە و زیانیٛرە، واتشا خەریکا سەرد کەرۉ ئەشۉم چەمێ یانەنە ڕاما کەریۆ واتم چیٛوی چانە نمەبۉ ئانە مزگیو ئانە مەرکەزو پۉلیسی لودیٛ ئاگە ، میەو کۉڵ نمەڎا منیچ گەنج بیٛنیٛ توڕە بیاو دەنگم بەرزکەردۆو خیٛرا پاڵێم ورکیٛشتیٛو بەرەو حەوشەکیٛم هۉر پیٛکا ، نەمیٛ پاڵپاڵانیو هەڕەشەکەردەی و سەرنوگم کەردەیم ئانڎەش نەمەنەبیٛ قوڵبەسم کەرا یۉ پیٛڎابیو خوڕیش ملشارە (هەی ئەوە چیە)جاشەکیٛ بیٛدەنگیٛ بییٛ ، منیچ زانام جاشەکیٛ سەرپیٛچیشا کەردەن خیٛرا واتم ئینیٛ پەی واجبی ئامیٛنیٛ یان پەی وتەی؟ حکایەتو ڕازەکیٛم پەی گیٛڵناوە ماچۉ(خوێڕینە ئێوە بۆ فیرار گرتن هاتون یان خەڵک هەراسان کردن؟) خواو ڕاسا بەرش کەردیٛو کوچیٛ چەنیم مرداو ماچۉ پی دەورو نزیکو ویٛتارە کیٛ فیرارا واچە یانەنە نەزیۉەو بیٛخەم من چی سنورو ویٛمەنە نمازو کەشماڵ(تەفتیش) کریۉ من نامیٛم سڵیٛمان شەمیٛرانین ئامر سریەو ئی نامەردانا تەقەبڎا هەربەرێوە مازیشا ماڕو ، (بەڕاسی ئینە نەجابەتو کوردایەتی هەرەقەتین بیٛ ئیٛڎی کەرد) کاشی بەعەمەل ئاماو ڕۉبیۆو جاشیٛ گیٛڵێوەو شکور هیچکەس نەگیٛریا، دماو ماوێوە شەوێ پیٛشمەرگیٛ ئەشناسیٛ ئامێ واتشا ماچا جاشیٛ چیوەڵیۆ ئامێنیٛ و عەزیەتو خەڵکیشا دان نامیٛشا نمەزانی؟ ، منیچ کوچێ خوانیٛو واتم نامیٛ یۉیشا مزانو ئەشۉم دەسوەشیش وەنەکریۉ ، بەڵە ڕویٛ ئامێو ساڵیٛ لوێ ، دماو ویٛنیشانداکەو (1987ز.) ئیٛمە کەوتیمیٛ ئوردوگاو دەربەنڎدزڵی ئی کاک سڵیٛمانیچە شەریفانە بەویٛشو مەفرەزو سریەکەیشۆ تومەز بەشداری ویٛنیشانداکەیش کەردەنو بەیانەو قەومو قیلەشۆ ئامان دەربەندزڵی و ئینایمیٛ یەک ئوردوگانە، چاگە چنڎجارێ دەسوەشی ئاشەویمە (1984ز.)یم وەنەکەرد هەکە یاردی منو هەم فیرارەکایچش دان، جائیٛمە چائوردوگانە دەرس و دەورما بیٛو ئخوانیٛ بیٛنمیٛ هەرچنڎ لا ئیٛرانیۉ نەتاویٛنمیٛ واچمیٛ ئیخوانیٛنمیٛ بەبیٛلایەن ویٛمادیٛنمیٛ قەڵەم ، بەڵام جەلایەنو لایەنەسیاسیە کوردەکاوە گروەخت بوختانیما پەی کرییٛنیٛو ئەزیەتی فرەیچ دریامیٛ ، بەهەرحاڵ بەوە سەرو باسو کاک سڵیٛمانی کوڕێش بیٛ( کاک شیروان )تازە ورئیٛ ئەوەڵوهەرزەکاریش بیٛ لکابیٛ ئخوانیرە چون وەڵیٛ ئامایشانە پەی ئوردوگای چەنی مامۉسا حەسەن شەمیٛرانی ئولفەتو دەرسو دەوریش گیٛرتەبیەن ، تاتەش (کاک سڵیٛمان) چەنی مامۉساحەسەن شەمیٛرانی مامۉزێ بیٛنیٛ، ڕوێ کاک شیروان چەنی ئیٛمە مردابیٛرەو قسیٛ کەریٛنمیٛ تاتەیچش چەنی کاک عەلی تەوفیق بیارەیی (هەردوی بەڕەحمەتیٛبا) هەکە کادیٛرێ یامەسولێ پارتین و کاک سڵیٛمانیچ پارتین نزیکو ئیٛمۆ بیٛنیٛ ، کاک سڵیٛمان کاشیروانی کوڕش چڕیش حەر یاوا لاش شەقە زلێوەش دا بنەو گۉشیشو واتش یاالله بۆماڵ، کاک شیروانیچ دیا کاک عەلی رەو ماچۆ ئەو لێدانەم تۆبویت نەک باوکم ، کاک شیروان کوڕێ مەبدەئی و ئازاو وەرەچەم قایم بیٛ سەوای ئاماوە لاما پەرساما چی واتت کاک عەلی تۉ ئا شەقەزللیٛتە داناوەنە؟ ماچۆ ئانە زوۆن تاتەیم هور منیۉ هەکە چەنی شمە نەگیٛڵو.
مەهدی مەیکە عەلی.[1]